الموضوع: معلومات جديدة فى منتهى الأهمية يجب أن يعلمها كل وحوش الميجان..!!!

يا جماعة حابب النهارده أشاركم بمعلومات مهمة جدا لمالكى الميجان قد يكونوا جداد لبعض الناس.

المعلومة الأولى
و هى كيفية تشغيل السنتر لوك ليغلق أتوماتيكيا عندما تصل سرعة السيارة 10 كم فى الساعة

و ذلك عن طريق الضغط المتصل لمدة خمس ثوانى على زر السنتر لوك اللى جنب الإنتظار و السيارة دايره حتى سماع صفارة تنبه مرتين متتاليتين ...طبعا لإلغاء الخاصية إضغط لمدة خمس ثوانى مرة أخرى برده و السياره دايره و ساعتها حضرتك اللى هتقفل و تفتح السنتر مانيوال بضغطك على الزر مرة للفتح و مرة للقفل.

المعلومة الثانية
و هى كيفية غلق السيارة كليا بدون إستخدام الكارت.

و السيارة مطفية و باب السواق مفتوح إضعط على زر السنتر لمدة فوق الخمس ثوانى ثم أغلق باب السواق سوف يتم غلق السيارة كليا و كل الأشياء المفتوحة فيها و لا تستطيع فتحها مرة أخرى إلا بإستخدام الكارت.

المعلومة الثالثة
و هى كيفيةإلغاء بعض وظائف الكارت- جعل الكارت يعمل فى(restricted mode).... رائع للميكانيكى و سايس الجراج.

يجب أن يكون معك الكارتين واحد فى مكانه فى العربية و التانى فى إيدك ...إضغط على زر القفل و زر الشنطة فى الكارت اللى فى إيدك مع بعض فى نفس الوقت هتلاقى العربية كلها سوجرت و بعدين باب السواق مبقاش مسوجر.

كده الكارت اللى فى إيدك لو إديته للسايس أو الميكانيكى مش هيلاقى حاجة شغالة غير موتور العربية و باب السواق هما دول اللى الكارت بيشغلهم أما باقى الأبوب و الشنطة مش هيقدر الكارت يفتحهم.

أول ما حضرتك تحط الكارت التانى اللى معاك و تشغل العربية...الخاصية دى بتروح و يجب إعادة تشغيلها مرة أخرى لو حابب.

المعلومة الرابعة
ماذا تفعل لو الفتيس الأتوماتيك علق ال p و مش راضى يطلع من مكانه؟؟؟؟

المفروض لما ندوس فرامل و نضغط على زر الفتيس نقدر نحركه من الوضعيه p إلى أى وضعيه أخرى....لكن لو عملت كده و مرضاش يتحرك ماذا سيكون الحل؟...هل تجيب ونش يسحب العربية طبعا ما ينفعش لأنها أصبحت معشقة و لن تتحرك.... و لا تكلم التوكيل علشان متبوظش الجير بوكس؟؟؟!!!

يوجد حل أسهل و هو منصوص عليه فى الكتالوج لكن أعتقد فيه كتير ما يعرفهوش لأن فيه مهندس فى مركز الخدمة مكنش عارفه...

الحل ببساطة هو إنك تشيل الcover الرمادى بتاع الفتيس اللى مكتوب عليه p,R,....و تحتيه عند أسفل دراع الفتيس هتلاقى مفصلة إضغط عليها و على زر الفتيس مع بعض فى نفس الوقت هتلاقى الفتيس إتحرك معاك و بكده تقدر تجيبه على الوضعية n و تتصرف بحرية أكتر يعنى تزق العربية أو حد يقطرك أو أى شىء.

أتمنى أكون قدرت أفيدكم بأى شىء جديد أو مفيد.