الموضوع: مطلوب تسعير لانسر موديل 92

العربية جميلة و معايا حتى الآن مشاكلها بسيطة و تتلخص فى الآتى:
* العربية واطية واطية جدا لدرجة انها تقريبا بتحك فى المطبات كلها حتى وانا لوحدى و الموضوع مزعج مع التحميل (لكن الحمد لله قوية جدا من تحت لدرجة ان كل ما افحصها لما تترفع فى الصيانة ما بتلاقيش اثر للحكات دى كلها) و الحق يقال كونها واطية بيديها ثبات رائع لو انت من هواة الجرى.
* الاكصدامات بتاعتها فبر بالكامل و راكبة كلها على كلبسات و بالتالى الكلبسات دى بتكون اول حاجة تتكسر لو حد غشيم ريح جامد على عربيتك و انت راكن او اتهورت و حاولت تزق عربية تانية بيها ، عشان كدة معظم اصحابها تلاقيه مركب الاكصدامات بمسامير لضمان بقائها فى مكانها.
*لابد من اخذ القطع القديمة المطلوب تغييرها عند الشراء و ذلك لوجود تشابه كثير فى قطع غيار موديلات اللانسر92 ، 93 ، 94 ، 95 ، 96 و تلاقى موديلات تركب قطع منهم على بعض و الباقى لا (يعنى مش علشان سلك الدبرياج بتاع 95 ركب فيها يبقى كل قطع غيار 95 تركب عندك ، مش صحيح).
* حاليا قطع غيارها الأصلية بقت اقل من الأول و لكن تقريبا كل قطع غيار الكورى (هيونداى اكسيل بالذات) بتركب عليها بالضبط و دى متوفرة جدا و بدون مشاكل و سعرها ممتاز و بتعيش كويس.
دى العيوب اللى انا شايفها فى عربيتى بعد عشرة 16 سنة دلوقت و لكن عندى سؤال بالنسبة ليك ، ازاى موديل 92 و لسة بوية فابريكة بره ؟؟؟ دى مجرد ما تركن عربيتك فى الشارع فى اى مشوار احتمال شبه اكيد ترجع تلاقى حد حكها او عيل خدها خط من اولها لاخرها بمفتاح او مفك ، هو صاحبها كان بيطلعها معاه شقته ولا مخبيها من ساعتها و مابيخرجش بيها؟؟
عموما ربنا يوفقك للى فيه كل خير لك ، و يبعد عنك شرها

والله يا باشا مش عارف اذا كنت افيدك فى موضوع السعر ولا لأن اصل كل ما اعرض عربيتى للبيع اسمع كلام و ساعة الجد كلام تانى ، يعنى لما اقرأ فى الوسيط على اللى زيها الاقى مطلوب من 40 الى 44 و بصراحة حالتها اقل من عربيتى و لما تتباع اعرف انها اتباعت فى حوالى ال 40 - 41 ، لكن لما قلت ابيع عربيتى قعدوا يقولولى تسوى 44 او 43 و ساعة ما قلت ok بدأ شغل التجار يقوللك تاخد كاش 38 او 30 و اقسط 12 و طبعا ده كلام مش منطقى ، ده غير اللى بيحاول يموت تمنها و لما تسأله (عن طريق حد تانى طبعا) تكتشف انها ابتدا يربط على بيعها بنفس الحدود 42 او 43 ، عموما اسأل و شوف الإعلانات و قارن و ربنا يوفقك ، هى فعلا عربية حلوة و انا عايز بس ابيعها علشان اجيب اكبر منها مش لانها وحشة ، بل بالعكس مش هاين على ابيعها بسهولة حتى الآن و مجل شراء جديدة بسبب كده ، و الله الموفق