اقتباس المشاركة الأصلية كتبت بواسطة M. Hassan مشاهدة المشاركة
الله يبارك فيك. ربنا يديك انت كمان خيرها ويكفيك شرها.
بالنسبة لانطباعي:
- للأسف، انا استلمت مع ايقاف التنفيذ لأني لسه مرخصتش عشان الإفراج الجمركي لسه موصلش المرور
- أنا سوقت العربية مسافة بسيطة (3-4 كيلو تقريبا). بشكل عام، كويسة. بس لسه هقدر أحكم أكثر لما أسوقها أكتر وعلى طريق سريع
- لسه مجربتش حاجة من جوه (كنت مطحون شغل ومش فاضي أقعد فيها حتى شوية

إن شاء الله هقول رأيي أول ما أكونه عنها. لكن الانطباع الأولي مش وحش

أخيراً، بما إنها واقفة بقالها كام يوم، نزلت النهاردة الصبح لقيت الباب اللي ورا فيه خدش محترم بمفتاح تقريبا :( . ربنا يجعها آخر الأحزان :)

حد يعرف أجيب غطا واكسسوارات عموما منين في الدقي؟

تحياتي
سلام عليكم

حبيت أقول انطباعاتي زي ما وعدت.
بصراحة، انا كان معايا اوكتافيا 2015 واضطريت أبيعها. عشان كدا كنت بحاول أقنع نفسي بالفلوانس.
وبصراحة برده، لحد دلوقتي، العربية كل يوم بتقنعني بنفسها عن اليوم اللي قبله. أنا طبعاً لسه مسوقتهاش كتير - يدوب 250 كيلو تقريبا. ولكن ملاحظاتي بشكل عام:

المميزات:
- العربية ماشاء الله عالية (Ground Clearance) رغم إن الكتالوج بيقول أنها أوطى من مثيلاتها. أنا فشختها حمولة الأسبوع دا (ركاب وشنط ورا) ومشيت على نفس الطريق ونفس المطبات اللي كانت بتحف فيها الكيا سيراتو وغيرها، لكن الفلوانس الحمد لله محفتش
- لسه مش قادر أحكم على السحب عشان التليين مش مخليني عارف أقرص عليها. بس حتى مع كدا، العربية كويسة وبتشد (بالمناسبة حد يعرف التليين كام كيلو؟ أول 1000 ولا أكتر؟ وأول صيانة بعد كام كيلو؟ 1000 ولا 5000؟)
- العربية ثابتة ومش بتعوم في الأماكن التعبانة اللي في الرصيف (اللي النقل بيكون مبوظها) على سرعات عالية
- كفاءة استخدام الوقود كويسة (مقارنة باللي كنت بسوقه قبل كدا)

العيوب:
- مش عارف دا حظي، ولا الكاوتش هو اللي كدا، بس دايماً بيلقط ظلط وبيزعجني :)
- استخدام البلوتوث والراديو كان ممكن يكون أذكى من كدا (بصراحة غبي، لأن التحكم فيه مختلط بين الزراير اللي ورا الدركسيون والبكرة اللي في الكاسيت - المفروض يبقى كله في الدريكسيون(
- الفرامل بتعمل صوت صفير. مش عارف دا سببه ايه، بس المفروض إن الجديد مبيعملش كدا، ولا ايه؟
- في أماكن منفخة في العربية بدون داعي (زي الرفارف - كان ممكن تتلم شوية بدل ما هي معرضة العربية زيادة)

أتمنى ربنا يسترها ويحفظها وتكمل بدون مشاكل. أدعولي
-