والله انا عن نفسي شايف ان الميا مش وحشه خالص , اهم حاجه تغطي الدينامو بكيس وتبعد على اد ما تقدر عن البوبينه , وهتاخد نتيجه زي الفل
وده عن تجربه لسا - امبارح الصبح
قولت اجرب اغسل الحوض والمكنه بنفسي , جبت جيركن ميا 5 لتر , وقبل ما املاه ميا حطيت جواه بريل (بتاع غسيل الأطباق والحاجات دي) ومليت الجيركن ميا للأخر , والقصد من الحركه دي ان الميا تختلط مع الصابون بدون ما تعمل رغوه جامده
وبعدها رشيت الـ 5 لتر (ميا + صابون) على الموتور والحوض بشكل عام
وبعدها جبت فرشه زي بتاعت الدهانات , وبدأت افك بيها الشحوم والأوساخ المتراكمه في جوانب الحوض والأماكن اللي صعب اوصل لها بإيدي
وبعدها جبت 5 لتر (ميا + صابون) تاني ورشيتها بقوه شويه على حوض المكنه , وطبعا الـ 5 لتر دي اخدت الشحوم المفكوكه والأوساخ القديمه ونزلت بيها على الأرض
وبدأت انضف الشحوم اللي مكنتش طلعت في اول مره تاني , بالفرشه او بإيدي
وبعدها غسلت الموتور كله بـ 10 لتر ميا , اول 5 لتر بتدفق جاااااامد عشان الصابون ينزل من الحوض ومن على المكنه , وتاني 5 لتر كنت بنزلها على الحوض بروقان عشان كان في مناطق بعملها بإيدي وبالفرشه وبنزل عليها ميا في نفس الوقت ,, زياده نضافه يعني
والمرحله الأخيره , جبت فوطه نضيفه (الفوطه البرتقالي بتاعت العربيات) وبدأت انشف الموتور كله والمناطق المهمه جدا , وبعد ما خلصت المكنه نفسها , بدأت انشف الأجزاء العلويه من الحوض نفسه , زي البطاحات و قربه الميا , وعلبه زيت الباور والفرامل , والماستر والسيرفو وو و و و وو
لغايه لما حسيت ان مفيش نقطه ميا ادام عيني , وان الحوض كله زي الفل
وبعدها استنيت 10 دقايق , ودورت العربيه , ومفيش اي مشكله والحمد لله
ولما اطمنت على الموتور , طلعت بالعربيه وجريت شويه عشان اكيد في ميا متخزنه في اماكن انا مش هعرف اوصلها , فقولت المشي بالعربيه هينطر الميا دي بفعل الحركه والهواء طبعا
وبفكر المره الجايه استعين بـ بخاخه جاز , عشان ارش بيها على الاماكن اللي فيها شحوم تقيله
المفضلات