الموضوع: استفسار بخصوص المشايات الكهربائية

المشاركة الأصلية كتبت بواسطة Vetlord

أولاً أحييك من كل قلبى والله العظيم على مجهودك الأكثر من رائع فى الموضوع الى بادىء من شهور ،

المشاركة الأصلية كتبت بواسطة Vetlord

انا عضو فى نايل موتورز من فترة كبيرة جدا بس نشاطى قليل جدا لانى وبصراحة دخولى على النت اعياد ومواسم بس
ولما شفت موضوعك دا بالصدفة بالبحتة من بحث على جوجل فى موضوع المشايات لقيتك ماشاء الله عامل احلى متابعة وردودك كلها واضحة وفى الصميم ورائعة جدا جدا جدا لابعد حد (مع العلم انى قريت ال 50 صفحة قبل مادخل اعمل المشاركة )، جعله الله فى ميزان حسناتك

معلش انا طولت فى المقدمة بس والله لازم اديك حقك لانى معجب بمتابعتك جدا للناس واصرارك على المساعدة ،


اللهم امين ولا يسعني الا ان اشكرك علي كلامك واطراءك والله لا اقصد سوي المساعده
لا ربح ولا مكسب ولا اي حاجه

دلوقت انا برضه عاوز اشترى مشاية كهربا وكنت نزلت بصيت بصة كدا فى القصر العينى وشفت حاجات كتير فيها حاجات فستك زى مانت عارف وفى حاجات كانت شكلها مقنع بالنسبة لى فانا هسألك وياريت يبقى عندك معلومة بيهم :

1- فى شركة لقيت عندهم نوع اسمه KMF واسعاره متوسطة لا غالى قوى ولا ببلاش وشكله محترم وفنيشات كويسة وبعدين الكتالوج بتاعهم المواصفات الى مكتوبة تحس انها منطقية يعنى المشايات كلها مابين 1.25 إلى 1.75 والى جامدة قوى البيك بتاعها مكتوب 3 ودا اعلى نوع فدا برضه انت فاهم بيدى نوع من المصداقية فى ان الشركة مش بتالف فى المواصفات بتعتها .. المهم انا لما عملت سيرش عن نوع ال KMF على جوجل جالى موقع تايوانى بيقول ان الماركة دى لشركة تيوانية مش عارف اسمها Kuang Ming Feng ومنشأها تيوانى .. يعنى لحد دلوقت كل الموضوع مقنع .. بس بصراحة لما شفت الموضوع دا قلت لازم استشيرك واخد رايك انا لسة مشترتش ، ولو ليك سابق خبرة مع النوع دا او شفته قبل كدا يبقى كتر الف خيرك لو تدلنى عليه لانى لا خبرة ليا مطلقااااااا بالموضوع دا ...

انا سألت زي ما قلتلك عندنا في الشركه
واللي اتقالي كالتالي
الشركتين اللي موجودين في تيوان وليهم سمعه طيبه في المعارض الدوليه اللي بتتعمل هناك
هم
american motion fitness
jkexer

دي فعلا مشايات محترمه وليها سمعه
طبعا تيوان مش فاضيه ولا واقفه عالماركتين دول
فيه الالاف المصانع والموديلات
منهم الماركه اللي حضرتك ذكرتها
الله اعلم الماركه ليها وكيل ولا لا
هل حيستمروا ولا لا
هل فيه قطع غيار ولا لا
كل ده انا معرفوش
فيه ناس بتجيب تيواني لمجرد انهم يضربوا السوق وخلاص
وحصلت في كذا شركه ويتجاب كونتينر يتباع وخلاص علي كده
لا هوا توكيل معتمد ولا حاجه
الفكره مش انك تجيب من تيوان او الصين او حتي امريكا
الفكره سمعتك في السوق وخبرتك في المجال اد ايه

تاني ملحوظه اتقالت ان المواتير ملحوظ انها صغيره نسبيا وده طبعا بيفرق في السعر شويه
وعشان كده هيا موجوده بسعر قليل

تالت حاجه ودي تقلقني انا شخصيا سوق القصر العيني نفسه
ده كلامي كله وحضرتك ليك الرأي الاول والاخير طبعا
بس نصيحه مني ليك خليك في المضمون افضل

2- فى نوع تانى شفته برضه فى شركة تانيه النوع دا اسمه JADA والمشاية على كلامه صينى مقالش انها تيوانى وبيدى معها ضمان سنتين مش سنة واحدة والمشاية بصراحة ربنا شكلها محترم جدا سواء فى الشاسيه او خامة المقابض او العجل او السندات او مصاص الصدمات يعنى من برة الفنيش حاجة نضيفة جدا ومشجعة جدا على الشراء ، وطبعا اغراء الضمان السنتين بينى وبينك انا عنيا زغللت عليها هى كمان فياريت تنصحنى وتقولى ايه رايك فى دى كمان ..

طبعا المواصفات بتاعة الجادا دى انها كانت بتوصل بيك ل 4 حصان وبتتحمل وزن عالى يمكن 140 كيلو مثلا او اقل شوية واسعارها كانت مابين 3500- 4000 جنيه فياريت تقولى رأيك في الماركة جادا دى لو سمعت عنها حاجة يبقى كتر الف الف خيرك

اي حاجه صيني ابعد عنها افضل بس
سمعه الشخص في مجال هوا خبره فيه لا تشفع له انه يشتغل في مجال مش بتاعه
بالظبط زي صيدليات سيف والعزبي والتوحيد والنور وما الي ذلك من اماكن لا علاقه ليها بالمجال وبيدخل المجال لمجرد انها بتجيب فلوس وخلاص
ونرجع تاني ونقول نبعد عن القصر العيني للاسباب السابق ذكرها

اخيرا اسف على الاطالة بس دا من عشمى وتقبل تحياتى على سعة صدرك وتعبك مع الناس
تحت امرك في اي وقت ويارب ميكونش اتفهم من كلامي اني بوجهك لحاجه معينه عشان نكسب او الكلام ده
انا بكرر تاني احنا شغالين جمله بس والله
يعني مليش مصلحه اصلا مع المستهلك نهائي
انا كده كده بوزع علي الموزعين
كل الفكره ان للاسف مبقاش فيه ضمير وكله بيدور علي مصلحته وبس
عاوز يكسب وخلاص
طب متجيب حاجه نضيفه وتكسب بردو
هوا لازم تغش عشان تكسب
يجيب حاجه ب2 جنيه ويبيعها ب10
طب متجيب ب5 وتبيع ب10 بردو وحتكسب اقل اه انما براحه بال وضمير انك مطمن انك بعت حاجه محترمه تخلي الناس تدعيلك بدل ما تدعي عليك