الموضوع: رابطة حائزى الفلوينس

السلام عليكم جميعا و شكرا للجميع على المعلومات القيمه التى شجعتنى على العوده الى الوحش الفرنسى الوسيم رينو بعد تجربتى السابقه الرائعه مع ميجان ٢ ،،. فلوانس الشكل اجديد اثارت اعجابى بشركه رينو حيث تم تعديل كل ما كان يشكو منه الاعضاء من عيوب بسيطه،، الفتيس اصبح cvt و القدره زادت الى ١١٥ حصان و بالتالى تحسن التسارع من الاول بدرجه ملحوظه و لا يوجد اى مشاكل مع عوامه البنزين ولا المؤشر الذى اصبح ديجيتال و هناك ٩ سماعات و التكييف رائع بكومبريسسور يابانى و تم تغيير جلد الطاره و استهلاك البنزين معقول جدا اما عن العفشه وباقى المزايا فلا حاجه للاشاده بها فهى معروفه ، طبعا العزل و النعومه فى المطبات و علو السياره عن الارض غنى عن التعليق ،، اما عن سعه خزان البنزين ٦٠ لتر فهى ليست جديده لكن عند مقارنتها بالالنترا مثلا ٤١ لتر نعرف قيمه هذه السياره فى السفر فى ظروف بلدنا الحاليه ،،،. اما عن العيوب فلم اواجهها بعد و هى الحاجه للتوكيل فى اى اصلاح و قد تكون ميزه لعدم العبث بالسياره اذا عدل التوكيل من اسعار الاصلاح و هذا ما اتوقعه او اتمناه مع الانتشار الكبير لسيارات رينو بمصر و هذا ايضا ما قد يعالج العيب الثانى و هو سعر اعاده البيع ،،،. ملاحظه ،، تسارع السياره يتحسن بعد التليين و يفرق معها جدا استعمال بنزين ٩٥ حيث يختفى تماما التتنيح بين الاول و التانى و الحاجه للضغط بشده على البنزين حتى لا تبدوا لمن خلفك كأنك مبتدئ فى القياده،، فالعيب عيب بنزين و ليس موتور ،، اضفت مره نص التانك ٩٥ على النص ٩٢ وكان هذا الفرق المذكوروهذا ما يفسر عدم الشكوى من تسارع الميجان ٢فى السعوديه مهما حملت فيها من بشر و حقائب لان البنزىن ٩٥ ،،،،،، اما عن ملاحظتى على السياره فهى رغم ان التكييف رائع الا ان يعيب السوفت وير فى نظرى شيئين الاول ان كل مره تشغله لازم تفتكر تدوس زرار الريسيكلينج تانى لى عايز الهواء داخل السياره يدور و لا يدخل هواء جديد يعنى لو نسيت فى تراب بلدنا الفلتر هيتسد بسرعه و الاوتوماتيك ما بيحسش اوى بالهوا انه زى الزفت و ينقل لوحده ،،الحاجه التانيه انك لو قفلت السياره قبل التكييف لازم هيشتغل اول ما تشغل السياره و ده غلط ،، وزى ما حضراتكم شايفين هى زى حكايه عوامه البنزين عيوب مش فى السياره لكن فى البيئه اللى بتمشى فيها ،، عذرا للاطاله وهذا تقييمى بعد ٢٥٠٠ كيلو و شكرا

حوار الريسيكل بتاع التكيف دة بيتعمل كدة اوتوماتك و في الميجان 2 نفس الكلام و دة علشان ميسبش الهوا جوة التكيف و يطلع ريحة وحشة لما تشغل التكيف و دة في عربيات تانية كمان بالذات التكيف التاتش

لا شكر على واجب وانا ساعدنى المنتدى كثيرا فى اتخاذ قرارى بشراء الفلوانس بمصر رغم سفرى خارج مصر ،، عموما المقارنه لا تجوز لان ميجان ٢ لدى كانت مانيوال لخوفى من موضوع النتشه الشهير ،، كما ان تعليمات الوكيل فى السعوديه كانت استخدام بنزين ٩٥فلم اجرب غيره لكن قدره السياره كما ذكرت حتى مع اقصى تحميل و فى مرتفعات و جو حار كانت ممتازه ،، اما موضوع التتنيحه دى لما تقف مثلا او تكون على الاول فى ميدان مثلا وعايز تسارع بتلاقى كما ذكرت عضوه فى المنتدى سابقا كان العربيه حاجه كانت مكتفاها و فكت مره واحده يعنى لازم تدوس بنزين جامد و يعلى صوت الموتور علشان تتحرك بسرعه ،، و الغريب ان ده مابيحصلش فى السرعات العاليه و احد الاعضاء فسر ده بان كل الاوروبى كده لحمايه المشاه ،،لكن عند اضافه بنزين ٩٥ ل ٩٢ النص بالنص. كان الاستجابه مختلفه تماما و كانت السياره خفيفه و تسارعها ممتاز فى جميع الاحوال كما كانت الميجان المانيوال ببنزين ٩٥ ،اللى جيبت بيها سرعه ١٩٥،. اما موضوع الريسايكلينج فانا ذكرت ان الاوتوماتيك مفروض يغيره حسب تلوث الجو لكن فعليا كان الجو تراب جدا و لم يتغير ،، اعلم ما هو مكتوب فى المانيوال بخصوص تجدد الهواء و الرائحه الوحشه مع الريسايكلينج لكن ده مبالغ فيه و جو مصر غير جو فرنسا او تركيا و مش هنغير فلتر تكييف كل كام شهر،، الميجان و الفلوانس واحد فى متعه القياده مع ميزه قله الشكوى من العيوب فى الفلوانس و كمبريسور التكييف اليابانى و الفتيس cvt فى الفيس ليفت ،، الدهان كمان كويس بالتجربه سواء فى الفلونس او الميجان ولم يتاثر بخبطه حديثه من الخلف كما ان دهان الميجان كان ثابت و طلعت من فوقه دهان يوكن حكت فيها ،، العزل ممتاز كالميجان وناعمه فى المطبات رغم العفشه القويه الشنطه كبيره جدا و بالتالى هى سياره سفر لا تنازع ،،لكن يبقى اسعار الاصلاح و سعر اعاده البيع فقياسها على الميجان غير عادله لان الشركه استفادت من اخطاءها لكن يبقى الحكم فيها للزمن

نقلات الفتيس السى ڤى تى كانها عدد لا نهائى من النقلات عن طريق سلسله او جنزير يربط التروس. المهم هو يوفر فى البنزين و يعطى سلاسه فى النقلات و بالتالى تختفى مشكله النتشه نهائيا ،، و الجير فى الفيس ليفت x tronic وحضرتك على D تحرك الفتيس للشمال و تحركه للامام تعلى نقله و للخلف تنزل نقله يعنى مانيوال بدون دبرياش ،،،، و ثبات السياره جيد جدا لكن لا استطيع المقارنه مع الميجان لاختلاف حاله الطرق فى السعوديه التى كانت تساعد على التجربه على سرعات عاليه بينما فى مصر تركيزى على تفادى الحفر و البلاعات و المطبات المخفيه فى الطرق السريعه ،، عموما لو سيادتك عندك اى استفسار انا فى الخدمه،،،