الموضوع: مقابله الاعضاء مالكي النيسان و الضيوف الكرام

طيب شباب حاضر
انا نزلت سألت في NILE CRYSTAL علي كورنيش المعادي و سألت في مركب النهر الخالد بتاع القوات المسلحه علي كورنيش المعادي برضو قصاد كوبري طره
اولا NILE CRYSTAL :
مكان شيك
في مساحات علي الكورنيش تحت فيها مقاعد و كافيه و شيشه و اللذي منه
المركب طبعا في منتهي الشياكه و بيطلع رحلات غدا في النيل و ممكن عشا كمان بس احنا خلينا في موضوع الغدا علشان التوقيت بالنسبه للناس اللي هتكون علي سفر
الباركينج هناك واسع جدا و يساع الحبايب كلهم
بس مشكلته ان الساعه ب 4 جنيه و كسر الساعه يحسب ساعه و مفيش خصم بالنسبه للمركب في الباركنج
الغدا من 3:30 الي 5:30 و هو ده وقت حركه المركب
يعني لازم نكون هناك قبل كده يا اما تجيب معاك لوجان علشان تحصلنا في الميه!
الغدا عباره عن بوفيه مفتوح و بيكون فيه:
2 نوع فراخ
2 نوع لحمه
2 نوع سمك
شوربه
20 نوع سلطه
حلويات شرقيه و غربيه
ارز و مكرونات
محاشي

و التكلفه بتاعت الغدا و المركب هتكون 155 جنيه للفرد و للاسف الخصومات للجروبات اكتر من 70 فرد
بس شهاده لله المكان نضيف موت و شيك و المركب فخم جدا جدا
============================

ثانيا بقي مرسي النهر الخالد
طبعا تابع للقوات المسلحه فله نظام و ظبط و ربط
بس الانظمه مش قد كده خصوصا موضوع تحرك المركب وسط النيل
الراجل متر شريف قاللي الحموله كلها 100 فرد
علشان المركب يطلع في النيل لازم علي الاقل 70% من العدد يكون موجود
سألته هل ينفع العدد يكون من 15 الي 30 و ندفع 100 او 200 جنيه مثلا و نطلع احنا بالمركب في وسط النيل قاللي لأ
لازم علي الاقل و بمجهود منه يكون العدد 50% من الطاقه بتاعه المركب
بس شهاده لله المكان علي الكورنيش تحت رائع و عائلي
فيه لعب اطفال و ترابيزات و قعدات و مسطحات خضراء جميله كعاده القوات المسلحه في نواديها
بس مفيش شيشه و المتر شريف قاللي ده جيش قلتله منا عارف انا كنت مجند قبل كده بس قلت اسئل برضو يمكن!
انظمه الوجبات:
مشروب ساقع
سلاطه
حلو(شرقي-سواريه-ام علي )
طبق رئيسي و يكون واحد من التالي:
1- ماكس جريل (ارز بالخلطه-بطاطس محمره- 3 انواع مشاوي مشكل )
2- شريحه من اللحم البتلو بالمشروم
3 ماكس سي فود (سمك فيليه -سبيط- ارز صياديه)
ده بالنسبه للوجبات و الفرد بيكلف 75 جنيه
في بوفيه مفتوح و ب 100 جنيه للفرد بس للاسف لازم تاخد المركب كله (عدد 100 فرد) فمش نافع خالص اخليه بوفيه مفتوح لينا


المركب نضيفه بس متواضعه و لها سقف صغير مغطي في الدور التاني و المطعم فيها في الدور الاول
ميزه المكان النضافه و تواضع الاسعار بس علي حساب الفخامه
المسطح اللي عندهم علي الكورنيش اكتر من رائع و كبير و مناظر طبيعيه رائعه
===============================
المركبين لازم حجز دفع مبلغ تأكيد قبلها بأيام
فلو ناويين و النيه لله الجمعه الجايه ان شاء الرحمن يبقي نشارك كلنا و نرد و نتفاعل
انا بصراحه مش عايز ادفع 50 جنيه في اكله من كنتاكي و اساسا مش بحبه
و انا بتكلم و الحمد لله انا قادر ادفع بس اكيد اللي حاجه زي كده هترهقه ماديا مش هيتكلم و هيتكسف و يسكت و يمكن يعتذر و ميجيش
فخلينا نتفق و نتناقش و احنا عاملين حساب الكل برضو
انا شايف NILE CRYSTAL في منتهي الجمال و حلال فيها الفلوس بس لو السعر مش مناسب للكل يبقي بلاش منها
و نهر المرسي الخالد رائع و لو حتي المركب متحركتش مش لازم كفايه القعده هناك و المناظر الرائعه
بس متنسوش اننا هنتقابل في وقت غدا و منا اللي هيكون جاي من سفر فلازم ناكل اكيد
و للسبب ده في اول الموضوع اخترت وقت بعيد عن الغدا علشان كل واحد ياكل براحته
انما و علشان خاطر الناس اللي هتكون علي سفر فالتوقيت اتعدل الي بعد الصلاه مباشره يعني بنتكلم علي الضهر
انا عندي استعداد نتقابل في اي مكان بس للظروف احكام و بحاول اكيف الموضوع اننا نتقابل و نتجمع و ننبسط
لو عليا مش مشكله لو اتقابلنا حتي في جراج عمومي بس نتقابل!!
و بالنسبه للنهر الخالد فكل واحد هيتكلف في حدود 100 جنيه اكل و مشاريب و قعده
و بالنسبه ل NILE CRYSTAL هتكون التكلفه 155 و بارك حوالي 3 ساعات متوسط 12 جنيه و الشيشه و القعده مش عارف هتكون كام بس ممكن مبلغ 200 جنيه كده يتصرف هناك

فياريت بقي حد يساهم و يشوف التكاليف كلها بتاعت داندي مول هتكون كام لأن اكل في كنتاكي ب 50 جنيه و غير الكافيهات هناك مش رخيصه فهندخل في 100 جنيه يبقي النيل احلي و امتع
و رجاء خاص مني
انا اللي هيكون عيد ميلادي اليوم ده (يبقي اسمعو الكلام من غير جدال)
ياريت لما عدد من الاعضاء يوصلو لأتفاق ميجيش واحد او اتنين يحاولو يغيرو الاتفاق علشان صعب جدا نغير كل شويه علشان واحد او اتنين مجموعه كامله) و اكيد كلامي ده مع الاحترام للجميع و نفس الكلام يمشي عليا قبل اي حد بس علشان نتفق بقي و نستعد للقاء
معلش استحملوني شويه
====================
و بالنسبه للناس اللي بتهنيني بعيد ميلادي و كده عايز ارد عليكم واحد واحد بس هاستني شويه دلوقتي علشان الموضوع ميفتحش في 300 مشاركه و لسه متفقناش