ميجان: ايه حكايه الاسعار العجيبه؟

**mouraddesk** · 13-05-2010 01:50 PM

يا جماعة كل الكلام اللى فات ده صح الصح و انا واحد من الناس لسه مشترى شهر 12 اللى فات و طلع عينى و عين اهلى علشان الاقى عربية ميجان نظيفة للاسف ان كل او معظم المعروض تعبان جدا و متبهدل و ده عامل سمعة وحشة للعربية انا عربيتى بالكتالوج و دفتر الصيانة و كل الصيانة فى التوكيل و مش عربية مكلكعة و لا حاجة و الكمبيوتر بتاعها مش عفريت فى العلبة بس المهم انك يكون عندك ثقافة عن الحديث فى عالم السيارات الميجان بالنسبة للستروين 128 و انا عن نفسى لوفكرت ابيع هبيع علشان اشترى الاحدث منها و كل العربيات الجديدة مش معقدة بس احنا اتنقلنا نقله تانية و الناس لسه واخده على البيجو و المرسيدس و الفيات بتاع زمان ده انا عربية بنت خالتى بى ام و للعلم بتنزل من غير استبن لان التكنولوجيا اللى مستخدمة فى العجل لسه مش موجودة عندنا و لو قلت لحد كده هيقول لك ايه عربية من غير استبن دى اى كلام و قيس على كده بقى و ثقافة المشترى المصرى و التجار و السماسرة

**Hany Saad** · 13-05-2010 02:08 PM

طبعا لازم نضيف سمعة الرفرف الفيبر اللى المعلم بوحه السمكرى قعد يشتم فيه علشان وقفله شغله....

و اللى يقولك حساسات إيه و اللى يقولك الكارت ب25000 جنيه و زرار الstart و....طبعا العربية نزلت سنة 2005 لما كان الإيرباج إختراع....

تخيل بأه لما سنة 2005 تتكلم عن حساس مطر و 6 إيرباج و حساس ضوء وcruise control و حاجات كده محدش سمع عنها أصلا و لغاية دلوقتى يدوبك فى 2010 بتبدى الحاجات دى تبقى موجودة.....

طبعا الناس طلعت القطط الفاطسة فى العربية و باقى المنافسين دمروا سمعتها علشان يداروا خيبتهم التقيلة......

كمان العربية دى مش أى حد يركبها....يعنى شاشات بالأنجليزى و العربية كل حاجة فيها بتكلمك و عايزه واحد عنده حد أدنى من الثقافة...لما بعض المعلمين الجداد ركبوها للأسف معرفوش يتعملوا معاها و طبعا كونهم فى السوق دمروا البقية الباقية من سمعتها فى الأرض.

**ahmed4000** · 13-05-2010 02:41 PM

هى من العربيات اللى سعرها بيبقى نازل دايما لعوامل كتيرة من اهمهها خوف الناس منها علشان اشاعات الكومبيوتر اللى بيبوظ والرفرف اللى بيتحرق ....الخ وبالتالى مبيبقاش عليها طلب كبير على المستعمل

**Hany Saad** · 13-05-2010 03:05 PM

المشاركة الأصلية كتبت بواسطة human12

عارف يا ميججى
انا ماحستش بقيمه الفيبر ده الا مره المفروض كانوا يبقى فيهم ردود جامده و ببص لقيت ولا اكنهم حد لمسهم

ابويا بيضحك و يقولى هوه الرفرف بتاعك فايبر قلتله اه قال اشرب!!
طبعا ممكن اقضى سنيتن اقنعه ان الرفرف ده احسن بكتير من اصاج

و كل ماشوف الميجى و الرفارف اللى ورا متبهدله عشان المعتاد انهم يتحكوا اققول يا ريت كانوا ظبطوا الحته ديه فايبر

حضرتك ده كلام الناس الفاهمة اللى زيك اللى هما راكبين الميجان......إنما بالنسبة للملوش شوية فى العربيات عايز صاج علشان بالنسبة له ده أقوى.

طبعا لتنشيط المعلومات فيه حاجة إسمها elastic collision أو التصادم المرن يعنى لما جسمين يرتطموا ببعض بيمتصوا الصدمة من بعض دون إرتداد و بتتحول لنوع أخر من الطاقة زى صوت أو كسر أو حرارة و هى دى فكرة الفبر سواء فى الرفرف أو الإكصدام و طبعا لحماية الركاب....يعنى حضرتك الفبر هو اللى بيشيل أثر الصدمة دون التأثير على ركاب السيارة.... وده أعلى كتير من وجه نظر الأمان لركاب السيارة و للمارة لو لا قدر الله خبطت حد....

أما بالنسبة للnon elastic collision أو التصادم الغير مرن لو جسمين خبطوا فى بعض بيرتدوا عن بعض و ده فى حالة الصاج هتلاقى العربية كلها إتحركت بفعل الصدمة و ده طبعا بيخلى الركاب يتخبطوا جامد جدا....ده غير طبعا لو رفرف معدن الخبطة بتبقى مهولة للعربيتين اللى خبطوا بعض و كمان لو لا قدر الله حد من المشاة إتخبط برفرف صاج أو إكصدام صاج بتكون العواقب وخيمة.

**DR/WAFEK** · 13-05-2010 04:01 PM

باختصار السبب الميجان ملهاش اللى التوكيل ومحدش فى مصر بيحب يعمل صيانه فى التوكيل (الاغلب)والتوكيل معروف ان سعر الحاجه مضروب فى عشره هذا فى رأىى 90 % من سبب مشكلة الميجان فى مصر

**M!SHO** · 13-05-2010 04:13 PM

مين هيشترى عربيه الكارت بتاعها ب 35 الف ....ههههههههههههه
اكتر عربيه سمعت عنها قصص واشاعات ,,ربنا يرحمنا من الفتى

**adfarouk** · 13-05-2010 04:26 PM

المشاركة الأصلية كتبت بواسطة meggieboy

علشان كده أخدت قرار إنى مش هبيع غير لما أكون أخدت بتمن العربية و بعدين تبقى تجيب اللى تجيبه.....و شكلها أخر مرة هشترى عربية أوروبى زيرو.....

أنا معاك في النقطة الأولي لأن للأسف دي ثقافة السوق و صعب تغيرها في وقت قصير

بس مش معاك في النقطة التانية لأن متهيألي مع موضوع الجمارك بتاع 10% كل سنه ده الموضوع هيختلف و مصر كلها هتركب أوروبي تاني زي زمان و بالتالي سعر المستعمل الأوروبي مش هيبقى بالمنظر اللي الموجود دلوقتي

**Hany Saad** · 13-05-2010 04:56 PM

المشاركة الأصلية كتبت بواسطة adfarouk

أنا معاك في النقطة الأولي لأن للأسف دي ثقافة السوق و صعب تغيرها في وقت قصير

بس مش معاك في النقطة التانية لأن متهيألي مع موضوع الجمارك بتاع 10% كل سنه ده الموضوع هيختلف و مصر كلها هتركب أوروبي تاني زي زمان و بالتالي سعر المستعمل الأوروبي مش هيبقى بالمنظر اللي الموجود دلوقتي

فكر شخصى لى إن مستوى ضخ العربيات الجديدة فى السوق فى أحسن أحواله هيبقى كما هو عليه....لكنى متوقع أى نوع ضرايب أو شىء من هذا القبيل لتقليل شراء سيارات جديدة و تعويض إنخفاض ال10 % السنوى لأن بمنتهى البساطة شوارع المحروسة لن تتحمل أكثر من هذا.....

فعليا لو فضل نفس مستوى السيارات الجديدة اللى بيتباع دلوقتى سنة 2015 سوف تتحول القاهرة إلى جراج مفتوح...

لا أتوقع شخصيا إنخفاض أسعار الأوروبى أيضا لأن صناعة السيارات فى مصر سوف تتضرر بشدة....

أيضا لو فرضنا إن الحياة ضحكتلنا و الناس كلها ركبت أوروبى أحدث موديل برده سعر كسر الزيرو هيكون أوفر و خد بالك أنا بتكلم عن موديل سنة واحدة فرق مش أكتر يعنى مثلا عربية ماشية 10000 بنت ناس تشترى أعلى فئة فيها بأقل من سعر أول فئة.....!!!!!!