المراية الشمال اتكسرت ومش عارفه اعمل ايه؟؟؟

**dinagaballah** · 18-04-2010 04:55 PM

السلام عليكم ورحمة الله وبركاته
انا جبت نيو اكسنت 2010 في شهر 3 والمرايه الشمال اتكسرت على الدائري رحت لهيونداي اللي في شارع التحرير والسودان و في واحد عند كوبري الدقي ورحت اللي في شارع عماد الدين اللي في وسط البلد كلهم قالولي مش موجوة غير في ابو رواش رحت ابو رواش وقلت بالمرة اعمل صيانه الالف والمفجأة ان المرايه مش موجودة عندهم وقالولي اتصلي كل اسبوعين شوفيها جت ولا لسه انا دلوقتي مش عارفه اعمل ايه ومش عارفه امشي بالعربية حاسه اني عامية لو حد عندة اقتراح يقولي ارجوكم

**zooz123** · 18-04-2010 05:38 PM

المرايا موجوده فى الحرفيين عند بتوع التقطيع

**Hamdy Masria** · 18-04-2010 06:48 PM

هو بس فى استفسار المراية كلها اللى اتكسرت ولا الكف الزجاج فقط... لو الكف الزجاج فقط تبقى محلولة اى حد بتاع زجاج هيعملهالك ولو المراية كلها يبقى مفيش قدامك غير حلين
1 - كثفى البحث شوية وشوفى فعلا ممكن تلاقيها زى الأخ ما قال عند ببتوع التقطيع
2 - تستنى التوكيل وامرك لله .
وبعدين متزعليش نفسك فداكى مليون مراية

**usama7499** · 18-04-2010 08:09 PM

انا حصلت معايا بس الحمدالله الكف الزجاج هو اللى انكسر .رحت عن بتاع الزجاج راح عملى واحدة زيها ولصقها بمادة السيلكون الاسود وكلة تمام...ويارب متكون المراية كلها وتبقى زى اللى عندى بسيطة

**zooz123** · 18-04-2010 08:34 PM

يا جماعه إنسوا موضوع بتاع الزجاج ده

موجود فى السوق لكل الموديلات كف أصلى يعنى انا شارى كف مرايا شما أصلى جديد مش مستعمل لفيرنا ب 30 جنيه

وأبعد عن التوكيل فى الحاجات الصغيره دى

**dinagaballah** · 18-04-2010 10:45 PM

للاسف انها مش الكف الزجاج دي المرايه كلها ومينفعش يركبلها زجاج علشان في حاجه من جوة المرايه اتكسرت ومينفعش تركب فلازم كلها تتغير انا الحمد لله مأمنه عليها بس في ناس قالولي ان الحرفين بيبيعوا من غير فاتورة ولازم يكون في فاتورة علشان التأمين ومرسي علي اهتمامك بالموضوع

**Ayman-Ahmed** · 19-04-2010 12:52 AM

المشاركة الأصلية كتبت بواسطة dinagaballah

للاسف انها مش الكف الزجاج دي المرايه كلها ومينفعش يركبلها زجاج علشان في حاجه من جوة المرايه اتكسرت ومينفعش تركب فلازم كلها تتغير انا الحمد لله مأمنه عليها بس في ناس قالولي ان الحرفين بيبيعوا من غير فاتورة ولازم يكون في فاتورة علشان التأمين ومرسي علي اهتمامك بالموضوع

الحمد لله على كل حال.

حصلت معايا نفس المشكلة اول اسبوع ركبت فيه العربية من سواق ميكروباص.المهم لو المراية كهربا مش هاقدر افيدك لاننى 2010 بس مش الشكل الجديد.

لو المراية لسة متعلقة فى القاعدة و شايفة سلك سوستة معلقها فى القاعدة يبقى الحمد لله.لاننى عملتها عند صنايعى فى شارع معروف و طبعا عشان العربية جديدة بعد مناهدة خد 130 جنيه.
هو فك المراية كاملا و لحمها فى القاعدة والحمد لله بعد ساعتين مشى الحال لاننى لما سالت فى التوكيل قاللولى مش موجودة ولما تيجى هتبقى فى حوالى 650+الضريبة.

لو تقدرى تصورى المراية يبقى احسن عشان برضه الاعضاء يقدروا يفيدوكى اكتر.

التامين لازم يصورها الاول ويعمل تقرير حادثة و حسب الشركة هيردلك الفلوس فى خلال 15 يوم.

**dinagaballah** · 19-04-2010 03:00 AM

المشاركة الأصلية كتبت بواسطة emo_ayman

الحمد لله على كل حال.

حصلت معايا نفس المشكلة اول اسبوع ركبت فيه العربية من سواق ميكروباص.المهم لو المراية كهربا مش هاقدر افيدك لاننى 2010 بس مش الشكل الجديد.

لو المراية لسة متعلقة فى القاعدة و شايفة سلك سوستة معلقها فى القاعدة يبقى الحمد لله.لاننى عملتها عند صنايعى فى شارع معروف و طبعا عشان العربية جديدة بعد مناهدة خد 130 جنيه.
هو فك المراية كاملا و لحمها فى القاعدة والحمد لله بعد ساعتين مشى الحال لاننى لما سالت فى التوكيل قاللولى مش موجودة ولما تيجى هتبقى فى حوالى 650+الضريبة.

لو تقدرى تصورى المراية يبقى احسن عشان برضه الاعضاء يقدروا يفيدوكى اكتر.

التامين لازم يصورها الاول ويعمل تقرير حادثة و حسب الشركة هيردلك الفلوس فى خلال 15 يوم.

انا الحمد لله شايفه سلك السوستة وهبقا اصورها بكرة وانزل الصورة بس علي فكرة انا لما سالت عليها في ابو رواش قالي ب 820 ج ماعدى باقي المناطق قالولي 650 ج وكنت عايزة اعرف من حضرتك عملتها فين علشان ممكن اروح اعملها؟؟
وفعلا التامين صورها وقالي نديلك شيك بعد 20 يوم من تسليم الفاتورة