ســـــــــــــؤال من عضو جديد؟

**meedosalah900** · 17-05-2010 12:50 AM

الحمد لله اولا على عضوية المنتدى الجميل ده اللى كله ناس ماشاء الله زى الفل دى شوية عليهم
ثانيا ان شاء الله انا هشترى عربية جديدة والسوبارو داخلة دماغى جدا بس عيب ضعف المكنة 1500 عملى قلق شوية فقلت اسال الحبايب واشوف هو ممكن الواحد يركب على العربية العادية المكنة بتاعت sti الجديدة الغنية عن التعريف ايه رايكو
والكلام هيتكلف كام واعملو فالتوكيل ولا بره احسن وهل هغير المكنة بس ولا ايه تانى الحمد لله دى هتبقى اول عربية ملك بعد تعب ومعاناه طبعا كلنا عرفنهم وبعد التفحيص والتمحيص والتدوير عالنت وصلتنى الفكرة دى فقولت اسال الحبايب وان شاء الله نلاقى الافادة
وشكرا على حسن تعاونكم معانا

**Ahmed Hassan** · 17-05-2010 03:27 AM

يعني هتشتري عربيه زيرو و تغيرلها موتور؟!!
عموما لو عايز تعمل كده يبقى تشوفلك عربيه مستعمله ١٦٠٠ عاديه بحاله كويسه من موديل ٢٠٠٤ ل ٢٠٠٧
و بعدين تشوفلك حد في امريكا (امريكا ارخص من اوروبا كتير) و تجيبلك من هناك عربيه wrx او sti و تقطعها و تجيبها هنا و تنقل الموتور و الضفيره و العفشه في عربيتك. لكن انك تجيب موتور بس انسى... مش هينفع لان هتلاقي حاجات كتير ناقصه.
المشاكل اللي هتقابلك هيه:
١- ان السوبارو بتحافظ على سعرها بره... فالعربيه مش هتكون رخيصه اصلا .
٢- انك تلاقي حد يجيبلك العربيه و يقطعها و يشحنهالك.
٣- انك تلاقي حد يركبلك العربيه اللي هتجيبها في عربيتك.

هل عندك استعداد تعمل كده؟!

**khalid_adel** · 17-05-2010 09:03 PM

طب ما انت يا احمد كنت ناوي على الموضوع ده وكان قدامك سكه
لو تقولنا وصلت لايه وكان حيكلفك كام؟؟؟

**Ahmed Hassan** · 18-05-2010 02:11 AM

المشاركة الأصلية كتبت بواسطة khalid_adel

طب ما انت يا احمد كنت ناوي على الموضوع ده وكان قدامك سكه
لو تقولنا وصلت لايه وكان حيكلفك كام؟؟؟

لسه يا خالد بحاول. لو حصل جديد اكيد هعرفكم

المشاركة الأصلية كتبت بواسطة meedosalah900

شكرا لكل الناس الحلوة اللى متابعة معانا
ثانيا الموضوع ده هيبقى ممكن بس بعد مده على ما ادرس العربية وهى معايا وبعدين هى سيدان احسن ولا هاتش باك وياريت حد يجبيلى صور للعربية من جوه
وفموضوعنا الاساسى ينفع التوكيل يعمل الموضوع ده ولا هيبقى جراج بره ولو كده يبقى عنوانه عشان اعدي عليه
والف شكر لجميع من فالمنتدى وخصوصا قسم السوبارو
اه نسيت هى العربية اللى فمصر تقفيل ايه !!!!!!!!!!!

التوكيل ممكن يركبلك اللي انت عايزه... بس متعملش حسابك عليه في قطع الغيار. التوكيل بيجيب قطع غيار للعربيات اللي موجوده في مصر... و انت هتجيب موتور مش موجود في مصر.

**ahmad7610** · 18-05-2010 02:31 PM

مش حدخل فى موضوع التسقيط لانى مش حفيدك .. بس الموتور 1500 مش ضعيف وزى ال 1600 وبتطلع من البومة بكل سهولة و مثبت مع النترا و معديه على التالت فى مطلع كوبرى ..
-
أقصد إن 1500 موتور كويس جدا مع وزن كبير 1330 كجم وهو وزن الاوكتافيا 1380 كجم ... والجيتا
-
ومقارنة ب 1500 من لانسر محرك الامبريزا يكسب
-
لحد ما ان شاء الله تغير الموتور

**meedosalah900** · 18-05-2010 06:57 PM

شكرا ليكم يا جماعة بجد
انا سمعت ان فى معرض الشهر الجاى استنى وشوف العروض وبرضة فرصة الواحد يبص عالعربية عالطبيعه
ولو حد عندو معلومات عن التسارع بتاع الموتور الموجود فى مصر لان العربية مش لاقى اى معلومات عنها زي استهلاك البنزين ونوعه التسارع زي ماقولت فالاول (قصدى اللى بتنزل مصر )
وبجد انا فرحان جدا ان انا بقيت عضو فالمنتدى الجميل ده

**slim_shika** · 19-05-2010 11:24 PM

من غير زعل, أنا مش شايف أي لزوم لتسقيط موتور, بالذات لو زيرو, وبالذات لو سوبارو...

لو إنت عايز عربية تتسابق بيها يبقى ده حوار تاني, لو عايز تسقط مكنة sti علشان تمشي بيها جوه البلد على سرعة 20 يبقى وفر فلوسك.

أنا مش عايزك تزعل مني, بس نصيحة لازم تجرب العربية ديه بنفسك, وإنت أحكم على ال 1500, لو حسيت إن العربية ضعيفة يبقى ليك الكلام , أنت كده كده هتعجبك الركوبة نفسها.

وأهلا بيك في المنتدى ويا رب ييجي عليك بفايدة..