والله احمد انا بعمل كده فعلا مش بخرج غير في المشاوير المهمه او في ايام الاجازه بس :(
عرض للطباعة
انا معنديش مشكلة في الركنة في الاماكن اللي بروحها بشكل منتظم .. البيت و الجامعة لأن الاتنين ليا ركنة فيهم ..
و لكن مشكلتي الكبيرة اني اخش شارع ضيق اصلا و الاقي كام صف عربيات راكن .. و انا في نصه الاقي ناس جاية كمان بالعكس .. و غالبا الموقف ده بينتهي بكام خدش في العربية كدة بيعكننوا عليا اليوم ..
غير كدة اما بروح عند واحد صاحبي ولا ايام تدريب تبع الكلية .. كان تقريبا نص البنزين اللي بستهلكوا بدور علي ركنة ! و فييييين و فين اما الاقي ركنة .. و احلي حاجة ان اقعد ساعة الف و ساعتين بحاول اركن العربية في حتة اد كدة .. و ونا ماشي الاقي واحد ظهر معرفش منين بيمسح ازاز العربية و بيقولي نورت يا باشا !
انا عندى جراج بتاعى
الحمد لله
انا لما جيت اتجوز كان احد اهم الإعتبارات فى اختيار مكان شقتى هو وجود مكان متسع للركنة تحت العمارة، وخذت تريقة من نسايبى لحد ما كنت قربت افك الخطوبة على موضوع الركنة ده وانى حاططلة الأهمية دى كلها ، كأنى مثلا جاى من المريخ او بتكلم عن مشكلة بتحصل فى دولة ميكرونيزيا او جمهورية قرغيزستان ، بس نفذت اللى دماغى وخدت شقة فى مكان متنظم كويس وكل كام عمارة ليهم بارك عربيات قد ملعب كرة القدم، ده غير الشوارع المحيطة وبالتالى مش بعانى خالص عند البيت، اقصى قدر من المعاناه بيواجهنى هو انى مركنش العربية تحت بلكونتى لكن اركنها تحت البلكونة التانية، لكن بالنسبة للشغل ده بقى اللى لعنة واى لعنة، يكفى انى اقول انى بشتغل فى المهندسين ،التى قال فيها احد الحكماء انها"منطقة عشوائية يقطنها علية القوم" ولو اتأخرت لحد 9 صباحا ياإما اخد اجازة يا إما اروح الشغل بتاكسى، وطبعا فى وسط النهار انا لازم انسى نهائيا فكرة ان عندى عربية لأن اى مشوار برة المهندسين مستحيل ، ده غير انى لا هلاقى ركنة مطرح ما انا رايح ولا هرجع الاقى الركنة اللى سبتها، غير انى لما بركن الصبح صف اول بنزل فى نص النهار ألاقى قافل عليا صف تانى وتالت ورابع ولا شيخ صنعة المناديين نفسه يعرف يطلع لى العربية قبل فض الإشتباك الساعة خمسة لما يبتدو الموظفين يروحوا، ولو اجرمت فى حق نفسى واتأخرت لحد الساعة سبعة يبقى يا ويلى من مرتادى كافيهات المهندسين اللى كل واحد فيهم ابن بارم ديله اللى بييجو مش بس يركنوا صف تانى وتالت ورابع لكن بمنتهى البجاحة بيقفوا امام مداخل الجاراجات ويشدوا الفرامل ومحروق ابو الجراح على العربيات اللى فيه، وفى هذة الحالة هضطر استنى لحد ما الننوس يخلص قعدة الأنس والحجرين بتوعه علشان ييجى يخرجنى اروح بيتنا انام
انا فعلا اصبحت بدور على شغل تانى بسبب المشوار والركنة
انا شارع بيتي الحمد الله في شارعين واحد رايح و واحد جاي .. بس طبعا صفين علي الجنبين و سعات صف تاني ( محمد توفيق دياب )
العمارة 13 دور شقتين كل دور .. و كل دور يمتلك علي الاقل سيارتين .
72 سيارة لعمارة واحدة .. حقول المتوسط 50 سيارة للعمارة ... نص الشارع ينتهي عند عمارة رقم 22 يعني 22x 50 = 1100 سيارة :)
لو رجعت قبل 12 ممكن ! اكون محظوظ !
بعد كدة بركن في شارع موازي لشارع بيتنا !
و يا سلام لو يوم خميس .. الجامع الي في وش البيت .. بياخد الشارع كله باليل علشان صلاة الجمعة فبركن في عباس العقاد :)
و احلى حاجة لما نكون بنصلي .. و تلاقي عربية داخلة الشارع .. و بتزمر :) LOL
يا جماعه دي مشكلة علي مستوي القاهرة....والجيزة ...
بسبب :
1-الزيادة السكانية الخرافية (متهيالي المحافظتين فيهم مالا يقل عن 20 مليون بني ادم)
2-اسلوب التوسع الرأسي ....ابراج عمارات 13 و14 و20 دور...
3-مواصلات عامة سيئة للغاية ولا تفي باحتياجات الناس...
4-المدن الجديدة خالية من مراكز الاعمال....الشركات الكبيرة والمتعددة الجنسيات متمركزة في القاهرة والجيزة....
5-المدن الجديدة للاثرياء فقط.....(سعر متر الشقة في القاهرة الجديدة وصل لحد 4آلاف جنية علي المحارة)
من اكتر المواضيع اللى بتشلنى فى حياتى حكاية الشارع اللى بيتقفل علشان صلاه الجمعة او التراويح، والطبعا الموضوع ده من المواضيع اللى لو اتكلمت فيها مع اى حد ابقى بهاجم الدين واتوصف بأقذع الصفات اللى ممكن انسان يتوصف بيها مع ان اللى علمنا صلاه الجمعة هو نفسه اللى علمنا حق الطريق لكن تقول لمين
يعنى انت بنفسك بتقول ان الشارع بيتقفل من يوم الخميس باليل علشان خاطر صلاه الجمعة وده اعتداء على حق الناس فى الإرتفاق (استخدام الطريق للوصول) الى بيوتهم ، وحقهم فى ترك ركائبهم فى المكان الذى اعتادو عليه، ده اولا، ثانيا ماذا لو طرأ طارئ يحتاج الى مرور سيارة فى وقت الصلاه، كحالات الإصابات والحرائق وما شابه او حتى واحدة ست واخدة طفلها فى سيارتها لطبيب او لضرورة من الضرورات وما اكثرها، ثالثا، فيها ايه لو صف المصلين اللى بيقفل الشارع يقل حتى نصف او ربع اتساعه ويزيد عدد الصفوف للخلف حتى نفسح طريقا لمن يريد المرور؟ رابعا ، حتى فى المساجد التى يحافظ القائمون عليها على حق الطريق نجد المصلين وقد اغلقوا الشوارع بسياراتهم لأداء الصلاه مع ان كل واحد فيهم لو مشى شوية هيلاقى مكان لسيارته لا يؤذى به عباد الله( انا الجامع اللى انا بصلى فيه يبعد عن بيتنا حوالى 1.5 كيلومتر، باخد السيارة الى اقرب مكان من الجامع فيه ركنة وبنزل امشى حوالى 200-300 متر لحد الجامع ومش شايف ان فيها مصيبة ولا كارثة، في حين ان انا بشوف مهزلة لما المصلين بيخروجوا من الجامع مرة واحدة وكل واحد فيهم بيحاول يهرب بسيارته من المعمعة التى ساهم فى خلقها بركن سيارته بشكل عشوائى علشان مكسل يمشى خطوتين زيادة)، لدرجة ان شارع رئيسى مثل شارع ذاكر حسين فى مدينة نصر يغلق تماما ساعة صلاه الجمعة لان سائقى الأتوبيسات وقفوا باتوبيساتهم صف ثالث ورابع وخامس وحتى اغلاق الطريق تماما لأداء الصلاه، لمجرد ان لازم الاتوبيس يقف فى باب الجامع ولا يصح ان السائق الهمام يمشى بيه شوية لقدام ويركنه فى مكان لا يسد الطريق
سلوكيات اراها غير متحضره اطلاقا ولو جرؤت على الكلام فيها يتهمنى الجميع بالزندقة لأن عندهم قناعة تامة ان كونهم يؤدون صلاة الجماعة فذلك يتيح لهم سلب حق غيرهم، وكأن احدهم لم يسمع بالآية الكريمة:"ان الصلاه تنهى عن الفحشاء والمنكر" او يبدو ان تعريفهم للفحشاء والمنكر يقتصر فقط على الأمور الإباحية اما ما عداها فليس بفحشاء ولا منكر
انا معاك يا استاذ سبعاوي
وللأسف والدي ( الي بيصلي في نفس الجامع ) اجتمه مرة بشيخ من شيوخ الجامع و حاول يقنعه .. في شيخ منهم وافق فعلا .. اما التاني
فأصر على ان صلاة الجمعة اهم من ان يتعطل " اي شخص " بضعة دقائق عبال مالصلاة تخلص .
و بعد شهر او اكتر ... تم بناء نظام " Frames " يبدأ من رصيف الجامع و يمتد اعمدة غارسة في الجنينة بين الشارعين و تحمل مظلة فوقهم تفرد يوم الجمعة علشان الصلاة .. احتلال يعني :)
و طبعا المهندس الذكي الي صممها .. عمل العمود قريب جدا من " بردورة " رصيف الجنينة .. مما يعني انك لو ركنت من غير متركز اوي .. حتلبس بعربيتك في العمود " الفولاذي " :)
و ربنا يهيدنا جميعا .
و آديني بقيت واحدة من اللي بيعانوا من مشاكل الباركنج.. طيب ما انا كنت ماشية على رجلي و لا هاممني الناس بتركن ازاي.. انما تقولوا ايه بأه؟ ناااااااااااس غاوية وجع قللللللللللللب :rolleyes: