كنت في طريقي لإنشاء شركة برمجة مع مجموعة من الأصدقاء -أنا إدارة..الحاجة اللي بافهم فيها- وهم النواحي الفنية، العقبة الأساسية في إتمام الموضوع كانت مشكلة التسويق وبسببها للأسف الموضوع ذهب أدراج الرياح بعد فترة من الدراسة والتخطيط وتوفير التمويل اللازم

في مشكلة تانية برضه..إن الشركات الكبيرة بتتغول وتاخد المتميزين في المجال ده غير اللي بيسافروا بره ولا يبقى سوى ضعيفو المستوى وغير القادرين على المنافسة الحقيقية..وأغلبهم بيكونوا غير متخصصين وغاية معلوماتهم مجموعة كورسات بعد الدبلوم أو بعد دراسة في كليات بعيدة عن الفكر والمنطق اللازم لتشكيل عقل المبرمج مثل الكليات النظرية
والخلاصة إن الشركات الكبيرة بتكبر زيادة والشركات الصغيرة بتصغر زيادة لغاية ما تقفل لعدم قدرتها على توفير احتياجات العملاء وأحيانا لأنها بتكون عبارة عن شركة للنصب والطلصقة ليس إلا (نظام إديله البرنامج ولما ياخد باله من الـbug يبقى تتساوى)
على فكرة موضوع طنطا اللي أشار له الزميل لافت انتباهي جدا من زمان لما مجموعة كبيرة من زمايلنا اللي اتخرجوا من هندسة راحوا اشتغلوا في شركات برمجة في طنطا للدرجة اللي خلتني أتخيل يومها إن الثورة التكنولوجية القادمة في مصر ستأتي من طنطا ومعاها كام كيلو حمص وحلاوة