يا جماعة ردو عليا ضروري

**ahmedali** · 30-05-2010 06:56 PM

يا جماعة عاوز اعرف حاجه لو لا قدر الله العربية فصلت كهربا وانا على سرعة عالية الفرامل بتحجر الواحد وقتها يتصرف ازاى يعنى ده هيادى لحادثة كان مافيش فرامل ولا اعمل ايه يا ريت تفيدوني ضروري لان مره عندى المشط اتهز وفصل كهربا بس كنت ماشي بالراحة عاوز اعرف هل الفرامل بتكون محجرة بس شغالة ولا ايه انا عربيتي ابيزا 94

**okasha_79** · 30-05-2010 08:37 PM

الحل بسيط اوي
إتشاهد

انا بهزر معاك ما تزعلش
انا ما اعرفش والله

**Abouhaidy** · 30-05-2010 08:59 PM

على قد معلوماتى البسيطة
لو العربية فصلت كهربا وده معناه انها بطلت
هتتصرف حسب الموقف اللى انت فيه
يعنى اول دوسة فرامل مش هتحجر معاك لكنها هتبتدى تحجر
وحاول بعد كده بفرامل اليد ومتشدهاش مره واحده

**John_Samy_1** · 30-05-2010 10:20 PM

متألقش واهم حاجة متتبرجلش في موقف زي ده
كل الفرامل بتاعتنا بتكون هايدروليك مش كهربة. بس فيه عربية بتستخدم الكهربة مع الهيادروليك عشان تعمل حاجة اسمها BA - Brake Assistance افتكاسة كده ممكن اشرحها لو حضرتك تحب. في حالتك الفرامل هتكون بس اتقل شوية يعني هتحتاج تدوس جامد عليها عشان تبقى زي الطبيعية. متنساش لو فيه حد بيزق عربيتك وهي مش دايرة وإنت دست فرامل هيلبس في الشنطة. كل العربيات هايدروليك عشان الكهربا بتحتاج كمبيوتر وده مش ممكن تعتمد عليه 100% وخصوصا في الفرامل ديه أروَّح. الفرامل الكهربة بتكون موجودة بس في عربية السبق أو الحديثة جدا وأعتقد موديلات معينة من BMW الجديدةEfficiency Dynamics.

http://www.carbibles.com/brake_bible.html

**ahmedali** · 30-05-2010 10:39 PM

متشكر يا جماعه على الرد انا فعلا كنت قلقان من الموضوع ده لانى لسا جديد في السواقه ما قابلتش مواقف كتير تقريبا ليا 6 شهور بسوق انا بسوق كويس بس لسا طبعا ما قابلتش الحجات دى يعنى افهم من كلام حضرتك John_Samy_1 ان كل الفرق انى هحتاج اضغط فرامل بقوة شوية عشان العربية تقف يعنى بتكون شغاله الفرامل بس اتقل شوية من العادي

**John_Samy_1** · 30-05-2010 11:58 PM

المشاركة الأصلية كتبت بواسطة ahmedali

متشكر يا جماعه على الرد انا فعلا كنت قلقان من الموضوع ده لانى لسا جديد في السواقه ما قابلتش مواقف كتير تقريبا ليا 6 شهور بسوق انا بسوق كويس بس لسا طبعا ما قابلتش الحجات دى يعنى افهم من كلام حضرتك john_samy_1 ان كل الفرق انى هحتاج اضغط فرامل بقوة شوية عشان العربية تقف يعنى بتكون شغاله الفرامل بس اتقل شوية من العادي

آه عشان مكنة الهايدروليك لو معتمدة على الكهربا عشان تكون سهلة بتفصل. كل الموضوع دوس جامد على الفرامل. ولو حسيت العربية ابتديت تزحف منك شيل رجلك ودس تاني جامد و بسرعة, من غير برجلة ولا عصبية. بالراحة خالص ومتقلقش. عشان ميحصلش زي اللمبي لما داس فرامل ودربدردياج مع بعض.
ربنا معاك ,ويسترها معانا كلنا.

**behman** · 31-05-2010 07:36 AM

[size="5"][/sizeاول حاجه زي اوكاشا ماقلك كده تتشاهد ههههه
ربنا يسترها علينا جميعا
انا الموقف ده حصل معايا و كانت بولو 99 و كانت عربيت واحد صاحبي علي الدايري و كنت ماشي 100 و بعدي من عربيه في الشمال
المشكله ماكنتش في الفرامل .. اد ما كانت في الموقف نفسه العربيه في الشمال و علي شمالي مقطوره و يميني عربيه تانيه
و ورايا عربيه تالته ... و المفروض اني احضن علي اليمين بقوه الدفع و طاقه الحركه اللي في العربيه
ربنا ستر الحمد لله عشان انا واخد علي المواقف دي و عملت يجي 15 حادثه قبل كده و ربنا بيستر

**behman** · 31-05-2010 07:46 AM

و موضوع الفرامل ده بقي ليه موقف كوميدي جدا و غريب معايا
عربيتي فرطت كبالن و كنت جنب البيت ... قلت ازقها انا و اصحابي لحد هناك كده ... و اذ بينا واحنا علي منزل خفيف كده و بنزق العربيه نلاقي واحد اتحدف من اتوبيس و نزل اتكعبل ووقع قدامنا ب 5 متر تقريبا ... نايم قدام العربيه ... دخلت العربيه بسرعه و دست فرامل لقيتها حجرت و ماوقفتش !!!!! و زحفت ناحيه الراجل و اصاحبي بيحاولو يوقفوها و مفيش .. الابيزا تقيله و زي الطوبه عالارض
لقيت الناس اللي اتلمو عالراجل جريو من قدامي و العربيه قعدت تزحف لحد ما المسكين اللي نايم عالارض هو اللي وقفها
هههههههه ... و الراجل اتسرع و قال انا بموت ولا ايه ... طبعا لقا اكصدام و موتور فوق دماغه
بس الحمدلله ربنا سترها و ماتعورش و مجارالوش حاجه .... بس كان راجل فقري اوي بصراحه ههههههههه
:) :)
و احسن حل انك توقف العربيه لو علي سرعه عاليه و مافيهاش كهربا ... انك تسقط غيار واطي مع دوسه الفرامل و الهاند
يعني لو ماشي 100 ... انزل تالت ... و تاني ... و اول ... و معلش الفتيس هايتبهدل شويه بس اقل الاضرار

**ehab_mansour** · 31-05-2010 08:07 AM

العربية لما تفصل كهرباء = الموتور هيبطل وهو المسئول عن توليد قوة الشفط (الفاكيوم vaccum) اللي بيستخدمها سيرفو الفرامل الرئيسي عشان يضغط بيها علي الزيت ويضخه لبقية البساتم اللي في العجل عشان تضغط علي التيل وتوقف العربية
يعني المشكلة ان الموتور يبطل ومش شرط فصل الكهرباء لأن علاقة الفرامل بالموتور فقط في هذه الحالة بيكون معاك فرامل ضغطتين مثلا بكامل قوتها وطبيعية وبعد كده بتحجر معاك وبتحتاج ضغط جامد منك علي الدواسة عشان تلاقي فرامل وبرده بتكون ضعيفة بس ده كافي انه يوقف العربية حتي لو بطلت وعلي سرعة 100 عادي مش مشكلة

وزي ما قلك الأخوة برضه لو تأزمت الأمور استخدم تسقيط النقلات وفرامل اليد لكن اوعي تشدها جامد مرة واحدة وربنا يستر طريقك وطريقنا