الموضوع: كيا برايد بتطبل منى وأنا على الرابع

هو ما فيش حد عنده فكرة عن العيب ده يتصلح إزاى؟؟

حصلتلى يا باشا و فى نفس عربيتك بس 99 و بعد كده كمان الموضوع بقى أسوأ و باقت تدور بالعافية و ارميها وكلام من ده
و دخت من ميكانيكى لكهربائى و محدش عارف السبب
وكله بيفتى غيرت بوجيهات ونضفت الكاربيرتير و فكيت الاسبراتير و نضفت مشط الكهرباء
لغاية لما عملتها مرة و حلفت ما هى دايرة و بعدين جبت كهربائى
و المفاجأة طلعت موبينة يا باشا و الحمد لله بقت زىّ الفل من ساعتها

يا باشا شاكر لإهتمامك جدا وشاكر ردك قوى
يعنى أغير الموبينة ... تسلم ياباشا

العفو يا باشا انا معملتش حاجة

كفاية إهتمامك بالرد
ألف شكر مرة تانية وإن شاء الله يوم الجمعة هاروح اعملها

السادة أعضاء المنتدى الكرام
أنا روحت يوم الجمعة اللى فاتت للميكانيكى علشان أشوف حكاية العربية دى إيه. واسمحولى اشرح لكم بالتفصيل إيه اللى حصل
وصلت عند الميكانيكى وشرحت له الموضوع إيه قالى افتح الكبوت وأول حاجة بص على البوجيهات وقال البوجيهات سليمة ياباشا يعنى مش مشكلة كهربة، دور العربية يابشا روحت مدور وقعد يلعب شوية فى الموتور ويسمع صوته وقال بطل العربية، بطلت، خير يا أسطى قالى إن شاء الله بسيطة هابص بصة سريعة على فلتر البنزين وانضفه وعمل كده فعلاً (رغم إن الفلتر جديد) وقالى اطلع جربها وتعالى ... جربت العربية وما فيش خمسين متر وبطلت روحت راجع له ... قالى طب نشوف الموبينة كده ... ودور وبطل ومش عارف إيه وبعدين طلعت الموبينة سليمة ومافيهاش حاجة ... قال يبقى نظبط هوا الكربيراتير وقعد يلعب شوية ... بصراحة صوت الموتور كان عالى شوية وفى رجه فى العربية لما أكون واقف ودول راحو لما ظبط هوا الكربيراتير ... جرب ياباشا وتعالى قلت له لأ تعالى معايا واحنا بنجربها علشان تشوف بنفسك ... طلع معايا والمرة دى مشيت شوية كتير من غير ما تبطل وقالى الحمد لله اتحلت ... بصراحة فرحت قوى وانا برجعه الورشة وقبلها بكام متر راحت بطلها تانى والمرة مش عايزة تدور ... شوية ودارت فقالى طب افتح الكبوت وقعد يبص على حاجات كتير كده ويلعب فى العربية وبعدين قالى:
ياباشا عربيتك مافيهاش حاجة مش مظبوطة ما فيش حل غير نضافة الكربيراتير بقى ... قلت له أنا منضفة مرتين فى شهرين مش معقولة يكون العيب منه ... رد بثقة وقال كل حاجة فى العربية تمام لكن فيها شوية برجلة خفيفة ودى ماتحصلش غير من الكربيراتير وطالما منضفة مرتين فى مدد قريبة يبقى لازم نكشف عليه يمكن يكون العيب من الباب (باب الكربيراتير) ولو العيب فى الباب ده هيتكلف أكتر من 100 جنيه علشان كده نصيحة منى اشترى واحد استيراد أحسن فى حدود 150 جنيه وإن شاء الله العربية هاتتظبط تمام. قلت له طب اوصفلى حد بتاع كربيراتير يكون كويس علشان مش عايز أرجع لنفس الشخص اللى نضفه مرتين قبل كده ومحصلش حاجة ... وصفى واحد وقال إنه كويس قوى ... وإن شاء الله هاروح له فى خلال كام يوم كده.

وشكراً جداً لكل اللى تعب معايا فى المشكلة دى وشكراً لكل اللى اهتتم واقترح عليا حل ويارب أخلص بقى من مشكلة العربية.

و الله ربنا يكون فى عونك
بص هيا العصفورة أصيلة بس لما بتعملها بتعملها صح
وكل الميكانيكية بيغلبوا معاها و يعدوا يجربوا كل حاجة
و ربنا يكرمك و ترجع زيرو ان شاء الله