الموضوع: المصرية للسيارات المعرض الاسوء فى مصر

فى البداية اود ان اقدم طبعا التحيه بجد لاعضاء المنتدى ده المحترمين جدا ويارتنى كنت سمعت كلامهم من الامل
هقولكم قصه صغير كده عن المصريه للسيارات
القصه بدءت بانى كنت عايز اشترى بروتون ساجا وبدور عليها كان بالصدفه قريب منى معرض المصريه للسيارات اللى فى مصر الجديده قولت اسال عليها لفيتها مش موجوده فسالت عن اللوجان الفل اوبشن مندوب البيع بص فى الورقه وقالى ب65500 بعد الخصم قولت سعر ممتاز المهم انا لما شوفت البروتون ساجا فى توكيل بروتون غيرت راى واختارت اللوجان قولت ارجع للمعرض
المهم لقيت العربيه موجوده معروضه اللون الاسود فقط ومكتوب عليها سعرها 68 الف وبعد الخصم 66500 قولت حلو تمنها جدا وبدءت القصه مع مندوبى المبيعات هناك وكانت كالتالى :-
الاول :-
انا : فيه رينو لوجان E2
المندوب1 : اه حضرتك موجوده
انا : بكام ؟؟
المندوب1 : 66500 ج هو حضرتك عايزه كاش وله قسط؟؟
انا : كاش
المندوب1 : ( تغير فى المعامله 180 درجه ) ينظر الى الناحيه الاخره ثم يرد لا حضرتك لو كاش هى مش موجوده الان
انا :طيب مهو حضرتك لسه قايل موجود
المندوب1 : لا حضرتك دى محجوزه انا قصدى روح شوفها يعنى عشان تتعرف عليها
انا : طيب ممكن رقم تليفون اتابع مع حضرتك فيه ؟؟
المندوب 1 : خش خد من جوه معامله
دخلت لواحد تانى جوه وحوار جديد
انا : فيه رينو لوجان E2
المندوب2 : اه حضرتك موجوده
انا : بكام ؟؟
المندوب2 : 66500 ج هو حضرتك عايزه كاش وله قسط؟؟
انا : كاش
المندوب2 : ( تغير فى المعامله 180 درجه ) ينظر الى الناحيه الاخره ثم يرد بص حضرتك لو كاش حضرتك تنتظر علينا حتى نهايه الاسبوع عشان هى مش موجود منها الان خالص غير عربيه واحده ممكن تتفرج عليها بس هى متباعه
انا : طيب ممكن رقم تليفون اتابع
المندوب 2 : طب مد ايده فى جيبه وطلع كرت بمنتهى التناكه وادهولى وكانه بيدى جنيه لشحات
انا : طيب اكلم حضرتك امتى؟؟؟
المندوب 2 : على اخر الاسبوع
وانتهى حوارى مع هذا المندوب بس قولت اجرب واحد تالت وحوار جديد
انا : فيه رينو لوجان E2
المندوب3 : اه حضرتك موجوده
انا : بكام ؟؟
المندوب3 : 66500 ج هو حضرتك عايزه كاش وله قسط؟؟
انا : كاش
المندوب3 : ( تغير فى المعامله 180 درجه ) ينظر الى بطريقه مستفذه وحاسس انه عايز يقولى فوت علينا بكره ويرد بكل قله زوق حضرتك لو كاش يبقى 67 الف
انا : ليه ؟؟
المندوب 3 : لان مكسبنا فى الكاش ونفضلى وكلم حد تانى
روحت مشيت وقولت مش مشكلة معايا رقم الواد وهكلمه على اخر الاسبوع
اكلمه يوم الخميس زى ما اتفقنا يرد عليه اقوله حضرتك انا اللى جيتلك بخصوص اللوجان الفل اوبشن هى العربيه موجوده وله ايه؟؟
يقولى طيب بص حضرتك ربع ساعه وكلمنى تانى قولتله اوك
ربع ساعه وكلمته تانى يCancel عليه وكل ربع ساعه اكلمه ونفس الموضوع لمدة حوالى ساعتين الراجل مش عايز يرد عليه
قولت مش مشكلة موقف مندوب مش كويس روحت تانى وقابلت مندوب جديد
صراحه دخلت لقيته بيكلم موزه ومندمج جدا المهم قعد يكلمها 5 دقائق وانا امامه وبعدين دار الحوار معه وكان كالتالى :-
انا : فيه رينو لوجان E2
المندوب4 : لا للاسف
انا : طيب هتيجى امتى
المندوب4 : يعنى فى دفعه جيه خلال يومين
انا : طيب ممكن احجز دلوقتى
المندوب4 : كاش وله قسط
انا : كاش
المندوب 4 : (طبعا جمله كاش دى بتخنقهم وبتغير معاملتهم) طيب حضرتك كلمنى بعد كام يوم واقولك الموقف ايه
انا : اوك
طبعا قولت ربنا يسهل لما نشوف وكلمته فى المعاد قالى وكانت المكالمه كالتالى :-
انا : حضرتك انا اللى جيت لحضرتك عشان اللوجان الفل اوبشن السوده
المندوب 4 : عامل عبيط ومش فاكر
انا : طيب هى اللوجان السوده موجوده ؟؟
المندوب 4 : رد قليل الزوق مش عارف يااستاذ بس فيه عربيتين موجودين قدام المعرض بره فول ابشن واحده فضى والتانيه نبيتى تعاله شوفهم
انا : طيب السوده
المندوب4 : معرفش
قفلت التليفون وانا مخنوق من المعرض ده بس برضوا انا صبور ورحت المعرض تانى يوم وقابلت مندوب جديد
والحوار الجديد :-
انا : فيه رينو لوجان E2
المندوب 5 : اه
انا : طيب اللون الاسود منها موجوده ؟؟
المندوب 5 : اه انت جاهز تشترى امتى ؟؟
انا : فى اى وقت انشاله حتى لو بكره
المندوب 5 : كاش وله قسط
انا : كاش
المندوب 5 : طيب بص حضرتك كلمنى يوم الاربعاء الصبح وتعالى استلم فورا
انا : طيب اكلمك الثلاثاء بالليل عشان اضمن الاول
المندوب 5 : طيب
كلمته الثلاثاء لا حضرتك هى مش موجوده فى دفعه جايه بكره هتكون موجوده قولتله طيب اكلم حضرتك بكره امتى قالى انا هكلم حضرتك مش ده رقمك قولتله اه قالى طيب استنيت يوم الاربعاء لحد الساعه 10 ونص بالليل متكلمش قولت اكلمه قالى للاسف مجتش انهارده بكره بقه كلمته الخميس يعنى بالامس وده كان اخر علاقتى بالمعرض ده وهو قال اجيب من الاخر عشان الواد ده هيصدعنى قالى لا حضرتك مجتش برضوا بص حضرتك انت دورت عليها فى معرض تانى قولتله انا جي ليكم انتم قالى طيب بص حضرتك انا هدور لك عليها وهكلمك بكره طبعا الكلام المره دى معناه صريح اخلع ومش عايزين نشوف وشك تانى

طيب خلعت واليوم روحت لمعرض سمير ريان معرض فوق المحترم بشويتين المهم لاقيت مندوب اكثر من محترم قولتله لوجان فل ابشن قالى موجوده قولتله بكام قالى انت لقيت اقل سعر ليها بره كام قولتله 66500 فى المصريه للسيارات قالى وسمير ريان هيدهالك بنفس السعر وفورى
فرحت جددا المهم عجبنى اللون الفيرانى بس ملقتهوش ورحت حاجز وقالى بكره هتيجى تستلم

المهم خلاصت الكلام ان الناس هنا نصحتنى ابعد عن المصريه وخليك فى واحد من اتنين محمد زكى او ريان وانا للاسف جربت المصريه وعرفت انهم ناس مش كويسه وكان لازم انقل تجربتى ليكم عشان محدش يفكر فى المعرض ده لانه ناس غير محترمه

وعايز اسمع مبروك ليه على العربيه الجديده