الموضوع: يـا بروتونــاويــه ... ممكن نتكلم مع بعض شويـا , ممكــن ؟؟؟

المشاركة الأصلية كتبت بواسطة مصطفى_صديق

أيمون حبيبى....معلش هاتكلم بصراحة....طالما انت فتحت الموضوع .....وهاطول شوية

من سنتين كده..شوفت الجين تو ...اعجبت بيها جدا ، بس مكنتش أعرف عنها حاجة....بدأت أسأل عليها ، وأوقف اصاحبها فى الشارع وأسألهم ، وكان فى منهم اللى يقولى ، عربية حلوة أوى ، ومنهم اللى يقولى...عربية وحشة أوى .....وهى وجهات نظر طبعا ...بس زادت حيرتى ومبقتش عارف أكون عنها رأيى محدد....بس قلت فى نفسى أكيد انه الاختلاف ده مش فى صالحها...لأنها لو حلوة...كل الناس هاتقول عليها حلوة

أنا عارف طبعا إن القصة اللى أنا بحكيها دى ....قصة كل واحد أشترى العربية دى.....بس الصبر

وبدأت أدور على النت عن معلومات عنها ، وبالصدفة وصلت للمنتدى هنا ، النايل موتورز ، ودخلت قسم البروتون وبدأت أتابعه

وبدأت أقرا مواضيع لناس معاهم العربية وبيتكلموا عنها ، كلام واقعى و محايد ، نتيجة خبرات وتجارب مروا بيها

الاستاذ توت ، الاستاذ مزاجنجى ، الاستاذ احمد صيام ، الاستاذ مهاب ، وايمن الزعيم .... وغيرهم كتير... ياريت ميزعلوش منى لو نسيت أسماء كتير غيرهم....ناس تشعر من مواضيعهم بالصدق والامانة ، لاهو شغال فى التوكيل ولا ليه مصلحة ، بس بيقول رأيه بما يرضى الله ، علشان كده أنا حبيت القسم جدا ، وعلشانه حبيت العربية كمان أكتر...وبعد كام شهر وكام محاولة للشراء ....أخيرا اشترتها

أشترتها وأنا عارف عيوبها ، وعارف مميزاتها ......اشترتها وأنا مش مبالغ فى توقعاتى ، لاهى بى أم ولا هى مرسيدس ولا حتى تويوتا ، لكن هى عربية مختلفة ، ومحتاجة مالك مختلف

الناس اللى كانت بتكتب عن العربية ....تقريبا بطلوا يكتبوا ،،،والعربية الحمدلله انتشرت ،،، العربية هى هى ....لكن الناس اختلفت

يمكن زمان التوكيل كان أسوأ من دلوقتى كتير ، وقطع غيارها كانت أغلى ، وماكنتش موجوده برة التوكيل اصلا .....ومع ذلك كانوا بيشكروا فيها وحابينها ....صحيح كان ليهم ملاحظات عليها وعلى التوكيل ....لكن كانوا بيقولوا رأى واقعى وموضوعى ومحايد....وعلى اللى بيقرا الموضوع يشغل مخه ويقرر بنفسه هو عايز ايه وهايعمل ايه

بص بقى دلوقتى ايه اللى بيحصل

كل واحد عنده مشكلة...(.مع ان طبيعى ان العربية يبقى فيها مشكلة...ومفيش عربية مفيهاش مشاكل ولا عيوب صناعة) يقوم نازل وعامل توبيك وموضوع عن أن كل عربيات بروتون فيها وفيها وفيها ...من أول الفرامل المميته واستهلاك البنزين الرهيب ده غير علب الدركسيون اللى بتطلع صوت والاصوات المزيكا اللى بتطلع من كل مكان ....وغيره وغيره....لدرجة إن فى ناس شبهتها بتوك توك....الجين تو....توك توك....بالذمة ده كلام يرضى ربنا

طيب....هل أنت قبل ماتعمل التوبيك ده.....أتأكدت ان العربية فيها مشكلة كبيرة.....رحت التوكيل وسألت....هل انت متابع صياناتك الدورية ......حاولت تحل مشكلتك بالطرق المعروفة......للأسف .....لأ

أى صوت طالع من قدام.....يبقى علبة الدركسيون......واستهلاك البنزين رهيب.....حتى لوفى فترة التليين فى اول خمس الاف......والفرامل...مميته فى كل العربيات....رغم ان ناس كتير سايقين عادى وعايشين ماماتوش...بس دول أكيد مبيستخدموش الفرامل .....بينزلوا رجليهم على الارض ويوقفوا العربية

أنا واحد من ناس كتير اشتروا العربية بعد ماقروا كلام حقيقى وواقعى مكتوب عن العربية.....وبعد ماشترتها ومعايا بقالها اكتر من سنة....أحب أشكر كل الناس اللى كانو السبب انى جبتها.....مش لأنى جبتها....لأ...أشكرهم على صدقهم وأمانة عرضهم لعيوب العربية قبل مميزاتها...لأنى كونت عنها رأى سليم من قبل ماشتريها وتأكدت ان كل كلامهم سليم تماما بعد ماشترتها

دلوقتى بقى للأسف الشديد.....أنا لما بقرا المواضيع اللى فى القسم....بحس انى راكب عربية تانية خالص غير اللى الناس بتتكلم عليها......أمال اللى مش معاه العربية يعمل ايه.....

اللى مش بيحب الاصوات العالية.....ليه ماركبتهاش قبل ماتشتريها وسمعت صوتها وليه ماشترتش يابانى من غير صوت خالص

اللى مضايق من استهلاك البنزين...ليه اشتريت عربية 1600

اللى مضايق من صوت الهوا....العربية فيها حاجات تانية مهمة كتير أهم من اصوات الهوا

اللى مضايق من علبة الدركسيون اللى بتكتك فى حتة معينة بزاوية معينة فى مطبات معينة.....معلش استحمل فى عربيات تانية كتير علبة الدركسبون بتبوظ خالص ...مش بتطلع صوت بس......ويابانى كمان

انا أسف طولت عليكوا....القصد من ورا الكلام ايه

يازميلى العزيز.....وأخويا الكريم.....رأيك أمانة فى رقبتك هتتحاسب عليه....لأن غيرك بيقراه وبيقتنع بيه.....علشان كده لازم تراعى ربنا فى كلامك لانك ممكن تظلم حد...وممكن تأذى ناس كتير بكلمة...

العربية دى فاتحة الاف البيوت....من اول مسمار فيها.....لغاية حضرتك مابتستلمها

لو انت لاعب فى عربيتك ومغير فيها ومعدل فيها...يبقى لازم تقول قبل ماتشتكى وتوضح انك مغير فى اساسياتها....ولو انت متعرفش فى الميكانيكا....يبقى متتكلمش الا لما تتأكد من المختص...ومتعممش مشكلتك......لأن مش شرط المشكلة اللى عندك تبقى عند غيرك... ولو انت سواقتك عنيفة وقاسية يبقى تقول وانت بشتكى إن تيل الفرامل بيخلص بسرعة...والطانبير باظت قبل أوانها .......

يا أخى........العربية ليها توكيل مسئول عنها....خد حقك منه.....بالذوق والأدب والأحترام ....مكنش....فى قانون ومحاكم وقضايا تفصل بينك وبينه وتاخدلك حقك....لكن يبقى المنتدى مكان للأخذ بالثأر ده شئ مش سليم

طول عمر القسم مكان لنقد التوكيل ونقد السيارة .....لكن بكل موضوعية وصدق.....احنا هنا كلنا علشان نستمتع بعرابياتنا ونعرف عنها أكتر ونساعد بعض....والحمدلله القسم مليان ناس قمة فى العطاء ....ياريت نحافظ على وجودهم معانا ونساعد غيرنا زى ماغيرنا ساعدنا

أسف للأطالة....وياريت محدش يزعل من كلامى....كانو كلمتين كابسين على نفسى...ولازم أقولهم علشان أرتاح

السلام عليكم ورحمة الله وبركاته

حضرتك لخصت اللى كل الاعضاء عاوزين يقولوه وبرضه الكلام كابس على نفسهم شوية

بس فيه حاجة تانية يا استاذ مصطفى الناس اللى حضرتك دخلت وشوفتهم زمان على السايت كانوا شاريين العربية وفيه حاله من العشق ليها عشان شكلها عشان ثباتها او موتورها او لانها ماليزيه وكل الناس كانت عارفه كل مزاياها وعيوبها وعلى الرغم من كده اشتروها ولما طانوا بينتقدوا او بيوضحوا عيب فيها كانوا بيشرحوه باسلوب هادىء بعيد عن التهويل والصراخ والتهديد وتشويه سمعة العربية وبالمرة التوكيل .

كلنا عارفين ان استاذ احمد صيام كان عنده مشكلة كبيرة جدا مع التوكيل بسبب تكييف العربية كلنا عارفين انه توصل معاهم لحل ارضى جميع الاطراف بس حد شاف استاذ احمد بيشتم عمال على بطال او حتى كره العربية او كان من اللى بيحذروا الناس احذر سيارات بروتون فيها سم قاتل بالعكس الراجل من الناس الاكتف جدا خاصة على الجروب بتاع الفيس بوك وانا حضرت مقابلة كان هو احد منظميها ,

استاذ توت مثلا عمرنا شفناه اعد يهلل او يشوه فى العربية لو قابل اى مشكلة على الرغم انه انه معاه العربية بالموتور الكامبرو القديم من غير الفلتر الجديد ومتعرفش انه كان عنده مشكلة الا لما حد يساله ويقول كانت عندى واتحلت الحمد لله ده غير انه كان فى فترة من الفترات المدافع الاول عن بروتون فى المقارنات وجوه القسم وما ادراك بكم البذاءات اللى كان بيتعرض لها اثناء دفاعه عن العربية خاصة فى المقارنات ,

استاذ خالد حمدى اول من اشترى العربية فى مصر اللى مرة كان بيحكى انه اول يوم ركب فيه العربية سمع صوت فرقعة رهيب وهو ماشى مع اسرته وكان السبب ان العربية كانت لسه نازلة وكان فيه حاجة متعدلتش عشان الدركسيون اليمين اللى بقى شمال , حد عرف الموضوع ده اصلا او هلل وراح شتم فى العربية او فى التوكيل بالعكس الراجل بيمدح فى العربية كانها ملكة جمال العالم مع انها موديل 2006 يعنى نظريا اكتر موديل المفروض يكون فيه اخطاء .

واحد زى ايمن اللى بيبذل مجهود خرافى عشان اللى يعرفه واللى ميعرفوش لوجه الله تلاقى مقابل كل ده تلاقى واحد معندوش دم بارد ييجى يقولك ده تبع التوكيل بقى عشان الراجل بيساعدنا نتهمه بكده ولو بالتلميح ايمن ده المفروض بروتون تعمل تمثال والله ومش مبالغة ايمن ده بيعشق العربية وبروتون واحد اهم اسباب انتشار العربية فى مصر وكفاية الخصم اللى شجع ناس كتير انها تجيب العربية وكفاية المجهود الرهيب والتليفونات اللى بيعملها عشان خدمة اى حد وكفاية المجهود الرهيب اللى بيبذله عشان يجمع الناس فى المقابلات و اهتمامه بكل التفاصيل عشان محدش يبقى زعلان ومش عاوز اقول انه بيخسر فلوس احيانا فى المقابلات دى ,ده غير افكاره اللى على طول بيحاول ينفذها لنشر العربية والماركة بس مش عاوز اقول ربنا يسامحه .

انا ضربت امثلة بالناس دى لانهم هم اساس المنتدى وعلى الرغم من انهم اكيد اتعرضوا لمشاكل عمر ما حد عمل اللى بيحصل اليومين دول بل بالعكس بيزيد انتمائهم للعربية اكتر واكتر .

بعد ماكان القسم شعلة من النشاط اصبح زى البيت الخرب والقسم بقى اداة حادة لتخليص الحسابات والعداوات سواء بين الناس وبعضها او بين الناس والعربية او بين الناس والتوكيل .

اسمحولى اصنف البروتوناوية لفريقين

فريق بيحب بروتون ومنتمى ليها ومش عاوز اقول متعصب ليها زى انتمائه لفريق بيشجعه ومعندوش استعداد ان يبيع فريقه فى اى وقت او لاى سبب ويصبر على المشاكل مهما حدث .

وفريق شارى العربية بالسمع وزييها زى اى ركوبة والسلام اهى معايا فلوسها وخلاص وشكلها شبابى اعرف استعرض بيها بس معندوش استعداد انه يستحمل انه يلاقى هفوه ولو لقى هيطلع فى العربية القطط الفاطسة ويشرد بيها فى المنتدى وبين اصحابه ويطفش الناس منها ويحبطهم من وجود حتى امل ان المشكلة دى ممكن تتحل ده غير الافتاءات اللى تودى فى داهية يا جماعة بشروا ولا تنفروا بجد حرام والناس دى قرفت منها زى ما الناس التانية قرفت وطفشت .

واحد هيقولى انا بشترى عربية زيرو يعنى من حقى انى ملقيش فيها الهفوة هقوله عندك حق يا باشا وانا من دلوقتى ادعوا الناس تعمل موضوع فيه كل عيوب سيارات بروتون قبل مزاياها ويتم تثبيته عشان لما حد يلاقى عيب يبقى عارف ان ممكن يلاقيه وساعتها ميوجعش دماغنا اه هى فيها العيب ده والمزايا دى وساعتها محدش هيقول ان ملاكها بيضللوا الناس وبيغموهم لمصلحة التوكيل .

وهقول للناس دى برضه بروتون لا مديرها اتجرجر من قفاه قدام الكونجرس الامريكى واستجوبوه لغاية ما عيط وغرموا شكرته اللى هى تويوتا 16 مليون دولار مش عشان لقوا عيوب مميتة فى سياراتها لا عشان البهوات فى تويوتا كانوا عارفين بالعيوب دى من سنين ومقالوش وحصلت حوادث ادت الى موت العشرات وتهديد ارواح الألاف ولا هى نيسان ولا جنرال موتورز اللى طل يوم بيتسحب عربياتها من العالم كله عشان اخطاء مميتة فى الفرامل والعفشة

يا جماعة اللى مش عاجبه بروتون ميجبهاش ويشترى اى عربية شايف ان مستأمن على حياته فيها ومفيهاش اى مشاكل والعربيات على قفا من يشيل واللى عربيته مش عجباه يبيعها بدل ماهى بتوجع له ودنه كل يوم وهو ماشى وفيه مثل مشهور عندنا بيقول خسارة قريبة ولا مكسب بعيد .

يا ايمن كلنا عارفين الاسباب اللى طفشت معظم الناس من القسم وتحول القسم لقسم شرطة مش قسم بروتون وانا الصراحة بدعوا الناس القديمة دى انها تدخل تانى ولو بشكل خفيف خاصة فى المواضيع اللى موديانا ورا ولو الناس اتدخلت وعدلت مسار القسم اكتر من مرة اعتقد قسم بروتون هيبدا يرجع زى زمان والناس هتتشجع ونفسها تتفتح ويبقى فيه جديد زى زمان .

قلبت علينا المواجع يا ايمن

المشاركة الأصلية كتبت بواسطة BlackBerry

السلام عليكم

بالظبط...اوافقك الرأي أخي الكريم,

وكلام الاخ مصطفى ايضا اوافقه ومنطقي...ولكن يا عزيزي هذا اسمه منتدى حواري تفاعلي تشاركي, بالتالي وبالضروره ستجد مناقشات وانتقادات واستفسارات والمنتدى الحواري يوجد له مبادئه واساسياته وآدابه وليس الحجر على الراي الاخر وحرية التعبير, الكمال لله وحده يا عزيزي بالتاكيد لا تقصد ان يكون القسم كله مدح في السياره ولا التوكيل ولا الذم ايضا, لا يوجد افضل من اعطاء كل ذي حق حقه وبكل موضوعيه وامانه, وتأكد ان اي شخص قام بشراء بروتون فهو قام بشرائها عن اقتناع, ولكن ليس من العيب ان يطلب شيئا ما او يقوم بالاستفسار عن شيء ما, عندما تساعد شخصا اليوم فسوف يساعد اخرين لاحقا وهذا هو حق المجتمع(المنتدى) علينا.

وانا مثلك ضد اي انتقادات جارحه لاي شخص او للتوكيل, أخذ الحق حرفه, والادب هو أفضل اسلوب, ولكن هذا لا يمنع من وجود انتقادات غير جارحه او سرد لعيب ما فالبنهايه هذا مستهلك دفع ثمن سلعه وخدمات ويستحق الحصول على مقابل ما دفع, وهذه سلعه ربما يوجد بها عيب عام او عيب فردي فهي جماد ومن صنعها بشر, لا بروتون ولا التوكيل ولا ماليزيا من الملائكه ولا معصومين من الخطأ.

مجرد راي.

اخيك \محمد

تحياتي,

السلام عليكم ورحمة الله وبركاته

انا مش مختلف مع حضرتك تماما وانا مش بقول محدش يتكلم لا طبعا بس انا بتكلم عن الاسلوب ونوعية المواضيع وكيفية عرض المشكلة وحضرتك شوف كده الموضوع ده انا كاتبه من سنة وحضرتك هتعرف رايى اللى متغيرش و مش هيتغير عن الناس المحترمة واسلوب الاختلاف
و شكرا

http://www.nilemotors.net/Nile/80902-a.html