مساعدة ضروري من المهندس طارق واحمد في لانسر ex

**ebo123** · 07-02-2008 08:23 PM

اخويا معاه لانسر ex 2008 الشكل الجديد واتخبطت وهي واقفة

المهم راح عمل محضر وراح شركة التامين قالولوة تروح التوكيل وتشوف لو ينفع تتصلح هنصلحها لو مينفعش هنجبلك واحدة جديدة

راح التوكيل علشان يشوف الموضوع دة قالولوة لازم تكون حاجز علشان نشوف العربية فلما حجز قالولوة تيجي يوم 8 /4/2008

والحجز دة علشان العربية يشوفوها تتصلح ولا لآ يعني نقعد شهرين كاملين علشان يشوفوا العربية تتصلح ولا لآ وبعد كدة يقرروا تتصلح ولا التامين يجيب واحدة جديدة

فهل فعلا دة صحيح ولا هما بيهرجوا؟؟؟؟؟ ومفيش طريقة علشان نقدم الحجز

العربية ما بتمشيش ومحتاجة ربع خلفي

اسف علي الاطالة ارجو الرد سريعا

**ebo123** · 09-02-2008 02:04 PM

ارجو الرد من المهندس طارق زويل

**أبوسيف** · 09-02-2008 02:20 PM

لو انت اتصلت بمركز جسر السويس حاول تجرب مع مركز قليوب بيكونوا أروق شوية من جسر السويس وربنا يعوض عليكم

**ebo123** · 09-02-2008 02:22 PM

شكرا علي ردك بس علي فكرة بتوع قليوب قالوا تاريخ ابعد من شهر 4

**مصراوي جدا** · 09-02-2008 02:43 PM

انا سألت لحضرتك في الاستقبال على الموضوع ده

فوجئت اننا في قليوب عندنا حجز لـ 120 عربية حوادث برضه منتظرة عمل مقايسة

هو طبعا اللي بيتم في الموضوع ده ان مهندس مختص بالمقايسات بيعاين العربية بدقة وبيحدد عايزة ايه قطع غيار واصلاح وبيتم تسعير قطع الغيار المطلوبة والاصلاح وعمل المقايسة بالتكلفة الاجمالية وتقديم المقايسة دي للعميل اللي بيقدمها للتأمين وبيتم اخد الموافقة على الاصلاح او مناقشة بعض البنود او لو كانت الحادثة جامدة والتكلفة عالية بيتم احتسابها Total Loss

عموما حضرتك كلمني بكره الصبح في مركز خدمة قليوب 42157629 وباذن الله نقدر ناخد موعد قريب شوية