السلام عليكم و رحمة الله و بركاتة
الى احلى اعضاء فى احلى منتدى
تم بحمد الله امس استلام الفلوينس موديل 2010 الفئة Dynamic 135000 اللون رمادى غامق
اللهم إني أسألك من خيرها وخير ما جبلتها عليه،
وأعوذ بك من شرها وشر ما جبلتها عليه
انطباعى الاولى
العربية بسم الله ما شاء الله تساوى كل جنية ادفع فيها واسعة, عالية, فخمة, هادية, ناعمة, قوية
علشان محدش يحس ان انا ببالغ مش حتكلم انهاردة عن تفاصيل خاصة بالعربية اكثر من كدة مع انى امبارح سوقتها من التوكيل فى العبور حتى مدينة نصر (زيارة سريعة) و من مدينة نصر حتى البيت فى المهندسين لكن انا بقول انطباع اولى مع الوضع فى الاعتبار ان بعد المساهمة المميزة للاخ WAL فى موضوع تجربتى مع الفلوينس ححاول مقولش كلام مكرر
اولا ان خدت العربية اول ما استلمتها على اقرب محطة بنزين لانهم فى التوكيل يادوب حاطين اثنين ثلاثة لتر المهم فولتها بنزين 95 خدت حوالى 53 لتر ب 145 جنية
اول ما اتحركت بيها فعلا كان عندى احساس بسيط بتقل العربية لكن انا حابب اؤكد لكم ان بعد ما مشيت بيها شوية الاحساس دة ابتدى يختفى هو انا طبعا ما حاولتش اجرى او اقرص لان فى التوكيل قالولى ان ال RBM اول 1500 كيلو يفضل انة ميعلاش عن 3.5 لكن التكييف ممكن اشغلة بصراحة شغلتة شوية علشان اطمن على انة شغال و لقيت تبريدة جيد جدا و برضة قلبى ماطاوعنيش اسيبة شغال المسافة الطويلة دى(من مدينة نصر للمهندسين) خصوصا ان كوبرى اكتوبر كان زحمة قوى
التحكم فى العربية فوق الممتاز من ناحية الباور فى الدركسيون و دة نفعنى قوى لما وصلت عند البيت مع انى للاسف اكتشفت ان ابعاد العربية اكبر بكتير من المكان بتاعى اللى بركن فية فى الجراش لدرجة انى فضلت ساعة جوة الجراش بحاول اركن فى اماكن متعددة لكن للاسف فشلت بس انا كنت مربط مع جراش تانى لانى كنت عامل حسابى برضة على حاجة زى كدة عرفت اركن فية بسهولة بالرغم من انة كان مليان عربيات و يادوبك المكان اللى السايس وفرة ليا كفا العربية
المهم انا فتحت الموضوع دة لانشاء الرابطة الخاصة بحائزى الفلوينس و اللى اتمنى ان كل واحد من الاخوة الاعضاء الاعزاء استلم العربية ينضم لينا و يشارك معانا يعرفنا بعربيتة علشان يساهم فى التعريف بالعربية بمميزاتها و بعيوبها من حيث استعمالة الفعلى للعربية فى الظروف المختلفة
ان شاء الله انتظرونى فى مشاركات اخرى فى الموضوع دة احكيلكم على العربية بس ادعولى انى ارخص فى اقرب فرصة لان الورق بتاع العربية شكلة كدة مش حيخلص قبل يوم السبت او الاحد و طبعا مش حقدر امش بها لغاية ما ارخص ان شاء الله لكن طبعا ان جاهز لاى استفسار فى حدود المرحلة دى