مميزات وعيوب الماروتى بالتفصيل

**sab3aawy** · 05-02-2008 02:38 PM

انا مركبتش الماروتى800 كتير لكن اعرف عنها بعض المعلومات ، وخصوصا المقارنة بينها وبين منافستها العتيدة فى نفس الفئة السعرية السيارة يوجو 128

ميزات الماروتى انها استهلاكها فى البنزين قليل جدا بالمقارنة باليوجو 128 كما انها اسهل فى المناورة لصغر جسمها ولاعتماد اليوجو 128 على تصميم لنظام التوجية يعتبر من اقدم تصميمات الجر الأمامى

بالنسبة لصوت المحرك وكمية الأعطال فصوت العربيتين مش واطى اوى ومش عالى ومش فارق كتير عن بعض (احنا هنا بنقارن ماروتى جديدة بيوجو جديدة وليس ماروتى جديدة ب 128 عمرها 30 سنة) وكذلك اعطال كل منهما نادرة لو بنتكلم عن عربيتين جداد

قطع الغيار تقريبا فى نفس مستوى السعر ومش فارقة كتير

بالنسبة لعيوب الماروتى بالمقارنة باليوجو 128 ، ال128 اربعة سلندر 1300 سى سى وبالتالى محركها اكبر واقدر على تحمل المشاق من محرك الماروتى، ال 128 صالونها اوسع بمراحل يتسع لأسرة مكونة من 4 افراد بسهولة ، كما ان شنطة ال128 كبيرة فى حين ان الماروتى لاتوجد لها شنطة تقريبا، ايضا تتميز ال128 بالثبات على الأرض عن الماروتى

بالنسبة للبرستيج فى عيون الناس فهو مش فارق كتير، الماروتى كانت لها ميزة نسبية فى البرستيج زمان اول ما ظهرت لكن مع اعتياد الناس عليها معادتش تفرق عن ال128 فكل منها فى نظر الناس سياره شباب فى مقتبل الطريق

**Abdm** · 06-02-2008 12:24 PM

معلش يا جماعة أنا بتعبكم معايا ولكن ماذا عن الاجزاء الميكانيكية مثل ألات الجر والعفشة والشاسية والفتيس والبودى هل يوجد أى مشاكل فى هذة الاجزاء الميكانيكية وهل يوجد فى هذة الاجزاء ما هو سريع التلف أو يتلف بستمرار وهل يوجد أعطال متكررة لهذة السيارة فى أى جزء من أجزاءها وأرجو من الاخوة أن لا يبخلو علينا بالمعلومات لارشاد كل من يريد شراء هذة السيارة وجزاكم الله خيرا .

**noni67** · 07-02-2008 08:27 AM

شوف يا مان
انا مراتى جبت لها واحده موديل 2007 على الزيرو يعنى
ماشية بيها لحد الأن حوالى 25 الف كيلو يعنى هرياها بمعنى اصح
وراحت بيها ميه مرة الساحل ومرسى مطروح مش عايز اقولك
مرة باسالها عيوبها ايه قالت لى عيب واحد بس انها بتجرى اوى
فطلبت تفسير قالت لى لما باسرح الاقيها جايبة 130 او 140
فانا اندهشت طبعا وسالتها امال اقصى حاجة جبتيها كام قالت لى العداد
كام العداد دة قالت لى 150
فقررت اجربها فرحت من اسبوع اعملها الصيانة بتاعه ال 52 الف فى ابو رواش
تصدق قفلت عدادها ال 150 كيلو فى الساعه بسهولة جدا كانى راكب عربية محركها مثلا 2000 سى سى
ولحد الان ما غيرتش فيها حاجه خالص غير تغيير الزيت والفلاتر والابلاتين والكندنسر والبوجيهات يعنى الصيانة الدورية العادية
الابلاتين فى التوكيل ب 20 جنية والكندنسر ب 15 جنية البوجيه الواحد ب 10 فلتر الزيت ب 42 جنية
يعنى انا شايف ان قطع غيارها حلوه اوى اوى ومعمرة كمان عن الفيات كله
فهمنى
وبعدين استهلاك البنزين هى قالت لى انها فولت العربية فى 6 اكتوبر علشان احنا ساكنين هناك وراحت مرسى مطروح فضلت فيها 3 ايام وهى راجعه فى مرسى مطروح فولت تانى لقيتها واخده 18 لتر فقط
تخيل مشوار لمرسى مطروح ولف فى مرسى مكطروح 3 ايام ب 18 لتر
يعنى اتكل على الله واشتريها يا مان
انا مش عايز اقولك انها عملها نص نقل بتتنى الكنبة اللى ورة وتدفس فيها حاجات انا نفسى مستغرب
يا راجل دى مرة جابت فيها تسريحة بتاعت حجرة النوم بالمراية فيها جوه من ورا تخير اى نعم كانت ربطة باب الشنطة لانه ما قفلش طبعا بس شالتهم وجت بيهم حاجة بتاعه 150 كيلو
اتكل على الله يا مان والتوكيل بتاعها محترم لابعد الحدود واسعارة معقولة جدا

**Abdm** · 07-02-2008 04:01 PM

ألف شكر ليك يا noni67 على اهتمامك والرد بالمعلومات الهايلة دية .
ولكن لو سمحتم فية سؤال هل تغير الاطارات لسبورت أوالتجنيط هل يؤثر على أى شىء فى السيارة لان الاطارات بتعتها صغيرة شوية مش عارف مقاس 12 أو 13 وليست عريضة فهل يوجد حل لهذا الموضوع .

ويا ريت يا جماعة لو فى أى حد عندة هذة السيارة أو أى معلومات لا يبخل علينا فنحن نريد أن يكون هذا الموضوع شامل لكل شىء فى السيارة وعن جميع أجزائها الميكانيكية مع ذكر المميزات والعيوب حتى يكون مفيد لنا جميعا . وشكرا

**thegoodhacker** · 07-02-2008 10:23 PM

معلش عندي سؤال بالنسبة لصاج السيارة .......هل هو اقوي من الفيورا ام ضعيف جدا ؟

**Abdm** · 09-02-2008 01:40 PM

المشاركة الأصلية كتبت بواسطة Abdm

ويا ريت يا جماعة لو فى أى حد عندة هذة السيارة أو أى معلومات لا يبخل علينا فنحن نريد أن يكون هذا الموضوع شامل لكل شىء فى السيارة وعن جميع أجزائها الميكانيكية مع ذكر المميزات والعيوب حتى يكون مفيد لنا جميعا . وشكرا

يا ريت يا شباب المنتدى الكرام متنسوش تكملة كل المعلومات عن الماروتى ليكون موضوع شامل كل شىء عن السيارة . وجزاكم الله خيرا

**noni67** · 09-02-2008 03:22 PM

شوف يا سيدى
بما انى مهندس سيارات لما جت مراتى تركب جنوط للماروتى بتاعتها
حسبت حسبة الكاوتش والجنوط وركبت لها جنوط سبور مقاس 13 مش 12 زى اللى فيها
وكاوتش كان مقاسة 165 55 / 13
ده اللى يخلى عداد السرعه يقرأ عادى لا بالناقص ولا بالزيادة زى كاوتشها بالضبط ومخلى العربية راسية على الارض والفرامل احلى وسرعتها ممتازة ده على حد كلام مراتى مع العلم ان مراتى بتسوق من 15 سنة وغيرت يحى فى 10 عربيات
اما بالنسبة للصاج فانا شايف ان البودى بتاعها قوى الحمد لله مش ضعيف
اصلا مراتىب عد ما جابت العربية بشهرين دخل فيها 128 فى الرفرف الامامى شمال مش عايز اقولك ان حتى الفلاشر الصوغنون اللى فى الرفرف ما انكسرش ولا الرفرف انخدش بس هى حكت لى ان رفرف وفانوس يمين فى ال 128 باظوا وانكسر الفانوس وضفر الاكصدام كمان
اتكل على الله دى عربية حلو اوى بفلوسها

**Abdm** · 10-02-2008 10:57 AM

المشاركة الأصلية كتبت بواسطة noni67

130 انا اندهشت طبعا وسالتها امال اقصى حاجة جبتيها كام قالت لى العداد
كام العداد دة قالت لى 150
فقررت اجربها فرحت من اسبوع اعملها الصيانة بتاعه ال 52 الف فى ابو رواش
تصدق قفلت عدادها ال 150 كيلو فى الساعه بسهولة جدا كانى راكب عربية محركها مثلا 2000 سى سى
ولحد الان ما غيرتش فيها حاجه خالص غير تغيير الزيت والفلاتر والابلاتين والكندنسر والبوجيهات يعنى الصيانة الدورية العادية
الابلاتين فى التوكيل ب 20 جنية والكندنسر ب 15 جنية البوجيه الواحد ب 10 فلتر الزيت ب 42 جنية
يعنى انا شايف ان قطع غيارها حلوه اوى اوى ومعمرة كمان عن الفيات كله
فهمنى

ألف شكر ليك يا noni67 على اهتمامك والرد بالمعلومات الهايلة دية .

وأنا مش عارف أشكركم ازاى على تواصولكم معايا ولكن أنا لى كم سؤال

أولا : أنا شفت قبل كدة ان أخر العداد هو 140 فهل هذا صحيح ام 150

ُثانيا : حضرتك ذكرت تغير بعض الاشياء الميكانيكية وهذا لا خلاف علية لانة من الصيانة الدورية ولكن ماذا عن باقى الاجزاء الميكانيكية المهمة مثل ألات الجر والعفشة والشاسية والفتيس هل يوجد أى مشاكل فى هذة الاجزاء الميكانيكية وهل يوجد فى هذة الاجزاء ما هو سريع التلف أو يتلف بستمرار وهل يوجد أعطال متكررة لهذة السيارة فى أى جزء من أجزاءها .

ثالثا :أرجو من جميع الاخوة الكرام المشاركة معنا فى هذا الموضوع وأن لا يبخلو علينا بالمعلومات لارشاد كل من يريد شراء هذة السيارة وجزاكم الله خيرا .

**Ghamrawy** · 10-02-2008 02:38 PM

بص يا سيدى انا كمان مراتى عندها واحدة موديل 98 يمكن من اكتر الحاجات اللى اللى تضايق هى المرش بتاعها سريع البوظان و الفتيس ساعات بيعض غير كده مافيش اى مشاكل بس هى دايما بتقولى ان الناس بتكسر عليها و كانها مش موجودة علشان العربية صغيرة و انا ساعات كمان باسوقها و لاحظت ده كمان

**noni67** · 10-02-2008 03:24 PM

واللهى انا ما اقدرش اجاوبك عن موضوع تلف الاجزاء الميكانيكية لأنها عامله 25 الف زى ما قلتلك واكتر من ابلاتين وكندنسر وبوجيهات وزيت وفلاتر ما غيرناش
يعنى الموضوع ده ما اعرفش عنه حاجه
لكن جارنا اللى اكن فى بنها كان معاه واحدة بيضاء كانت موديل 95 وكان شاريها مستعملة وعملها حجات كتير كنظافة وكان ديما يقولى ان قطع غيراها ارخص من ال 128 لانه كان معاه 128 قبل ما يشترى الماروتى
لكنا انا شخصيا ما جربتش ولا اشتريت ليها حاجه خالص غير اللى قلت لك عليه
حكاية المارش انا مش عارف سيرع البوظان يعنى ايه اللى بيبوظ فيه ما يمكن الشربون وده طبيعى فى اى مرش
اما الفتيس اللى بيعض ده محتاج ضبط عصاية فتيس وده سهل جدا او يكون بدال الدبرياج خلوصة مش مضبوط
حكاية الناس اللى بتكسر انا مش عايز اقولك باكون سايق الاسبنزا وانت طبعا عارف انها فيل ومع ذلك تلاقى الناس بتكسر عليا ده طبيعى فى الشارع المصرى الان لان ما فيش اخلاق بتاتا
وكل واحد متخيل ان الطريق ده اللى ورثة عن الست الوالدة او انه ماشى فى صحراء ما فيهاش حد غيره وربنا يهديهم يا رب