الموضوع: اخبار قطع غيار التيدا جوة وبرة التوكيل؟؟؟

اذا كنت حضرتك بتبص من ناحية قطع الغيار المنتشرة بره التوكيل وبتبص على قطع غيار الارخص يبقا ابعد عن التيدا ,لان فكرك واضح انك بتدور على الحاجة المنتشرةفى السوق من كل حاجة سواء من ناحية قطع الغيار او بيع العربية بسهولة و وده مش متوافر فى التيدا
مع انى اشتريت التيدا بتعتى مستعملة وصاحبها بعهالى بالسعر المظبوط مش خسر فيها كتير , يعنى فى اعادة البيع متظلمتش وظلمتنى انا فى الفلوس هههههههه, يعنى كل اللى بيتقال كلام فى كلام من الناس ومش عن تجربة

التيدا قطع غيارها مش منتشرة بره التوكيل , وسعر قطع غيارها جوة التوكيل متوسط مش غالى اوى و واذا كان غالى اوى زى ما حضرتك بتقول , اوكيه بص على القطعة الغالية اللى حتغيرها دى حتغيرها كل قد ايه ؟! ومتنساش انك بتجيب قطعة غيار يابانى واصلى , يعنى حتدفع اه بس حتمشى مرتاح ومش حتشيل هم تغيرها فى فترة قريبة ,
مع التيدا مش حتحتاج تغير الا الحاجات الدورية زى تيل فرامل وفلتر هواء وفلتر زيت فقط , وبعد لما تعدى ال100 الف ممكن تتكلم بقا فى الحاجات التقيلة اللى فيها , و كمان متنساش بعد كام سنة سعر قطع الغيار بتقل , واللى بيسال على قطعة غيار دلوقتى اكيد بتكون غالية لان بتكون موديل السنة , ولو احتجها بيكون لقدر الله عمل حادثة , وغير كدا حتى لو احتجت حاجة كبيرة فى المكيانيكا قبل 3 سنين او فى خلال ال100 الف كيلو بتتغير عليهم هما عشان الضمان

فى ناس معاها العربية بقالها 3 سنين وفى ناس عملو 80 الف تقريبا من الاعضاء معانا , ولما يدخلوا حيقوللك نفس الكلام مغيروش غير الحاجات الدورية , وفى موضوعات عن التيدا كتير ادخل واتاكد من كلامى

التيدا عربية مش حتشيلك همها فى الميكانيكا , و حتخليك تستمتع معاها وتحس بادائها , وطبعا فى فرق فى بين التيدا والصنى فى حاجات كتير , وموجود فى القسم بردوا مقارنة بين الاتنين لاخونا احمد كمال ,

واذا كنت بتقول ان فى فرق ال30 الف بين العربيتين اكيد حيكون واضح ومنه كمثيل صغير جودة تقفيل وحاجات اخرى كتيرة لصالح التيدا اللى تقفلها فى اليابان , وجيه على مصر عدل

بس ليه فرق 25 الف او 30 الف بين الصنى والتيدا , ممكن تجيب التيدا اللى 115 الف وممكن يكونوا عاملين عليها خصم كمان ويطلع الفرق 12 الف فقط اذا حبيت تجيب اول موديل للتيدا


عاملة اذا بتدور من الناحية العملية اكتر وتوفير فرق السعر بين السيارتين وانت محتاجه يبقا اكيد انت اولى بيه , وربنا يوفقك

تقبل تحياتى