الموضوع: فين الميجان الهاتش باك ؟؟؟

انا مش شايف حد بيتكلم عليها فى المنتدى خالص؟؟

هل نزلت مصر؟؟؟ و اسعارها إيه ؟؟؟

المشاركة الأصلية كتبت بواسطة wawoo

انا الحقيقية مش عارف حجم التوفير الواضح اللى انت تقصدة دة ..انا شوفت الميجان القديمة ...و الميجان الجديدة متفوقة فى كل حاجة .على مستوى التصميم و على مستوى الموتور "موتور جديد " و فتيس جديد و شكل رياضى .

Ooops.....دى تانى مرةنختلف بشأن نفس الموضوع على ما أتذكر....لذا أنا هأنتهز فرصة عيد العمال و أستفيض فى شرح وجهة نظرى...
إيه هى نقط تفوق الميجان III من ناحية التصميم ؟؟....سواءا من الخارج أو الداخل ؟؟؟
أنا هألفت نظرك لبعض التفاصيل الصغيرة التى تعكس درجة الاهتمام بالتصميم



شوف ال Layout بتاع أزرار التكييف ....
لاحظ وجود الجزء الدائرى الغائر بالزر لكى يمكنك أن تجد الزر بلمسة إصبع دون الحاجة للنظر خصوصا بعد فترة من الاستعمال و التعود

قارن مع الميجان 3 ....


ال Layout عبارة عن أزرار مرصوصة متجاورة و ليست مقسمة إلى 3 مناطق حسب الوظيفة كما فى السابق...مما يصعب التعود على أماكن الأزرار
التحكم فى توجيه تيار الهواء عن طريق زر واحد فقط....


أوعى تقول لى إن شكل الفتيس الجديد ده و لا ذراع فرامل اليد أكثر تطورا و لا تميزا من السابق له





مع تحفظى على تداخل الرسومات فى بعضها إلا إن ياريت ده إللى بينزل مصر



لكن شوف التقسيمة المريحة و الجميلة فى نفس الوقت






أنا مكسوف أحط صورة أزرار تحريك المرايا الجانبية..ممكن إللى ما يعرفش يفتكر بتوع الميجان 3 هما بتوع الميجان 2 ...لإن مستحيل بأى شكل أتخيل إن ال Knob تحولت إلى أزرار ..!!
و ده شكل ال Knob



ممكن لو عايز ترجع للمواضيع التالية....

http://www.nilemotors.net/Nile/97921...e-history.html

ســـر حب مالكى الميــــجان لهـذه السيــارة (ســــر حــب مالكـــــي الميجـــــان لهذة السيـــــارة)

لو قعدنا نتكلم عن كمية البلاستيك الغير معتادة فى الأبواب و ما إلى ذلك مش هنوصل لحل لإن لازم تكون العربيتين قدامنا علشان نحس سوا بالفرق فى مستوى الخامات

المشاركة الأصلية كتبت بواسطة wawoo

بلد المنشاء مش حتفرق فى حاجة غير بعض التجهيزات اللى مش متوفرة عشان يكون سعر العربية مناسب شوية ..انما مستوى الخامات و التقفيل هوة هوة نفس مستوى الميجان اللى خارجة من المصانع الفرنسية و الاسبانية ..
و معدلة اكتر كمان لخدمة الطرق الصعبة فى الدول النامية فى مستوى تركيا و مصر .

موضوع تركى و فرنسى ده أنا سبق و أوضحت إن الفروق طفيفة جدا و لن يحس بها غير واحد طلع من دى و دخل فى التانية و له عين خبيرة كمان...يعنى لا يوجد فروق....
كل اعتراضى على إن النسخ الحالية واضح عليها التوفير....
سواءا حضرتك اتفقت معى أم لا....الميجان من أول 2008 و هى تخضع لمثل هذه الإجراءات التوفيرية...زى غطاء الموتور و بطانة الشنطة و كلمة رينو على الشنطة و الأنوار البيضاء فى الأبواب و لأول مرة أشوف ميجان بدون أنوار ضباب أمامية...وهكذا

المشاركة الأصلية كتبت بواسطة wawoo

اعتقد ان رينو مش حتهزر فى اهم موديل عندها و تضحى بتاريخ الميجان عشان توفر فى شوية خامات او فى مستوى جودة مختلف ...
العربية تصميم فى مراكز رينو و تصنيع بضمان رينو و الميجان هى اللى بتقود الراية فى المقدمة بالنسبة لمودلات رينو الاكثر نجاحا فى تاريخها

و لعلمك رينو بتخطط لتوسيع انتجها فى تركيا و تصنيع المزيد من مودلات رينو التى كانت حكرا على المصانع الفرنسية و فى اتجاه لغلق مصانعها فى اسبانيا لان مستوى الجودة متساوى مع عمالة اقتصادية اكثر .

انا مش عارف اية الوهم المطلوب فى عربية عائلية متوسطة الحجم ...التصميم جميل جدا ويناسف كتير من مودلات 2010 فى شركات اخرى كتير بنجاح .

أقل واجب...العربية مستوى الإبهار فيها ما يقلش عن سابقتها
احنا مش بنقول إنها كخة و وحشة أو ما تستاهلش الفلوس
أبدا...
كل ما فى الأمر إنها ليست مبهرة كسابقتها...مما جعل المسافة التى كانت الميجان II تسبق بها منافستها أكبر بكتير من المسافة بين الميجان III و الأخريات ...

المشاركة الأصلية كتبت بواسطة wawoo

و الفيات برافو اللى بتتكلم عنها دى فشلت فى مصر و لو ارى منها فى الشارع و لا عربية منزو تطرحها فى مصر من ثلاث سنوات .

إنت بس إللى مش منتبه لها أو مش معجب بها أو جايز من أنصار العربيات السيدان مش الهاتشباك...
لكن أؤكد لك إن البرافو فى الوقت الراهن على الأقل متفردة على عرش مبيعات السيارات الهاتشباك فى الفئة دى مقارنة بالليون و الأسترا و الفوكس و ال C4

المشاركة الأصلية كتبت بواسطة wawoo

و اعتقد نجاح النسخة السيدان انعكس بالتاكيد على الهاتش باك ..و بما ان الاثنين نفس التجيهيزات الميكانيكية و معظم الكماليات ..بالتاكيد فرص النجاح حتكون متساوية للاتنين .

تفتكر فى كام عربية سيدان ميجان II اتباعت و كام عربية هاتشباك اتباعت ؟؟؟
موضوع النجاح مالوش علاقة بالسيدان و الهاتشباك و ال estate ....
مش هايحصل إن واحد رايح يشترى عربية estate هيغير رأيه علشان شاف واحدة convertible و عجبته

إللى بيدور...بيدور على مواصفات....

المشاركة الأصلية كتبت بواسطة wawoo

و روح اتاكد بنفسك و جرب تحجز ميجان و شوف حتستلم امتى و قوائم انتظار اد اية ..و دى اعتقد مؤشرات لنجاح جديد متوقع ...

التوكيل بيبيع أكتر من ثلثين العربيات إللى بيستوردها للموزعين و المعارض...و يبقى ال ثلث فقط بيبيعه بشكل مباشر للأفراد....
إللى ناوى يدفع كاش...عادة بيروح للتوكيل علشان أضمن و أريح...
فى حالة عربية جديدة فى السوق ..دايما بيبقى فيه حجوزات و انتظار و كلام من ده...

عايزها دلوقتى ادفع لك بقى 5 و لا 10 آلاف ( حسب العربية ) زيادة عن سعرها الرسمى و هاتها من معرض و لا موزع

ثم إن وجود قوائم انتظار...لا تعنى تفرد و تمييز أو ازدياد الطلب على العربية...
مرسيدس فى عز الأزمة كانت برضه بتخزن العربيات فى المصنع و مش بتطرحها للبيع و بتصر على وجود فترة ال 6 الشهور لحين الاستلام.....بالرغم من ضعف و هزالة الطلب ....دى سياسة بتنتهجها الشركات للمحافظة على سعر العربية بتاعتها فى السوق...علشان مش أشترى النهاردة ب 100 ألف و بعدها بكام أسبوع ألاقيهم عاملين تخفيضات و لا معرض ما حارق سعرها بكام ألف جنيه....

و على كل أنا موافق تماما على إن الفلوانس هتبيع كويس....لإنها نازلة بفكر يتناسب مع عقلية المستهلك و بنقاط قوة مفهومة....
زى إن سمعة التوكيل الآن أوسع و خصوصا مع تردى الأوضاع عند ناس تانية زى غبور و منصور و غيرهم كتير
الكماليات إللى فيها منتشرة فى عربيات كتير و الناس مطمئنة من الانتشار....
و الله العظيم أنا أعرف ناس ما اشترتش ميجان علشان الكارت بس مش أكتر من كده....
قطع غيار الميجان II خارج التوكيل و انتشار اللوجان أدى إلى استيراد قطع لرينو عموما أكتر بكتير من الأول ...
تصميم العربية على بعضها أقل جرأة و معتاد و مألوف أكتر و مقبول أكتر...بعكس الميجان II إللى شكلها كان مثير للجدل....فناس عددها أقل كانت بتغامر

مبروك لوحوش الفلوانس عربية فعلا حلال فيها الفلوس...بس أنا راجل راكب ميجان II ...و دى عربية ثورية فعلا...علشان كده كنت منتظر أفضل من كده بكتير من الفلوانس....لكن ده لا يعنى إنها أقل من المتوقع من الجمهور....بل إنها معادلة متزنة كسعر مقابل العربية

أرجو القبول مع فائق التحيات و الاحترام