اسبرانزا a516 ولا لوجان فول ابشن

**bakroov** · 14-05-2010 07:26 PM

شئنا ام ابينا فلابد من الاعتراف ان فرق اسعار الصينى يستحق حتمال بعض العيوب خبرنى بالله عليك لولا الصين كان ممكن موظف يتكلم فى فرامل مانعة للانغلاق بعد ما كان اقصى امانيه ان تيل ال28 مايصفرش ...!!!!!!!!!!!!!!!

**wael17** · 14-05-2010 10:11 PM

انا معايا سبيرانزا....
جبتها في الدفعة الاولي 2007 و عامل بيها 70000 كم
عيوبها كتير و بدات تظهر من تاني سنة
التكيف باظ من غير سبب في تاني سنة و غيروا سربنتينا في التوكيل ب 800 جنيه بس كانت في الضمان...الله اعلم هاتبوظ تاني امتي
والدي معاه نفس العربية سير الكاتينة اتقطع في اول سنة و هو عامل بيها 30000 كم من 2007 بس يعني مش بيستهلكها قوي..مرة واحد راكب جنبه بيفتح الباب الاكرة طلعت في ايده
وبعدين معلش الاخ اللي بيقول الاسبيرانزا صاجها قوي...دي مشهورة انك لو قفلت الشنطة بتاعتها جامد شوية بتتطبق و دي حاجة كل اللي معاهم سبيرانزا عارفينها...و انا شخصيا لاحظت تتطبيقه خفيفة في الشنطة في اول اسبوع بعد ما اشترتها و افتكرت ان حد خبطها خبطة خفيفة او سند عليها لان البوية كانت سليمة و بعدين مع انتشار العربية لاحظت العيب ده في نص العربيات تقريا...انبعاج خفيف في الشنطة جنب النمر و البوية سليمة...و ده بيحصل لو غطاء الشنطة اتقفل جامد...المضحك انك لو مارزعتش الغطاء عمره ماهيقفل
في كم لمبه اتحرقت بعد اول سنه و رشاش الميه بتاع الازاز اتقطع بدون سبب
من شهرين...العربية كانت يادوب 70000 كم و تمت 3 سنيين و لسه عامل صيانة ال70 الف...و مرة واحد وانا علي الدائري لقيت لمبة الحرارة نورت عداد الحرارة مولع....وقفت و نزلت طلع في خرطوم من الموتور للريداتير مقطوع...كده لوحده...هو عمره كده...يا تري في ايه تاني هايتقطع ولا يفرقع لحد ما ابيعها اخر السنة دي
اه و كمان الصبح لما بتكون باردة و ادورها بتعمل صوت زن عالي و بيروح بعد شوية و شكله سير كاتينة مش دينامو..و اخر مرة في التوكيل قلتلهم عليه قالولي صلحناه و طبعا ماينفعش اتاكد لان لازم العربية تكون باردة خالص و تاني يوم الصبح الصوت زي ماهو و انا متاكد انه اصلا ماحاولش يشوف العيب ده...و ده من اسوأ التوكيلات اللي شفتها...جايبين شوية مهندسين و فنيين شغلتهم يقلولك حاضر و ان شاء الله و يمشوك من غير ماتستفيد حاجة بعد ماتكون ضيعت نهار بطوله و لاحظت كمان انهم بيتعاملوا باستخفاف مع شكاوي الناس و هين عليهم يقلولك "شاري عربية صيني...و كمان بتتأمر" و طبعا مارحتش تاني و ماشي بيها كده و خلاص لانها ماتستاهلش الواحد يضيع وقت في تصليح حاجة ماتسواش...ان شاء الله علي شهر 10 ابيعها و تجيب اللي تجيبه و لو ماحدش اشتراها هارميها في الزبالة.
انا مش هاشكر ولا اعيب في اللوجان او اي عربيات تانية لاني ماجربتهاش ..انا بس حبيت اقول تجربتي مع الاسبيرانزا...و يمكن الكلام اللي انا قلته ده عادي و بيحصل في الهيونداي و اللانوس...الله اعلم

ملحوظة: انا كان معايا كيا ريو موديل 2001 اشترتها في 2004 و فضلت معايا لحد 2006 و بعدين عملت حادثة كبيرة و بعتها خردة
والله العظيم قعدت معايا سنتين و مش زيرو و عمري ما رحت بيها لميكانكي و لا عملتلها صيانة و لا حتي كنت ببص علي مية و زيت و كانت زي الفل

**khpopo** · 14-05-2010 10:17 PM

لوجان او ساجا الزيرو افضل
ربنا يوفق

**foxarc** · 15-05-2010 12:36 AM

السلام عليكم اسمحلي اشارك في الحوار بصفتي مالك للسيارتين الاسبرانزا سابقا و اللوجان حاليا
نبتدي بالشكل : بصراحة انا بحب شكل الاثنين جدا
الموتور : بالرغم من ان العربيتين 1600 الا ان موتور الاسبيرانزا يتفوق بشكل واضح في السحب- التكنولوجيا- هدوء الصوت - توفير البنزين.
العفشة : لصالح اللوجان قلبا و قالبا من حيث النعومة و العمر الافتراضي الأطول الاسبيرانزا عفشتها ناشفة و بترزع
الصاج : علي الرغم من ان اغلب الناس بتقول علي صاج الاسبيرانزا قوي الا اني اختلف معاهم بشدة و عن تجربة مع الحوادث المختلفة بدءا من الدراجة اللي طبقتلي الرفرف الي الميكروباص اللي خلعلي الاكصدام و اعتقد ان صاج اللوجان أقوي باستثناء الرفارف و الاكصدامات
الخامات الداخلية : اللوجان تتفوق قليلا من حيث خامة الدركسيون و التابلوه اما اكر الباب الداخلية فهي ضعيفة جدا في الاثنين و قابلة للكسر و خامة دركسيون الاسبيرانزا سيئة جدا الكلاكس كان بيلزق في الشتاء !!!!! الفرش جيد في الاثنين .
اضاءة الصالون الداخلي افضل في الاسبيرانزا و ايضا الاضاءة الخارجية اقوي في الاسبيرانزا
الوسع الداخلي : الاتنين ما شاء الله و اسعين بشكل واضح و اوسع من السيارات اللي في نفس الفئة السعرية و لكني اعتقد ان وسع اللوجان اختراع و عبقرية قياسا الي ابعادها الخارجية اللي اقل من الاسبيرانزا بشكل واضح
نظام الصوت : كاسيت الاسبيرانزا افضل من حيث الامكانيات اما السماعات في اللوجان انقي و اوضح
الكماليات : اللوجان تتفوق بالايرباج و الاسبيرانزا تتفوق بالفرامل المتطورة abs
الثبات : ثبات الاسبيرانزا افضل علي الطرق السريعة و السرعات العالية ( جبت بيها 170 علي طريق مطروح ) اللوجان بعد 120 تحس ان الاهتزاز زاد و الثبات قل
التكييف : تكييف الاسبيرانزا رائع تاتش و دجيتال و تكييف اللوجان عادي بس الاتنين كفاءتهم عالية و ليهم تاثير واضح علي السحب
العزل : في الاسبيرانزا احسن من اللوجان خصوصا في الصوت و الحرارة
التوكيل : الاتنين كفء في الفنيات و لكن توكيل رينو اكثر احتراما لعملائه
قطع الغيار : طبعا دلوقتي الاسبيرانزا بقت تاكسي فتوفرت قطع الغيار لكن علي العموم مفيش فرق كبير باستثناء سعر المرايات في اللوجان مستفز جدا !!!!
الارتفاع عن الارض : الاتنين ارتفاعهم كويس و احسن من السيارات المثيلة و اللوجان رائعة في هذه النقطة كأنك راكب 4*4
الدهان : احسن نسبيا في اللوجان عنه في الاسبيرانزا
الفتيس : بصراحة الحمد لله محستش باي مشاكل و لا عضة في الاتنين و لكنهم يشتركوا في ضعف السحب علي الغيار التاني و الانطلاقة الحقيقية بدءا من الغيار التالت و فتيس الاسبيرانزا طويل في غياراته بمعني انك ممكن تنقل علي 4 ار بي ام مستريح اما اللوجان فاقصي حاجة تنقل علي 3 الي 3.5 .
في النهاية اتمني اني اكون افادتك و ربنا يوفقك للاختيار الصحيح
خالص تحياتي

**hugan** · 15-05-2010 12:43 AM

الله ينور عليك ياخي
هي دي المقا رنات الصح
بس في النهايه ومن كلامك
الاسبرانزا تتفوق
لانك لم تذكر كل الكماليات
الاعتراض علي نقطه العفشه
لان الكل يعلم ان عفشتها رياضيه ولازم تكون ناشفه طبعا ثبات اعلي
وزي ما قولت نفس عفشه البوما
لكن مقارنه رائعه

**DOCTORBADRAN** · 15-05-2010 06:07 PM

المشاركة الأصلية كتبت بواسطة etsh1413202

برنس وباشا ورئيس قسم

بس باع سبيرنزا و جاب لوجان

**hugan** · 15-05-2010 06:11 PM

المشاركة الأصلية كتبت بواسطة doctorbadran

بس باع سبيرنزا و جاب لوجان

حلو الرد ده
بس ماتعرفش ايه الظروف اللي خلته يبيع
وبعد كده حب يغير

**Ahmed A Rahman** · 15-05-2010 06:21 PM

بغض النظر عن اللوجان والاسبيرانزا
لأنهم زي الأهلي والزمالك

نصيحة لوجه الله
لو استقريت على لانسر بعد كل الكلام ده
متجيبهاش 1300 انا عندي الاثنين والتكييف والسحب في اللانسر أكتر من سيء

-

-

الموضوع: اسبرانزا a516 ولا لوجان فول ابشن

LinkBack

أدوات الموضوع

عرض

-

-

-

-

المواضيع المتشابهه

اسبرانزا a516 للبيع

اسبرانزا a516

اسبرانزا a516

يارايس - هل ممكن اضافة كمايات الفول ابشن الي الهاف ابشن

محتار بين الالتو 1100 فل ابشن و الاسبرنزا A113 فل ابشن ..

الكلمات الدلالية لهذا الموضوع

المفضلات

المفضلات

ضوابط المشاركة