الموضوع: ليه الحقد؟

انا بقيت في حيرة يعني في مرة الاقي واحدة وهي ماشية تخبط الشنطة بالعربية عادي خالص وتمشي ولا اكنها عملت حاجة.؟؟؟ وواحدة عايزة تعدي والشارع زحمة بس بقول مش مهم واقف واخليها تعدي وياريت تقدر ؟؟؟؟ لأ الاقيها ماشية اكنها ماشية على البحر والاقي اللي ورايا يكلكس ويزعق. ومش بقيت عارف بعد كدا ازعق ولا اسيب الناس تعدي ولا اطنش وامشي علشان فعلا لو الناس دي ركبه العربية وشافت اللي هيا بتعملوا هتقدر.....

أنا مرة فى القاهرة كنت فى مشوار قريب من البيت و كنت راكن العربية و رايح أركبها و قبل 10متر قبل ما أوصل للعربية ألاقى أتنين ماشيين قدامى وواحد فيهم يغير أتجاهه و يمسك مراية العربية "بمنتهى الغل " و يحاول يكسرها و سبحان الله أنى كنت موجود فى اللحظة دى و صرخت فيه و يادوب لحق بس يجيبها للأخر فى ألأتجاه العكسى و ماتكسرتش..جرى و جريت وراه و قلت حرامى و مسكتة و التانى جرى و كان فيه ساعتها مستشفى للشرطة و أتضح أنه مجند و بيشتغل فيها و خرج الظابط المسئول و كان فى منتهى الزوق و بهدل المجند و سألنى أن كان فى تلفيات فى العربية قلتله لأالحمد لله لأنى لحقتة قبل ما يكسرها بس المهم أنه ياخد جزاءة و دة هايكون خير كبير للناس علشان ما يضرش حد تانى لأن يظهرأن دى عادة عندة أنه وهو ماشى فى طريقة يخرب حاجات الناس . و ربنا يكفيكم و يكفينا شر ولاد الحرام.

طبيعي يكون في حقد! الاغلبية العظمي فقيرة و كمان مفيش اي وعي يعني كتير بيتصوروا ان اي حد راكب عربية حرامي! حتي برضة كتير من الي راكبين عربيات بيتصوروا ان اي مليونير حرامي و كمان الدولة بتدعم الحقد طبعا كلنا نعرف الضريبة الترفيهية الي بتتدفع لاو عندك عربيتان بس تعرف ان في الضريبة الاستفزازية الي بتتدفع علي العربيات الغالية اوي

مش كل الناس كدة لازم تراعو ظروف الناس دى اللة اعلم تلاقى فيهم المريض واللى عندة مشاكل الدنيا مش بضرورة حقد لازم نراعى ظروف الناس ومش كل واحد فينا اتولد راكب عربية واكيد والدك او خالك او عمك مش عندهم عربية فى وقت من الاوقت ربنا يكرم الناس كلها

انا خلاص قرفت من البشر اللي بيعدو الشارع
يعني مش عامل حساب اني عملت انتظار ووقفتلوا ووقفت الشارع وبعدي سيادته وهو ماشي بيتمختر ويمكن يشتم كمان!!
طيب اعملهم ايه اكتر من كده؟؟ والغريب انهم بيبصولي بصه احتقار كأني سرقت بنك واشتريت العربيه
العربيه عليها مش اقل من 20 توقيع (ميدو والبرنس والشبح والوحش و....) والعلامه مسروقه والكبوت في مفك غرز فيه وواخد خط بالعرض ييجي 20 سم والازاز واخدله طوبتين والاكصدام كان فيه حته متقشره من خبطه لقيت واحد كمل عليه وقشرلي نص الاكصدام !!!
كل ده لا يدل غير على الحقد وعلى بداية النهايه !!

مفيش غير عبارة واحدة
حسبي الله ونعم الوكيل فيهم

المشكلة عندنا عدم ايمان
والرضا بقضاء الله والقناعة
كل واحد مش راضى بحاله