الموضوع: رابطة حائزى الفلوينس

السلام عليكم و رحمة الله و بركاتة
كنت قمت بتجربة لتسارع العربية و ثباتها شاركت بيها فى موضوع لاحد الاخوة كان بيسأل عن نوع التعليق للفلوينس و حبيت انى اعيد نسخها هنا فى الرابطة علشان تبقى مرجع لأى حد عندة استفسار او محتاج توضيح للنقطتين دول (التسارع و الثبات)
تمنياتى بالتوفيق للجميع

السلام عليكم و رحمة الله و بركاتة
اولا انا حابب اقول انى مش حاضيف حاجة زيادة على اللى اتقال خصوصا كلام الاخوة WAWOO و Elsarrawy لأن كلامهم مظبوط و مطابق تماما للى كنت حقولة
المهم ان انا شايف ان فية ناس كتير فى المنتدى شاغلين بالهم بموضوع التعليق و نوعة مع انى شايف ان اللى يهمنى فى العربية ثباتها و امانها بغض النظر عن نوع التعليق او اذا كان طراز قديم او جديد و Elsarrawy كفى ووفى فى شرحة للنقطة دى
انا لما قريت الموضوع دة فى الشغل افتكرتة و انا راجع من الشغل على الدائرى فقررت انى اعمل حاجة مجنونة ارجع بيها لأيام الشقاوة ايام زمان لما كان سنى فى اوائل العشرينات
قرصت على العربية لغاية سرعة 150 او 160 مع ان الدائرى مكانش فاضى نسبيا لكن فضلت اجرى و اخد غرز بين العربيات و استنضف عربية و احاول استفز صاحبها علشان يشد معايا لغاية ما لقيت BMW 316 استجاب لى لما جيت وراة بالظبط و دخلت علية بسرعتى مع شوية ترعيش للنور العالى فى وشة ولما وسعلى و عديت منة لقيتة ابتدى يجرى ورايا و انا عمال اخد غرز على 120 او 130 و اول ما الطريق يفتح شوية اقرص و هوا ورايا مش عارف يجيبنى بسبب الغرز اللى باخدها على الضيق و بسرعتي وفى وسط دة كلة لقيت اوكتافيا ابتدى يجرى معانا و انا زى منا غرز و قرص وهما مش قادرين يجيبونى لغاية مادخلت تفريعة يمين فى الدائرى الحمد الله انهم ما دخلوش ورايا علشان الموضوع مايسخنش اكتر من كدة
المهم ان النتيجة من التجربة اللى انا بصراحة بالرغم من انها رفعت الادرينالين عندى و خلتنى حسيت بالحيوية بتاعة زمان الا انى فى اشد الندم انى عملتها لان لاقدر الله اي خطأ او واحد سواق نقل بمقطورة من اللى كنت بعدى من وسطهم زى الطلقة مال عليا كانت النتيجة حتبقى مريعة
العربية ما شاء الله ولا حول ولا قوة الا بالله فى منتهى منتهى الثبات لدرجة انها ماحسستنيش باى خطر سواء فى ملف واخدة على سرعة او غرزة ضيقة على 130 و لا الطريق يادوب يفتح سنة ابقى على 150 او 160 مع الوضع فى الاعتبار ان الدائرى مليان مطبات و فلنكات حديد بارزة لكن الحمد الله ثبات و استجابة للجرى ممتازة
لما وصلت البيت فكرت لية بقى الناس مهتمة قوى بنوع التعليق مش الاهم الثبات و قوة التحمل و الامان و دة موجود يبقى التعليق بقى مالتى لينك ولا تورشن بيم مش فارقة معايا
و بعدين اللى انا عملتة دة عين الجنون يعنى مش حاجة طبيعية ان الناس تعمل كدة فى بعضيها
استغفر الله و الحمد الله انى وصلت بالسلامة و اتمنى من كل قلبى ان ماحدش يعمل اللى انا عملتة دة تحت اي سبب من الاسباب لانك مش بتعرض نفسك فقط للخطر لكن بتعرض ناس ابرياء حواليك للأذى و علشان اية تثبت انك احسن سواق ولا عربيتك احسن عربية فى العالم لا حول ولا قوة الا بالله

الباور الكهرباء حساس جدا و بيدى سلاسة و سهولة رهيبة و كمان بيديك تحكم كامل فى العربية اثناء المناورات
بالنسبة للمود اللى انا كنت ماشى علية حصل حاجة غريبة ما كنتش قاصدها بس اثبتتلى ذكاء واضع السوفتوير بتاع الفتيس
كنت ماشى على الاتوماتيك و لما ابتديت اقرص ال ار بي ام نقل عند 5.5 تقريبا للرابع و انا على سرعة 130 تقريبا لانى حسيت ان الموتور هدى و العزم قل نسبيا فقررت انقل الفتيس على المانيوال علشان اقرص اكتر شوية على التالت فاللى حصل ان اول ما نقلت للمانيوال و من غير ما ابص على الشاشة رجعت دراع الفتيس للخلف علشان ارجع للتالت فوجئت ان الشاشة مكتوب عليها التانى و عمال يعمل فلاش فهمت انى بمجرد ما غيرت للمانيوال الفتيس فهم انى عايز اقرص على الغيار علشان كدة قام راجع للغيار التالت لوحدة و لما انا ما اخدتش بالى من اللى حصل دة بسبب تركيزى على الطريق و رجعت الفتيس بايدى يعنى كأنى كنت عايز ارجع للتانى و انا ماشى على 130 العربية رفضت انها تغير للتانى علشان ما تأذيش الفتيس او الموتور و فضلت تدينى رقم 2 بيعمل فلاش علشان تنبهنى لغاية ما نقلت الدراع للتالت تانى و ابتدت تدينى العزم اللى انا عايزة
ربنا يسترها معانا كلنا ان شاء الله
اسف على الاطالة
تمنياتى بالتوفيق و الامان للجميع ان شاء الله