الرائعة اسبيرانزا 620

**Dr MNM** · 12-05-2010 11:17 PM

وعدت الزملاء بنقل تطورات السيارة اسبيرانزا 620 معى اول باول من واقع استعمال شخصى و تجربتى لها
العيوب سحب العربية سخيف جدا فى الطلعة الاولى لدرجة انك تحس انك عايز تنزل تديها زقة بس دة فى الطلعة بس
و العكس تماما بعد كدة العربية بتكون سلسة بشكل رائع اكتر من 516 فية ناس قالوا علشان وزنها تقيل وناس قالوا الموتور تجميعة بطىء شوية
المهم بعد ما تعدى 20-30كم/ساعة بتكون تسارعها ممتاز و خفيفة جدا
ثانيا كرسى السائق فيى تزييق واضح جدا و طبعا التوكيل مابتلاقيش منة رجاء المهم قالولى العربية و الكرسى لسة بيطبع علشان العربية زيرو وانا حاسس ان الصوت بداء يقل او بعشم نفسى
ثالثا التكييف حلو بس بتاع ال516 كان فعلا ااقوى و اسرع فى التبريد و احسن دة رى مبداى قد يثبت او ينفى مع الايام
المميزات ثبات ممتاز استجابة العربية بحس انها احسن من 516 على الطريق السريع فعلا حاجة تانية بجد مع عدم المساس باى موديل تانى مثل النيسان او الانسر او التويوتا لانى استخدامى ليهم طيارى مع اصحابى بس فعلا ثبات و رقى فى التعامل مع الطرق السريعة....تحفة
زوجتى و بنتى كانوا قاعدين فى الكرسى الخلفىو احنا راجعين من اسكندرية تعليقهم انهم فعلا اول مرة مايحسوش بالطريق نهائى
دى انطباعاتى و اوعدكم بنقلها اول باول
و فى انتظار تعليقاتكم

**EZABY** · 13-05-2010 04:56 PM

ياباشا اولا الف مبروك
وثانيا الف شكر لا ني كل يوم بدخل هنا في منتدى اسبيرانزا على امل اني الاقي كلام عن الـ620 لكن مفيش للأسف

وكنت عاوز اعرف من حضرتك انت جايبها زيرو زي ماقريت
هل في فروق بين 2010 والسنين اللي قبلها الا في الشبكه الاماميه؟

وبالنسبه لموضوع التكييف اعتقد ده راجع لمساحة الصالون في الـ620 اكبر طبعا من الـ516 فعشان كده بياخد وقت اكبر لكن المفروض مع المشي الطوالي يكون التكييف احسن من الـ516

ياريت بقى تتم جميلك وتعمل تقرير جامد كده بالصور وتعملها تقييم عشان الناس تستفيد

**Dr MNM** · 14-05-2010 01:10 AM

انا مش شايف فروق تذكر بين موديل 2010 و الموديلات السابقة
و الصور هارفعها قريب جدا بالكتير بكرة و العربية لسة زيرو ماكملتش 2000 كيلو بس انا بنقل تعليقى عليها بموضوعية و حيادية كاملة اولا باول
لانى لاقيت قسم السيارات الصينى بالذات الناس بتعيب العربيات بدون ادنى استخدام لمجرد انها صينى مع ان فى عربيات كتيرة فى موديلات تانية فيها مساوىء كتير و مابسمعشى اى تعليق عليها
دة من وجهة نظرى و اتمنى اللى يمدح او ينتقد يكون بعد اذنكوا عن تجربة استعمالة الشخصى او استعمال حد قريب لية و هو متابع الاخبار

**hugan** · 14-05-2010 01:29 AM

المشاركة الأصلية كتبت بواسطة dr mnm

انا مش شايف فروق تذكر بين موديل 2010 و الموديلات السابقة
و الصور هارفعها قريب جدا بالكتير بكرة و العربية لسة زيرو ماكملتش 2000 كيلو بس انا بنقل تعليقى عليها بموضوعية و حيادية كاملة اولا باول
لانى لاقيت قسم السيارات الصينى بالذات الناس بتعيب العربيات بدون ادنى استخدام لمجرد انها صينى مع ان فى عربيات كتيرة فى موديلات تانية فيها مساوىء كتير و مابسمعشى اى تعليق عليها
دة من وجهة نظرى و اتمنى اللى يمدح او ينتقد يكون بعد اذنكوا عن تجربة استعمالة الشخصى او استعمال حد قريب لية و هو متابع الاخبار

انا مشترك من سنتين
كل اللي يهاجم يهاجم لانه سمع او مر من جنب العربيه صدفه
انما عندك لا ما عنديش
طب بتهاجم ليه
اصلها صيني
يبقي زي فوانيس رمضان ولعب الاطفال
طب مش تجرب الاول
لا ما انا اخدتها وجربتها يجي نص ساعه
الفتره دي كفايه علشان تحكم عليها
اصل انا خبير
انت عندك عربيه
لا بس ربنا يسهل واشتري
عندك رخصه قياده
انا مستني اشوف واسطه
جبت الخبره دي منين
اصل انا با قعد مع ناس عندها عربيات
ينفع يعني الخبره عن طريق السمع
المصريين كلهم بيفتوا اشمعني انا
انت كده ها تعقد الناس من العربيه
طب ليه يكون عندهم عربيات وانا لا
يمكن يكون ده السبب للهجوم والله اعلم

**Dr MNM** · 14-05-2010 07:34 PM

بصراحة انا مؤيد بشدة لرأيكوا ليس لنصرة عربيتى بس علشان احب اعرف رأى الزملاء المستخدمين الاخرين فيها
علشان ااقدر افرق لو ظهرت عيوب مثلا فى عربيتى هل هية عيوب فردية و لا عامة و لو عامة يبقى نجمع نفسنا و نروح حماية المستهلك و نطلع حبابى عين التوكيل
بس فعلا كلة بيفتى و اراء صبيانية و ليست موضوعية كل واحد بيتكلم على هواة من غير ما يفكر اذا كان كلامة ممكن يضيف او ينتقص من تفكير حد تانى بيقرا راية