الموضوع: برايد سايبا

اي معلومات سواء سعر - جوده - تقييم او اي شيء

العربية سعرها ممتاز بالمقارنة بسعر السوق وبالبدائل الاخرى

واسعة من جوة وشنطتها كبيرة

عفشة عملية وتستحمل الطرق بتاعتنا (بعد سنتين استخدام شاق مغيرتش غير كاوتشة ميزان بخمسة جنية)

افضل عربية من حيث قوة المحرك والسحب (التسارع) فى الشريحة ديه وتقارن فى ادائها بعربيات اعلى منها

قطع غيار رخيصة جداً وصيانة سهلة ورخيصة فى اى مكان

كماليات كافية (التكييف قوى - زجاج كهرباء - فتح الشنطة والتنك من الداخل - ستوب خلفى - حامل اكواب - كاسيت وسماعات ممتازة - سنتر لوج - باور )

قيادتها مريحة وناعمة (حتى من غير باور ) وعفشتها مريحة

يعنى عربية قوية واقتصادية وعملية ومريحة باقل سعر فى السوق يبقى كل ده مفيهاش ميزة ؟
__________________

المشاركة الأصلية كتبت بواسطة sheko fun الموضوع منقول لامانه من منتدي اخر ولكن للافاده لاعضاء المنتدي
أنا متشكر جدا طبعا لكل إلى ساهموا فى الموضوع وحاولوا الإفادة ( شـــــــــــــــكــــــــ ـــــرا)

أنا حاولت أستفيد بنفسى وأشوف بعينى فنزلت إمبارح يوم 11 /5 /2010 إلى شركة ناشونال موتورز إللى فى شارع الطيران .

روحت وشوفت العربية ( سايبا برايد ) وسئلت مدير الشركة عن موديل العربية وطلع إن أجدد موديل هو 2009 حتى الأن لاكن هوة قالى إن فى صفقة 2010 مع سيارات سايبا برايد ولكن هتبقى سيارات هاتش باك وذلك بعد النجاح الكبير إللى حدث فى مبيعات ( سايبا برايد 2009 ) . لاكن لسه منزلتش مصر .

وورانى العربية وشوفتها ولاقتها كويسة جدا فعلاَ . وقلبت فيها وشفت فيها كل حاجة وعجبتنى جداَ بالنسبة لسعرها .

هية عربية عائلية واسعة من جوه والشنطة واسعة جداَ . " ما شاء الله " .
وفيها تكيف وباور وسنترلوك ومصابيح شبورة وزجاج كهربى ( للأمام فقط ) بالإضافة إلى أن موتورها 1300 سى سى بمعدل 92 حصان . وبها خمس سرعات .

وأنا بصراحة مش محتاج أكثر من كدة . وسارعت بحجز سيارة لون فيرانى . ولكن حجزتها بالتقسيط على سنتين .

ملاحظة : كان مكتوب فى الجرايد الأسبوعية : أن الفائدة ( 3.1 % ) .
أكتشفت إن دة للفئة إللى بمبلغ ( 47500 جنية ) إللى من غير كماليات .

لكن إللى بكماليات (52500 جنية ) قاللى الفايدة بتاعتها (3.7 % ) .

قلت ماشى مش هتفرق كثيير علماَ بإنى كنت ناوى أقسط على ثلاث سنوات . لكن بعد كدة قلت أقسط على سنتين وهتبقى الفايدة ( صفر % ) .

هوة فى موضوع التقسيط بيطلب صورة من البطاقة + وصل كهرباء يزيد عن 10 جنية .
+ دفع مبلغ 1000 جنية تحت الحساب .

وبعد كدة أدفع المقدم عندهم فى الشركة والأقساط تدفع فى بنك ( كريدى أجريكول مصر ) فى أقرب فرع ليك .

بس أنا كان ليا ملاحظة واحدة شفتها هناك فى شركة ناشونال موتورز :

---- غير العربيات إللى فى المعرض كانوا عرضين من كل نوع سيارة واحدة , إنهم ركنين العربيات كلها بره فى الشمس , والتراب مغطيها وعربيات شكلها فخم قوى زى Kia Cerato و فلوكس فيجان الجديدة وسايبا برايد وسوزوكى ألتو . لاكن كان عليهم تراب كثير . ( إلى بره المعرض مش إلى جوة )

فأنا لاحظت إن لما حد بيطلب شراء نوع من السيارة بيقوللوا هتستلمها كمان كام يوم وبيجيبوا من العربيات إلى مركونة بره إلى عليها تراب كثيير ويلمعوها ويدوها بعد كدة للزبون . يعنى مش بيجيبوها من المخزن ولا حاجة .

والعربيات كلها معلهاش اللزق الأبيض إلى بيتلزق على السقف والكبوت عشان يحميها شوية .بإستثناء عربية KIA Cerato

كل دة مش مشكلة . المشكلة بقى إللى أنا فكرت فيها إن الأستاذ ( أبو نوره ) قال :

إن عربية ( سايبا برايد ) محتاجة متتركنش كثير فى الشارع بدون غطاء يحميها من التراب لأن التراب بيأثر على التكيف بتاع العربية .

طب ده عندهم كل العربيات ركنينها وشكلها كدة بقالها فترة طويلة وعليها تراب كثيير . فكنت عايز أستفسر على النقطة دى للأستاذ ( أبو نوره ) بما إنه هوة خبرة أكثر فى الموضوع دة .

وكنت عايز أى حد يفهمنى إزاى أعرف إزا كانت العربية إللى هيدوهالى فيها عيب وللا لأ .

وأخيراَ أسف على الإطالة ولكن أنا كنت عايز أوضح لكل من يريد شراء سيارة ( سايبا برايد ) بالتفصيل .

وللمرة الثانية شكراَ لكل الأعضاء إللى حاولوا إنهم يساعدونى فى الموضوع ( ألــــــــــف شـــــــــــكــــــــــــ ــــر )

حضرتك قبل الاتسلام تجرب كل شئ فالعربية
الانواروالتكيف والكاسيت وصوت الموتور وتشك على المية والزيت وعدة الشنطة والاستبن وكل شئ وبراحتك خالص

عاوزين مشاركات من المستخدمين يا ريت

اريد ان اعرف المطلوب لتقسيط السيارة دى ومنين وازاى الفايدة تبقى صفر والاستلام امتى وازاى