الموضوع: تعديل الفرامل الامامية اللانوس

لسه راجع من الشغل، و الحمد و الشكر لله أولا ثم كل الشكر تانى لأخويا محمد ممدوح

الحكاية انى وانا راجع من الشغل و بعد ما عديت الأزهر بارك فى اتجاه المقطم، بيبقى الطريق نازل جامد، سواق عربية نص نقل مجنون اخد غرزة من قدامى و اتزنق راح فرمل جاااااامد و انا بدورى فرملت، فرملة من اللى تخلى صوت الكاوتش مسموع على بعد كيلو، و الحمد لله الحمد لله ربنا سترها معايا قوى لأن الطريق منحدر قوى و كنا ماشيين حوالى على 70.

المهم فى الموضوع يا اخوانى انى كل يوم باتأكد ان تعديل الفرامل ده أحسن حاجة الواحد يعملها فى اللانوس، بل انى ممكن اقول انه ضرورى، لأنه بمنتهى البساطة، الفرامل الأصلية مكنتش هتنجدنى و لكم ان تتخيلوا اللى كان ممكن يحصلى، و صدقونى كلامى ده مش انفعال عاطفى علشان الموقف ده، بس العربية بسم الله ما شاء الله كلبشت فى الأرض بصورة رائعة، و علشان اوضحلكم الصورة، تخيلوا معايا الشعور اللى بييجى لكتير مننا فى المواقف اللى زى دى و تبقى مش عارف هتقف و لا هتخبط، فى الموقف ده كنت عارف انى هقف و مكنتش بقرب من العربية اللى قدامى، كنت انا اللى متحكم فى العربية و مفيش اى نوع من الزحلقة، بل كلبشة بنت كلبشة من ضهر كلبشة :d

ربنا يكرمك يا ممدوح