برجاء المساعده يا اهل الاكسنت

**محمد بلال** · 05-06-2010 01:44 AM

انا معايا اكسنت 1999 ، 1500 سى سى
1- عداد السرعة مش بيتحرك لما اكون على سرعة بطيئة يتحرك عند السحب على الغيار الثالثهل ده طبيعى
2- االعربية بتعمل معايا 200 ك فى الصفيحة بدون تكييف هل ده طبيعى انتو بتعمل معاكم كام كيلو
3- الاريال بتاع الراديو اتكسر بس الموتور بتاعه شغال لما اجى ابطل العربية اسمع صوت الموتور كأنه بيلم الاريال ايه الحل فى الاريال هل يتغير كله ولا ممكن اجيب القطعه النيكل بتاعته اللى بتطلع وتنزل واجيبها منين وبكام
وشكرا لكم

**karkor_12** · 05-06-2010 02:24 AM

بالنسبة لاريل الموتور أنا عندى نفس المشكلة الاريل مكسور بس لما أبطل العربية الاريل بيلم نفسه عينى الموتور شغال ده عادى متقلقش من الحكاية دى خالص اوك بالنسبة لحكاية 200 كليو فى الصفيحة أنا الصراحة مش بعرف أحسبها وياريت تقولى بتحسبها ازاى

**محمد بلال** · 05-06-2010 06:59 AM

المشاركة الأصلية كتبت بواسطة karkor_12

بالنسبة لاريل الموتور أنا عندى نفس المشكلة الاريل مكسور بس لما أبطل العربية الاريل بيلم نفسه عينى الموتور شغال ده عادى متقلقش من الحكاية دى خالص اوك بالنسبة لحكاية 200 كليو فى الصفيحة أنا الصراحة مش بعرف أحسبها وياريت تقولى بتحسبها ازاى

ببساطة اخلى تنك الوقود شبه فارغ وبعد كده امون صفيحة فقط ثم اسجل فراءة العداد ولما امون العربية تانى لما التنك يبقى شبه فارغ أسجل قراءة العداد واطرح الرقم من الرقم اللى قبله ...
أو فى عداد صغير فوق العداد الكبير بصفر العداد الصغير بالضغط على البنز اللى طالع من عداد السرعة اول ما أمون ويكون التنك شبه فارغ واسيب العداد يحسب من نفسه لغاية لما امون الصفيحة التانية ..
وخلى بالك بالتكيف ولا من غير تكييف ، داخل المدينة ولا على الطريق السريع علشان الموضوع يفرق
وتقبل مرورى

**بحري** · 05-06-2010 08:20 AM

١- لأ كده مش طبيعي وفي ناس متخصصة في العدادات ممكن تراجعهم
٢- أنا عندي بتعمل كده تقريبا بس عندي أتوماتيك فالمفترض إن عندك تعمل مسافة أكبر، لكن الموضوع تحكمه عوامل عديدة (حالة الموتور، الكهرباء، العفشة، الكاوتش، طريقة القيادة، حالة الطريق، حالة البنزين نفسه)
٣- أنا متهيألي ممكن تشنري القطعة النيكل دي أو توفقها، أخي اشترى لي الإريال كامل بالموتور استعمال خارج من الحرفيين بـ ٧٠ جنيه
بالتوفيق لكل خير

**essam_shaaban** · 05-06-2010 12:15 PM

1- غير السلك الحراري بتاع عداد السرعة عند اي بتاع عدادات وده سعره في حدود 25 :30 جنيه

2- 200 كم / الصفيحة قليل المفروض يكون 280 من غير تكييف و 260 او 250 بالتكييف شوف مركز بالكمبيوتر يظبط لك الحساسات وفيه كمان سائل تنظيف رشاشات ب40 ج مع سائل امريكي بيتحط ف التانك يعملوا تنظيف لدورة البنزين مع تغيير فلتر الهواء والبنزين و هتحس بالفرق
اما لو مظبطوش معاك ممكن تروح ورشة الصفا عند السندباد بياخدوا 75 ج ظبط كربراتير او رشاشات و تنظيف الدورة وبوجيهات وخلاقه

3- الاريال ممكن تشتريه استيراد كله كامل بالموتور بيتراوح من 70 : 100 حسب فصالك مع المحل

**محمد بلال** · 05-06-2010 07:21 PM

شكرا اخى بحرى واخى عصام على ردكم
معلش العربية عاوزه كوبلن شمال هل اغير الجوز مع بعض وبكام وايه افضل نوع ممكن اشتريه

**بحري** · 05-06-2010 08:29 PM

مفيش ماركة معينة ولكن في كوري وفي صيني والكوري أفضل طبعا
السعر مش فاكر قد ايه ولكنه مش كتير على أي الأحوال..الأكسنت حاجته كلها رخيصة نسبيا ولا أظن أن الاثنين ممكن يتجاوزوا ٣٠٠ جنيه جداد بالضمان
الأفضل طبعا تغيير الاتنين مع بعض ولو في واحد سليم ممكن تخلعه وتخليه عندك احتياطي
بالتوفيق