المشاركة الأصلية كتبت بواسطة ziabassem
الأخوة الأفاضل أسعدني النقاش معكم وخصوصاً مع Yoko و memononos بس حبيت أوضح وجهة نظري أنه حتى مع التقويات ممكن يكون فيه مخاطر .. لأن كل عربية الصانع بتاعها بيحاول يطلعها في أحسن صورة وأقل تكلفة وفقاً لحسابات ودراسات قبل العربية ما تتعمل .. فمش من المنطقي أنه يعمل عربية مصممة على أنها تشيل موتور 1300 ويصرف على مكونات أساسياتها أنها تشيل 1600 .. ومثال على ذلك 128 نفسها فيها مواتير 1100 ومواتير 1300 واليارس فيها 1300 و 1500 .. وحيبقى من الصعب أسقط فيها مواتير أكتر من كدة .. وبكرر من الصعب مش مستحيل .
تعالوا بقى نفكر مع بعض التعديل يبقى في أيه .. أقولك على مثال حي بينا في المنتدى هنا وهو محمد ممدوح اللي عدل في فرامل اللانوس بعد دراسة وتفحيص وتمحيص (وأنا بعتبرها براءة اختراع اللي عمله ده وتعديل على شركة عالمية زي لانوس) وقدر أنه يعلى قوة وكفاءة الفرامل .. وليه أحنا مالكي 128 منفكرش ازاي نعدل الفرامل ونخليها أقوى (وخصوصاً لو سقطتلها موتور أكبر زي ما بتقولوا ، وإلا حتعمل زي ممدوح عبد العليم ونقول بعد ما نسقط المواتير مبيعرفش يوجفها .. مبيعرفش يوجفها) أو منظومة التبريد بتاعة 128 اللي معظمنا بيعاني من السخونة بتاعتها وخصوصاً في فصل الصيف .. ده بقى الكلام الصح في التعديلات .
ما أنا واحد من الناس اللي مسقط موتور لانشيا 1300 والحمد لله بيديني اللي أنا عاوزه من غير أي لعب وتعديلات والحوارات دي .. وبجيب 140 و 150 هي فرقت يعني حجيب السرعة دي في أد أيه .. وخصوصاً أن شوارعنا متستحملش أصلاً الجري ده .. وتحياتي للجميع