الموضوع: مميزات وعيوب الماروتى بالتفصيل

انا قريت الموضوع من اولة بصراحة موضوع اكثر من رائع ومفيد جدا وانا نويت اشترى عربية ماروتى خلاص بس فية ناس نصحتنى وقالتلى متشتريش اليومين دول لان الاسعار هتنزل جامد استنى اول شهرين فى السنة الجديدة وهتجيب العربية ارخص بكتير. يا ترى الكلام دة صح واية حكاية نزول الاسعار دى؟

ربنا يكرمني انا وانتي يا m7nsh باشا عشان بردو الحاله عندي مأشفره علي الاخر وانا بصراحه عايز اعمل واجب مع العربيه لانها موجبه معايا بقالها سنين وانا منفضلها ههههههههههههههههه

هههههههه حبيبى ,, انت كمان ؟؟

وربنا المحفظه مافيهاش غير 30 جند دلوقتى وشويه فكه !!

بس ربك بيسترها والله ! الحمد لللله ماشيين على فيض الكريم

بس انت عاوز تظبطها اكسسوارات و كده ولا تظبيط ميكانيكا ؟ واهو لو فى اقتراحات نتناقش فيها سوا لأنى عاوز اظبطها على خفيف برده

بالمناسبه ,, اسمك ايه بقى ؟ و بتدرس ولا مخلص ؟ :)

********

استاذ خالد ,, لوانت بره مصر كنت قلتلك استنى كل حاجه هترخص ,, انما فى بلدنا الموقر مفيش حاجه للأسف بترخص الا نادرا ! انا عن نفسى و ناس كتير كمان متوقعه 100 % ان الأزمه الأقتصاديه اللى حاصله دى اكيد هترمى بلاها على كل حاجه ,, وبالتبعيه انخفاض الأسعار ,, بس ده هيحصل امتى بقى ؟؟ الله اعلم لكن هيحصل كده كده لا محاله

يعنى من الأخر , تعمل ايه ؟ عن نفسى مستنتش وجبت العربيه لأنى كنت محتاجها جدا وده كان من شهر وشويه ,, فانت و احتياجك ولو مش مزنوق فيها اوى الفتره دى فاصبر شويه فعلا للسنه الجديده و شوف اللى هيحصل ,, انت مش خسران حاجه ,, و طبعا كده كده صلى استخاره و تابع و اسال كتير ,, وان شاء الله ربنا يوفقك للأختيار السليم

ولو رسى العطا ع ( القرموطى ) حبيبه الملايين وربنا كرمك بيها متبقاش تنسى تقولنا عشان نباركلك D;

الف شكر على اهتمامك يا استاذ m7nsh وان شاء الله اول ما اجيب العربية هديلكوا خبر

انا اسمي حسام علي فكره انا بعشق حاجه اسمها ماروتي وكنت عايز اظبطها من كل حاجه اصل بابا خبطها وبتاع فعايز ادهنها واجيب لها استيكرات واسبويلر واجيبلها الفوانيس بتاعت الماروتي الجديده بس الفلوس انت عارف بقي فأنا بعملها شويه بشويه كده علي حسب الفلوس يعني انت بقي اسمك ايه ولو عندك ايميل علي الياهوو قوله عشان نتكلم اسرع

علي فكره يا جماعه من المتوقع ان العربيات الصغيره اللي هي السي سي بتاعها قليل تغلي عشان البنزين وعشان الترخيص وانا بصراحه من سنه 2001 من ساعه ما عرفت ان في عربيه اسمها ماروتي وهي بتغلي كانت ساعتها ب 23000 بقت دلوقتي ب 38000 فكده كده معتقدش ان الموضوع بتاع الاسعار وكده هيتحل الفتره دي فأنا من رايي تستني لحد اول السنه يناير او فبراير بالكتير 2009 و تشتري الماروتي

أخوانى
أحب أن أخبركم أن السيارة الماروتى المحروسة المملوكة لزوجتى قد أتمت الخمسين ألف كيلو فى غضون سنة ونصف من يوم شراءها وهى موديل 2007
لم يتم تغيير أى شىء فيها سوى بوجيهات - ابلاتين كندنسر زيت - فلتر زيت سير كاتينة - سير دينامو - فلتر هواء - فلتر بنزين
يعنى باختصار حاجات عادية جدا فى اى عربية
على فكرة ما شاء الله يعنى الاستبن لسة ما لمسش الأرض وأصلا انا مش عارف بيتفك ازاى من مكانه ورا فى الشنط
باختصار العربية دى عسولة وقوية جدا
الخمسين الف دول منهم يجى 20 مشوار مطروح و 4 الغردقة و2 الواحات ومرة وادى الحيتان و5 مرات شرم وجنوب سيناء ويجى مية مرة اسكندرية
مبروك على اللى عنده ماروتى بالعربية دى
ادعولى تفضل كده على طول
سلام

بنا يباركلك فيها و تفضل ميه ميه معاك على طول بس بالمناسبه غيرت سير كاتينه على كام كيلو و بكام