الموضوع: ايه هي المصايب و الكوارث اللي حصلت لك من عربيتك النيسان صني المصري

السلام عليكم
انا بقالي مدة بأفكر اكتب الموضوع ده
علشان بصراحة الواحد بيسمع كلام ينرفز
قال ايه " عيوب العربية" و مش عارف "التقفيل المصري" ماله
و ياترى اشتريها برغم عيوبها
و ياترى انا اللي اشتريتها انضحك علي
اصل العربية ضيقة شوية
اصل صوت الموتور عالي حبتين
مش عارف ايه بيزيق
الريموت وقع مني و باظ اصل ده عيب خطير في العربية
حكّيت (من الاحتكاك مش الحكايات) حكيت في ميكروباص النهاردة و انا مش واخد بالي الظاهر العربية دي وحشة
باقول لمراتي الصبح صباح الخير قالتلي #$%%$$#@@#$$ اتاري السبب من التقفيل المصري(بتاع مراتي؟؟ قصدي بتاع العربية)
و حاجات من هذا القبيل
فأنا نفسي اللي العربية عملت فيه مقلب بجد ولا مصيبة بسبب عيب جوهري فيها يقول
خلينا نتعلم
انا عن نفسي هاحكي علي مصايب العربية دي معايا
اولا عربية ياباني: مصري و لا مش مصري بس ليها اب و ام معروفين يعني بنت عيلة
ثانيا موتورها شديد زيادة عن اللازم و بتجري و تشد و الواحد مشغل التكييف و مركب العيلة و مالي الشنطة و بصراحة دي حاجة تضايق منها, هو فيه كده ,مش مفروض تتعب زي باقي العربيات
كمان ثابتة زيادة عن اللازم
عفشتها جامدة يعني متينة و فعلا زي ما بيقولوا خدمة شاقة
و اخيرا و اللي مزعلني منها جدا ان عمرها ما عملت في فصولات بايخة
عمرها ما عطلت على طريق زراعي و لا صحراوي
على طول من البيت للتوكيل و من التوكيل للبيت
دور المفتاح و اجري- دوس فرامل تقف
شيءممل جدا
الواحد نفسه كده يتعمل فيه اللي بنقرا عنه في منتديات "ك$$" و لا "ش@@@@@@@" و لا حتى العربيات "الص....*" و لا بلاش احسن فيه ناس بتتضايق لو حد جاب سيرة الكهربا اللي بتقطع و لا السخونة اللي عالتابلوه و لا ملاعيب العفشة و لا مداعبات التوكيل للعربيات الوكيل و الخليجي. مع ان الحاجات دي شكلها مسلية جدا
الخلاصة
هنا في منتدى "نيسان حكاوي" عملنا سعر الدقيقة "ببلاش" علشان اللي عنده قصة يعرف يحكيها
مع تحياتي
د.عيد

المشاركة الأصلية كتبت بواسطة ahm128

جيت اقفل السيارة بالريموت اكتشفت ان الريموت لايعمل على طول جيه فى دماغى الموضوع اللى قرأته عن عطل الريموت وقررت اخاطب كاتب الموضوع وحجز صيانة عشان الريموت المهم طلعت البيت اريح ونزلت بعد نصف ساعة وكانت المفاجأة - اكتشفت ان الباب الخلفى كان مفتوح كشان كدة الريموت مكانش شغال

حصلت معايا مره .... و قلت عيوب التقفيل المصرى ظهرت .... خصوصاً إن المفتاح وقع منى أول م نزلت من العربيه
بس فى خلال دقائق إكتشفت فعلاً إن فيه باب مفتوح

المشاركة الأصلية كتبت بواسطة fady_anis

عندك حق
فى ناس كتير اوى بتحب تهول من الامور وتكبرها اوى
وانا شخصياًً قرأت فى المنتدى هنا كلام يغيظ زى الموضوع بتاع الريموت اللى باظ وصاحب العربيه قال انه حاسس انه شرب العربيه دى والعربية دى بايظه من االاول بصراحه ده اكتر موضوع غاظنى .. ريموت ايه اللى لما يبوظ تبقى العربيه بايظه واخد مقلب فيها !!!!!!!
كلام يغيظ اوى
وغيره وغيره

اى نعم التقفيل المصرى فيه شوية هفوات بس عمرها ما أثرت على اداء العربية وده اللى حصل معايا
لغاية دلوقتى نشكر الله عمرها مخذلتنى بل بالعكس دايماً بتنقذنى

ياريت يا جماعه منتلككش للتقفيل المصرى بالشكل ده وكأنه تقفيل الكفار او ناس مبتفهمش فى العربيات وبيركبوها آى كلام ولا كأن العربية دى تبع شركة نيسان اليابان المعروف عنها العراقه والجوده

المشاركة الأصلية كتبت بواسطة mido90

احسن عربية فى فئتها بلا منازع

+9999999999999999999999999999999999

مره سبت الأولاد فى العربيه و نزلت أشترى حاجه و رجعت و بعدين فجأه لقيت زجاج الأبواب مش شغال .... قلت التقفيل المصرى ظهر ... و قلت أول م أرجع البيت هعمل موضوع هنا عن الحكايه دى .... و على م وصلنا البيت خدت بالى إن فيه مفتاح جنب السنترال-لوك ... قلت يمكن يكون بيعمل لوك لزجاج العربيه ... و فعلاً لما ضغطت عليه لقيت الزجاج بيطلع و ينزل تانى .... و كانت أول مره أشوف الزرار ده ... و طبعاً الزرار ده ميزه كبيره جداً علشان لما الأولاد بيبقوا قاعدين ورا بيلعبو فى زراير الإزاز .... ف مبقيتش أزعق و لا أقولهم حاجه ببساطه شديده بقيت أعمل لوك للإزاز من الزرار ده و خلاص