اسمحلي اغلطك في نقطتين - ولا تغضب مني-
أولاً: لا تضع نفسك موضع الشبهة أبداً... أنا أرفض ان اقف في موضع كهذا ومعي زوجتي وليس خطيبتي..
ثانياً: المجرمين دول بيعـتمدوا بالضبط على موضوع -اشتريت دماغي ده- هو عارف انه مالهوش سلطة لكنه بيعمل شغل عليك و لما بياخد منك الفلوس بيضحك عليك و بيعتبرك "زبون" بل و غالباً بيشتم و بيعتبر الفلوس اللي دفعتها دليل على انك كنت بتعمل حاجة غلط و بيحلل لنفسه انه ياخذ منك فلوس لانك من "اللي جاتهم البلاوي ...ملوا البلد.."!!! وده من اللي باشوفه من المواقف التي يتصادف أن اكون فيها في الجانب الآخر من القصة..

كما أنك بفعلتك هذه "شجعته" على الفساد و على تكرار الفعلة مع غيرك بجرأة اكبر..
تخيل أول مرة نزل يشتغل فيها حد و يعمل عليه شغل و"يقلبوا" في قرشين... تفتكر كان بيتصرف بنفس الجرأة ولا كان بيقدم رجل ويأخر رجل و لو اتشخط فيه كان جري ومعملهاش تاني؟؟

رأيي لو اي واحد أوقفك أو طلب منك أوراقك أو أي شيء آخر -خاصة لو لابس ملكي- أول خطوة: "ماتتهتش" و متتهزش... وحافظ على هدوئك طالما مبتعملش حاجة غلط
ثاني حاجة: بأدب إساله عن صفته وأصر على طلب كارنيه الشرطة ولا تستجيب له ما لم تر الكارنيه -(((وتمسكه بإيدك)))- ولو رفض قل له ايش ضمني انك مش من النصابين اللي بنقرأ عنهم في الجرايد؟؟ كما أن هذه هي تعليمات((الداخلية)) للمواطن: لا تستجيب لأي شخص بدون كارنيه شرطة.. بل حتى لو لابس ميري من حقك تطلب كارنيهه و على فكرة الضباط المحترمين بيقدروا ده و بيطلعوا الكارنيه فوراً..
ثالثا: امسك الكارنيه بإيدك وإقرأ بياناته بصوت عالي -لأنه بالتجربة ممكن تبص و متشوفش أي حاجة ودي حصلت معايا .. من رهبة الموقف بحلقت في الكارنيه دقيقة وماشفتش أي حاجة إطلاقاً- وطبعاً هم عارفين كويس الموضوع ده وممكن يكون كارنيه نادي شباب الوراق وكمان الصورة مش شبه اللي واقف أماماك.
رابع خطوة: لو كان اللي لابس ملكي شكله مريب: وانت ماسك كارنيهه اتصل بموبايلك بالشرطة "ولو تعرف نمرة القسم التابع له يكون أفضل" وقل لهم أمامي فلان الفلاني لابس ملكي وبيدعي أنه من مباحث كذا و أنا في الحتة الفلانيه وبيطلب مني كذا و كذا هل هو تبعكم؟؟
لو كل شيء قانوني المفروض مايعترضش على أي خطوة من السابقة بل و المفروض يتفهم و يرحب.. كما أنه سيشعر أنك عارف حقوقك. لو كان شرطة فعلاً لكن بيعمل شغل على الناس حيخاف وممكن تكون بكده ربيته.. لو هو بقى -لا قدر الله- نصاب ومنتحل شخصية شرطي فانت لازم تكون عامل حسابك للهرب من أول لحظة و لازم تسيبله الباب مفتوح للهرب علشان لا يؤذيك... يعني لو رفض يعطيك الكارنيه و حسيت انه ممكن يمشي سيبه يمشي و متلحش عليه لأنك لو زنقته حيتصرف بغباء وممكن يؤذيك..

و الخلاصة إننا شعب مايعرفش حقوقه علشان كده كله بيهبش في كله..

مرة زمان قرات كتاب مفيد إسمه (علشان ماتنضربش على قفاك..!!) مؤلفه ضابط شرطة سابق و هدفه يعرف المواطن على حقوقه علشان محدش "يركبه"... اللي يعرف يجيبه -وهو موجود على النت- حيفتح عينيه على حاجات كتير..