السلام عليكم ورحمة الله وبركاته
السيد المهندس طارق ،اتمنى ان حضرتك تكون بخير
بخير الحمد لله - اهلا بيك
انا ليا بعض الاستفسارات بخصوص اللانسر وارجو ان يتسع صدرك لها وتفيدني باذن الله
1-بخصوص اللانسر الخليجي 1600 بنزين 92 ينفع لها ام لا وهل استخدامه بياثر على اداء السيارة ويسبب انخفاضه او كركرة والاهم هل بيتلف حاجة في الموتور او السيارة عامة، حيث ان ال95 مش متوافر وغالي؟
95% من ملاك اللانسر الخليجي 1600 سي سي بيستخدموا بنزين 92 (وكتير من اعضاء منتدى ميتسوبيشي عندهم الخليجي1600 وبيستخدموا بنزين 92) بدون مشاكل فاطمن حضرتك من الناحية دي
2-هل الرواس جدد فعلا مع ميتسوبيشي ام ميتسوبيشي اليابان سوف تختار واحد من ثلاثة وكيل جديد في يوليو حسب الخبر المنقول من جريدة الفجر؟
للأسف معنديش اي اخبار مؤكدة عن الموضوع ده وباذن الله ابلغ اعضاء المنتدى اول ما تتوفر معلومات مؤكدة
3-لانسر 1600 المصري هل هي 105 حصان ام 122 حصان مثل الخليجي؟
الجزئية دي محتاجة توضيح
يعني من موديل 2003 الى 2009 كانت ميتسوبيشي عاملة كتالوج المصري والأردني بصافي الأحصنة يعني الفعلي الراكب على العربية وكانت فيه 107 حصان صافي وعملت كتالوج الخليجي باجمالي الأحصنة (يعني المحرك في الهواء بدون تركيبه على العربية) ومذكور في الكتالوج انه 122 حصان اجمالي
ثم جاءت في كتالوجات 2010 (واعتقد اصلا المحركات لم تتغير) وعملت كتالوج المصري والأردني ان المانوال 105 حصان صافي والاوتوماتيك 106 حصان صافي وفي كتالوج الخليجي عملت المنوال والاوتوماتيك 107 حصان صافي (ولم تذكر الاجمالي كالسابق)
4-استهلاك اللانسر 1600 في الصفيحة (الاتوماتيك مثلا) (نظريا وعمليا) لاني هنا ارى ان الارقام متفاوتة ،ناس تقول 180 كم/الصفيحة وناس تقول 280 وناس 220 وناس 160 وناس تقول 370 للتانك كله (يعني حوالي 150 للصفيحة) فالتفاوت كبير
الاختلاف سببه انه لا يمكن حساب الاستهلاك داخل المدينة لأنه يعتمد على حاجات كتير : ماشي على سرعة كام - بتحرق على المحرك ولا لأ - مشغل التكييف ولا لأ - بتوقف في الزحام ولفترات قد ايه (ممكن واحد يستهلك 10 لتر خلال وقوفه على كوبري 6 أكتوبر يوم الخميس مثلا)
انما الحساب المظبوط بيكون القيادة لمسافة لا تقل عن 40 كيلو متر بسرعة 90 كيلومتر/ ساعة وبدون تكييف وتشوف استهلكت فيها كام لتر
واعتقد الرقم المفروض يكون هو 250 كلم / الصفيحة
5-سحب السيارة 1600 الاتوماتيك معروف انه اقل بنسبة من المانيوال فكم هذه النسبة (10% - 30% ؟؟؟) وهل سحب الاتوماتيك فعلا ضعيف مقارنة بالسيارات الاخرى من فئتها؟
هو طبيعي ان سحب المانوال اكتر من الاوتوماتيك انما بنسبة بسيطة وبالنسبة لللانسر 1600 اوتوماتيك فسحبها لا غبار عليه اطلاقا وكل ملاكها لا يشتكوا منها اطلاقا (بخلاف 1300 سي سي الاوتوماتيك هناك عدة موضوعات في المنتدى عن ان سحبها ضعيف)
6-اخيرا حضرتك تنصحني بايه اجيب 1600 مانيوال ولااتوماتيك - مصري ولا خليجي علما باني من هواة الجري لكن باعتدال واكيد عايز العربية تسعفني وبسافر كتير وباحمل العربية وباجري بس على الطرق السريعة وبروح حتت متبهدلة في البلد عندنا في الشرقية بس بحافظ على العربية عامة
اعتقد 1600 أوتوماتيك هي الحل الأمثل لوضع الطرق في مصر بشكل عام
وموضوع مصري او خليجي فهو يفرق في الضمان يعني لو خليجي انصحك تجيب عربية بضمان انما المصري طبعا لها ضمان 3 سنوات او 100 ألف كيلو
وجزاك الله كل خير يا مهندس طارق وربنا يجعله في ميزان حسناتك باذن الله
المفضلات