الموضوع: حادثة جامدة في شارع شبرا و موقف ربنا لا يكتبة علي حد

اللهم استرنا فوق الارض وتحت الارض ويوم العرض عليك

المشاركة الأصلية كتبت بواسطة mohamed_momi88

بتاع الاوبل بياخد غرزة في شارع شبرا

انا مش عارف يعني دة انسان في عقله مخ زينا كدة
و الله حرام يعني تاكسي اكل عيش لاسرة و لا ممكن اسرتين كمان علشان واحد ... و لا بلاش اشتم الحيوانات

و طبعا الباشا جري و لا هو هنا و روح اتعشي و نام علشان يوفر دقيقه و لا دقيقتين

بجد انا دمي محروق يعني شبرا اساسا مش منطقه جري خالص مينفعشي ناس بتعدي رايحة و جايه و عريات كتير في ايه

تفتكروا ايه حل المواضيع دي و ايه الحل مع الناس برضة بتوع الغرز المقفوله اللي لازم تحط عينك في وسط راسك و تلحق تفرمل علشان متلبسشي فيه الواحد يعملهم ايه و في معظم الاحيان مش بيبقي وارهم حاجة شباب فاضي

امبارح ماشي في الاتوستراد و الاشارة بتاعه يوسف عباس واقفه و بعدين فتحت فمشيت الاقي واحد معاه باسات كسر عليه كسرة غبيه جدااااااااااااا و مش عارف ليه معن طريقه كان ماشي و ربنا ستر و لحقت نفسي و ولا هو هنا و بعدين عند رابعه جة الباشا من رابع حارة و عايز يدخل شمال فجأة لكن انا صممت و اديته كلاكس طويلللللللللللللللللللللل لللل و عديت لقيته بيقولي عدي يا حيوان

بصيت في المرايه لقيته راجل كبير مكنتش عارف ارد عليه و معرفتش اقف بس يعني واحد زي دة كان هيعمل حادثتين في الطريق بين اشارتين بينهم 200 متر مثلا فما بالكم بيعمل ايه في الشارع بقيت اليوم

ربنا يرحمنا يارب من الاشكال دي

الواحد لو اتأخر 15 دقيقه افضل مليون مرة من الغرز و الكلام الفارغ دة

اللي دماغه تعباه وعايز يجري هايجري في اي حتة.........والحادثة كانت باليل والشارع بيكون فاضي الي حد ما من العربيات.........بس ساعة القدر بأه........

المشاركة الأصلية كتبت بواسطة Ezzat-fayek

المكان : شارع شبرا امام كلية الهندسة

الزمان : الساعة 2 مساء
كنت قاعد بتكلم مع m_ghazaly علي الميل و مرة وحدة سمعت صوت خبطة جااامدة جدااا
جريت علي البلكونة اشوف في ايه لقيت الناس كلها بتجري و انا ال view بتاع البلكونة مش مبينلي حاجة
طلعت جري علي السطح اشوف فيه اول ما بصيت علي العربية لقيت نورها ضارب في وشي فوق السطح " الدور الخامس" يعني متخلين العربية كانت في زاوية عاملة ازاي
نزلت جري علي الشارع احاول اساعد لقيت تاكسي شاهين طالع فوق الرصيف الفاصل بين الاتجاهين و داخل في عمودنور و كلمة متدمر دي قليلة عليه التابلوة طالع في الكبينة و القوايم متكسرة و الكبوت و الماتور و الكابوت داخل علي الكبينة وجسم العربية نفسة بقي علي شكل رقم 8 بالعربي
و الكنبية الي وا طايرة في الشارع بالراكب الي كان قاعد عليه" راجل كبيرحوالي 55 سنة"
و قدام كان راكب واحد كمان غير السواق
الراكب الامامي دة ربنا يرحمة لو كان مات لان شكلة كان متبهدل خالص مفيش عضمة فيه سليمة و دماغة كانت بتجيب دم
و التابلوة كان طالع في وشة و السواق كان مخبوط في وشة و كدمات او كسور بسيطة
و ورا التاكسي الشاهين كانت في عربية تانية 128 طالعة برضة علي الرصيف الفاصل بين الاتجاهين و دي كان الناس الي فيها سلام بس الرفرف القدماني يمين ضايع و اظن المقصات برضة
المهم جريت علي الراجل الي كان قاعد علي الكنبة الورا الي طار بيها في الشارع
الناس كانو قوموه و قعدوه علي كرسي لقيته الحمد لله مفيش كسور بس راسة كانت وارمة جدااا من الخبطة في الاسفلت
و كان فايق بس مدروخ جامد بس قعدت اكلمة و اشاورلة بارقام و الحمد لله جاوب صح و كان واعي سالتة اذا كان عندة السكر قالي لا سالتة علي رقم تليفون حد من قرايبة او اولادة قالي مش فاكر طب معاك موبايل يا حج قالي لا طب بطاقة لا برضة سالتة علي عنوان بيتة الحمد لله طلع فاكرة و كان الحمد لله قريب اوي
في الوقت دة كان الناس بتحاول تخرج الراجل التاني كان في العربية زعتلقهم و مخلتش حد يحاول يطلعة لان ممكن الناس تشدة غلط تسبب في مضاعفات اكتر و في الوقت دة الناس اتصلت بالاسعاف و لاول مرة اشوفهم بيوصلو بسرعة جدااا كانو في 7 دقايق بالظبط وصلو و معاهم بوكس و ظابط شرطة المهم خدو المصابين و طلعو علي المستشفي و الظابط جة اتكلم معايا و مع واحد تاني الي كان موجود جنب الحادث و شافه كلة
الي حصل بقي
التاكسي دة ماشي في الشمال و وراة ال 128 في النص علي اليمين كان في عربية راكنة
الاوبل جة ياخد غرزة كان غشيم اوي العربية حدفت منة خلا ال 128 يخبط في التاكسي الشاهين و يحصل الي حصل
المصيبة بقي ان بتاع الاوبل ربنا يحرقة بجاز جري و مفكرش حتي يقف يساعد الناس الي بتموت دي
حسبي الله و نعم الوكيل
المهم قلت للظابط انا عرفت عنوان اهل المصاب الي ورا
اداني رقم تليفونة قالي بعد ما اوديهم المستشفي اخليهم يكلموه عشان يعملو محضر
خدت واحد جاري عشان نروح نبلغ اهل المصاب و تطوع شباب بكيا سيراتو انهم يوصلونا و يروحو معانا
طبعا اول ما وصلت خلاص كانت اعصابي باظت و مش قادر اقف علي رجلي و شايل هم ازاي هبلغ اهله
رحت و خبط طلعتلنا مراتة و بنتة
من لبختي و بوظان اعصابي انا نسيت اسم الراجل ايه
قلتها حضرتك جوز حضرتك عمل حادثة و حاليا هو في مستشفي الساحل طبعا الست انهارت و بنتة نفس الكلام طلعنا ابنة قلتلة هو والد حضرتك شكلة كذا كذا
قالي اه قلتله هو عمل حادثة و هو موجود في مستشفي الساحل
و اديتة رقم الظابط و هما راحو علي المستشفي و انا رجعت تاني علي مكان الحادثة
لقيت سواق التاكسي موجود هناك و صاحب ال 128
و المصيبة ان سواق التاكسي عايز يشيل صاحب ال 128 الليلة
يعني مفيش اتعاظ انك كنت بينك و بين الموت خطوات و احتمال يكون الي معاك مات اصلا
و الناس كلها الي كانو موجودين و شاهدين الحادث كدبوه
و حسبي الله و نعم الوكيل في صاحب الاوبل الي اتسبب في المصيبة دي و هرب
النقط الايجابية في الموضوع
الاسعاف في 7 دقايق بالظبط كانت موجودة هي و الشرطة
الشرطة حاليا عاملة كاردون حوالين الحادثة و عاملة حراسة حوالين العربيات
النقط السلبية
كل المعدي علي الجانبين واقف يتفرج لدرجة ان الاسعاف مكنتش عارفة تخش
محدش حاول رضي يروح المستشفي او يتكلم حتي مع الظابط غيري و واحد تاني بس

في النهاية ربنا يستر طريقنا كلنا
و ادي نهاية السرعة و تهور في القيادة
و حسبي الله و نعم الوكيل في صاحب الاوبل
الا

ربنا يستر علينا كلنا ... ولازم نكون مسئولين شوية ونتحترم حقوق الغير

بس انا ليا رجاء صغير عند حضرتك انت وصديقك العزيز (غزالي)
((((((ابوس ايديكوا غير نوع الخط اللي بتكتبوا بيه ده لأني خلاص بحس اني هتعمي ونا بقراه او لو مش عايزيين تغيروه كبروا الحجم شوية عشان بجد متعب اوي ))))))))))))
وشكرا للتعاون...انا عارف اني بتعبكوا معايا

المشاركة الأصلية كتبت بواسطة baskota

عزت انا ليا طلب صغير منك ومنك غزالى من غير زعل
ياريت تغيير خط الكتابة لانه مرهق جدا فالقراءة لدرجة انى بعانى وغالبا مش بقدر اكمل قراءة مشاركتكم بسبب الخط ده
ربنا يستر علينا من الحوادث

علم و جاري التنفيذ

قدر الله وما شاء فعل
إذن هناك مشكلة في السيارة الشاهين
كان عندي سيارة شاهين موديل 1999 وكنت شريها زيرو وفي يوم الجمعة 2002/8/16 كان يقودها أخي الكبير ومعه والدي يرحمه الله رحمة واسعة
وفي طريق بني سويف اصتدم أخي بسيارة ميكروباص ونفس الوصف تقريباُ حدث في السيارة .
كسر القوائم الامامية خلع القوائم الوسطى من الأسفل ( هجوم ) الفتيس والموتور على الكرسي الأمامي يمين إنفصال ظهر الكرسي عن المقعد
وبالنسبة للسائق كان من حظه الدريكسيون .
والنتيجة ؟؟
وفاة والدي يرحمه الله بعد الحادث بأقل من ساعة من شدة ما ألم به من إصابات ( والأعمار بقدر ربنا ) و إنا لله وإنا إله راجعون .
أما أخي فقد أصابه ما أصابه ( كسر بعظمة الفخذ وتم تثبيته بشريحة و 16 مسمار وكسر بمفصل الحوض وتم تثبيته ب 2 مسمار وكسر بعظمة الساعد وتم تثبيته بشريحة و8مسمار وهذا بفعل الدريكسيون
أما المصيبة الكبرى ففقدانه إحدى عينيه بسبب الزجاج الامامي ( فقدانها للرؤيا ولكن الشكل العام لها سليمة ) ولله ما أعطى ولله ما أخذ ولا نقول إلا ما يرضي ربنا إنا لله وإنا إليه راجعون .
والسبب في كل هذه المصائب أن سائق الميكروباص كان يقود سيارته بسرعة عالية وكان يتخطى سيارة اخرى على يمينة في طريق أسيوط الزراعي ( طريق رايح جاي عرضه لا يتخطى ال10 أمتار )
رعونة

ربنا يرحم والدك و يغفرلة
و يتم شفاء اخوك علي خير