الموضوع: بطه ولا لانوس ولا اكسنت

المشاركة الأصلية كتبت بواسطة classboy

السلام عليكم ورحمه الله وبركاته

انا دلوقتي الاختيار بالنسبه ليا علي 3 عربيات لانوس وناس كتسر قالولي ان عيبها في العفشه ومش ثابته ومش عمليه وضعيفه وابعد عنها ده كلام الصنايعيه مع اني انا مقتنع بيها جدا

نعم ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
اعذرني بس الصنايعي اللي قال لك كده - ايا كانت العربية اللي هاتجيبها - ما تتعاملش معاه لأنه مش فاهم حاجة
ابسط دليل , انا راكب اقدم موديل في اللانوس , و مش عايز اقول لك انا اكتر من مرة يجي لي واحد عايز يشتري العربية و انا واقف في محطة بنزين بامون
و يا سلام بقى لو عديت بس من اي حتة قرب سوق العاشر يوم الجمعة

بص يا باشا , عيب اللانوس الأساسي , فرامل ضعيفة ( لكن لو انت من اللي بيمشوا بعقل مش هاتفرق معاك اصلا , هي بتفرق بس مع اللي بيلزق لزق في العربية اللي قدامه ) , و طرمبة البنزين لو بتسيب خزانك يفضى كتير بتبوظ , و تسارعها اقل من عربية زي الفيرنا

اما بالنسبة للثبات , خش قسم الدايو و اسأل , هي مش سيراتو , بس انا عربيتي كتير اوي باجري بيها على 140 و مش باحس خالص انها بتطير ولا بترجرج

و مش فاهم بصراحة ضعيفة من ناحية ايه , موتور ولا صاج ولا ايه

اللي يقول لك غير كده يبقى العيب يا في عربيته يا في الميكانيكي بتاعه ( و انا جربت عك الميكانيكية في أول ما جبت العربية بالذات ) , يا اما يبقى بيجيب قطع غيار صيني , و طبيعي يبقى اداء عربيته مش قد كده

انما مش اعتمادية , ده كلام مش مظبوط , و تعال نشوف كام مرة شفت عربية لانوس عطلانة على الطريق , انا عربيتي بقى لها سنة و نص معايا , عطلت بيا مرتين بالعدد , مرة كان فيه مشكلة في ماستر الدبرياج و انا اهملتها فترة , فطبعا الدبرياج قفش , و مرة طرمبة البنزين ضربت , و طلع المالك السابق كان جايب لها طرمبة صيني ب150 جنيه

على فكرة , انا لما جيت اشتري عربية من سنة و نص , عملت نفس المقارنة دي , و رسيت على اللانوس , و مش ندمان