الموضوع: قائمة اسعار قطع غيار هيونداي اكسيل

شوية حركات كده في السريع لأحلى شباب في المنتديات كلها

العربيه كانت بدخان على خفيف:وبعدين اخويا الله يكرمه قالي اعمل طقم شنبر بدل ما تقلب معاك عمرة كاملة المهم عشان مطولش البداية يوم الأربعاء الماضي

1ـ طقم شنبر (من عبدا لمسيح سلامة )التوفيقية 110 جنيه

2ـ طقم جوان وش سلندر + طقم بوجيهات + طقم صبابات + طمبورة كرنك + فلتر هواء + فلتر زيت (من إبراهيم البنا ) التوفيقية 460 جنيه

3ـ جركن زيت التعاون ( للتليين ) + نص زيت سابب للميكانيكي 50 جنيه

4ـ خراط ( عمل قواعد + دلايل ( جمع دليل ) للوش 100 جنيه

5ـ شوية رفايع ( جملكة + كوليهات + بنزين ( لغسيل الماتور ) + أكل بره البيتإكراميات الخ حوالي 100 جنيه

6ـ مصنعيات 300 جنيه

والحمد لله الان انا فى فترة التليين اتمنى بعض النصائح
وشكراااااااااااا

الف مبروك ياباشا

السلام عليكم
ممكن اعرف بلية الدبرياش بكام
وطقم الشمبر بمصنعيته
ولكم جزيل الشكر

السلام عليكم
ممكن اعرف سعر المقص اليمين كام وهل بيتباع لوحده ولا لازم الاتنين مع بعض
وايه افضل انواع للمساعدين امامى وخلفى واسعارهم
والجريدتين اللى بيركبوا ع العتب الخارجي وياترى فى منهم معدن واو خامه تستحمل بخلاف الفيبر ويكون لونهم ابيض ياترى سعرهم كام ويجوا منين من عند الكماليات ولا قطع الغيار الاستيراد ولا فين ؟
الاستيراد كويس ولا الجديد؟؟؟؟؟؟ علما بانى من المنصورة
ولكم جزيل الشكر والامتنان

السلام عليكم
ايه انسب موتور استيراد للاكسيل 1500 يجماعه لو سمحمتم
وتجربته ازاى واد ايه ؟
ممكن سعره ومواصفاته بالفتيس ومن غير الفتيس واجيبه منين علما بانى من المنصورة
وهل لازم يركب نفس موتور الاكسيل ولا عادى نقدر نسقطله موتور اكسنت او النترا مثلا ؟؟؟؟؟؟؟؟
والموتور القديم بيتعمل فى ايه بيتباع خرده مثلا ولا له ثمن استفاد بيه مثلا ؟؟؟؟؟؟؟
معلش طولت عليكم
اثباته فى الرخصه فى تعقيدات ولا سهله ان شاء الله
علما بانى ماشي بتوكيل حاليا يعنى هستني لما انقل ملكيه واثبته فى الفحص ولا قبلها عادى ؟
ارجو الافاده ولكم جزيل الشكر

المشاركة الأصلية كتبت بواسطة zizo_mkz

والحمد لله الان انا فى فترة التليين اتمنى بعض النصائح
وشكراااااااااااا

الف مبروك وربنا يتملك التليين على خير باذن الله

فترة التليين وفترة التفتيح .............؟

وعدم الحصول على محرك غشيما

لو أردنا التحدث بالأسلوب الدارج


__________________________________________

يجب أن نعلم بداية أن التعامل السليم مع محرك السياره من أول وهله
يجعل المحرك صديقا وفيا لك .....أو محبوبا يلبى رغباتك وقت الحاجه اليه

ولكى يصير المحرك صديقا وفيا لك على مر الزمان يلزمك التالى


أولا :________

المداعبه الخفيفه للمحرك بعد العمره مباشرة بأجراء عملية تليين وتطبيع خفيف على الواقف
قبل بدء التحرك بالسياره للمرحله التى تليها

وذلك من خلال حرق صفيحة بنزين أو أكثر تمهيدا للمرحله القادمه

تلك هى مرحلة التليين التى نراها لدى الصنايعيه ( من خلال حس الخبره لهم فى التعامل مع عمرات المحركات )

وتلك المرحله تماما .....مثلها مثل الحبيب الذى يحاول بكل الطرق فى لفت نظر محبوبته اليه بمشاغلتها .....وأنتظارها على القمه وأمام مدرستها أو الجامعه وهكذا

ملحوظه مهمه

لايلزم مرحلة تليين لمحركات السيارات الجديده


ثانيا :________


مرحلة التطبيع الأقصى

وهى هندسيا بتسمى مرحلة التليين مع وجود أحمال مسلطه على محرك السياره أثناء تحركها

ويتم التعامل أيضا مع هذه المرحله بصوره تدريجيه

فمثلا .....يتم التحرك بالسياره فى الألف الأول من الكيلومترات بسرعات معقوله الى حد ما
قد تصل الى 80 أو 90 كم / س

مع عدم وجود أحمال أيضا ( خلاف السائق وبدن السياره ككل )

بعد الألف الأولى

يجب على قائد السياره رفع معدلات السرعه لمحرك السياره الى قيم أعلى من الوضع الذى سيصير عليه بعد ذلك

فمثلا ....يجب عليه التدرج فى السرعات الى قيم أعلى ( تقريبا 5000 لفه /ق )

وعدم الأقتراب من المنطقه الحرجه للسرعات ( حفاظا على المحرك ومنظومة الدبرياج )

أو مايطلق عليها علميا ...........الرد زون

تلك هى مرحلة التفتيح لمحرك السياره

لأن التفتيح بالبلدى كده .....يعنى خليك واد مفتح .... ....ومتبقاش غشيم

يعنى زياده أكثر وأكثر فى رفع كفاءة التطبيع الفائق على سرعات عاليه بين شنابر المحرك وغرف الحريق من الداخل

وأيضا يفيد التفتيح فى رفع كفاءة التطبيع بين أقراص الصبابات وقواعدها على رأس السلندر من أسفل

نقدر نسميها ( عملية روديه فائق الجوده )

لضمان الحبك الأقصى بين الصبابات وقواعدها وعدم السماح لأى فرصة تفويت ولو خفيف جدا

_____________________________________________


يلاحظ أنه لو لم يقوم قائد السياره ومالكها بالمراحل السابقه

تليين ثم تفتيح

فسيعانى الأمرين من محبوبه وهو محرك السياره

وسيجد صديقا أو محبوبا غشيما
لايلبى طلباته وقت الحاجه اليه
أثناء طلب أحمال منه .... مثل أوقات التسارع والتعجيل فى أحوال التخطى وصعود الكبارى
ما سبق منقول للافاده وشكرا جزيلا

المشاركة الأصلية كتبت بواسطة hema_hn

ايه الجمال ده يا وائل ربنا يبارك فيك وفى نقلك
وانا معاك فى موضوع الموتور لو لقتلك اى معلومة حبقى اقلك عليها
بس ايه رأيك فى طلعة لبورسعيد
مش يبقى افضل
على الاقل حنلاقى انصص عربيات ناخد منها الى احنا عايزينه
وده طبعا لازم يكون بمرافقة ميكانيكى شاطر بيفهم

ربنا يكرمك ويعزك يارب
وربنا ينفعنا جميعا يارب
ومستنى ردودك القيمه وباقى الاعضاء لتعم الفائده