طبع قبل ما ابدأ الموضوع انا عملت الموضوع دة لأى حد بيسأل على حوار المية الخضرا وازاى تتعمل وبالاخص طنانى اللى لسة مقتنع ان المية الخضرا ملهاش لازمة وبيستعمل مية مقطرة بس وبنحاول نقنعة انة يعمل مية خضرا
الموضوع دة متجرب فى اكتر من عربية بدون مشاكل نهائيا
اكتر تجربة كانت على عربية مازدا 1982 لمدة 24 سنة و 214000 كلم بدون فك ايا من اجزاء دورة التبريد نهائيا (تم تغيير طلمبة المية مرة واحدة فقط) وبدون اى مشاكل

فى البداية هوضح كام نقطة بس
المية الخضرا عبارة عن اثيلين جليكول + مية مقطرة
طبعا المية المقطرة علشان الاملاح والشوائب والكلام الحلو دة
فايدة الاثيلين جليكول انة بيزود رينج درجات الحرارة بمعنى انة بيقلل درجة تجمد المية وفى نفس الوقت بيرفع درجة غليانها ودة اللى يهمنا دة غير انة بعمل على تزييت الاجزاء المنتحركة فى دورة المية زى الطلمبة طبعا ودة بيحافظ عليها ويزود عمرها

طيب اية فايدة انة يرفع درجة غليان المية:
1- درجة غليان المية العادية عند 100 درجة مئوية وبالتالى المية بتتحول لبخار
الحجم النوعى للبخار اعلى من السائل وبالتالى محتاج مساحة اكبر وبما ان الدورة مضغوطة ومحكمة دة معناة ضغط زيادة جوة دورة المية وبالتالى مع الوقت هيبتدى يأثر على اجزاء الدورة ويحصل تسريب

2- كفاءة المية فى التبريد اعلى من البخار يعنى كفاءة التبريد هتقل



نيجى لطريقة الشغل

1- هنشترى علبة اثيلين جليكول من البنزينة ( فى انواع كتير بس دة انضفهم وانضف من cyclo عن تجربة)
تمنة كان حوالى 30 جنية مش فاكر كام بالظبط علشان كنت شارية مع حاجات تانية





2- مية مقطرة - فكترا بى لو فاضية تماما بتاخد حوالى 7.2 لتر (تمن العلبة دى 2.5 جنية)
او ممكن تجمع مية التكييف فى جركن او جردل وتستعملها ( طبعا انضف واضمن)




طريقة التغيير:

1- طبعا فى الاول هتصفى المية وتغسل الدورة ( بصراحة انا استسهلت لأن مكنش عندى وقت ومكنتش فايق انى اعملها فعملتها فى البنزينة ب 25 جنية )
ملحوظة مهمة وانت بتعمل الحوار دة ابقى هات سويتش الحرارة بتاع الدفاية على اخر الاحمر علشان يصفى المية اللى فى الدفاية

2- هات جركن فاضى وفضى فية الكان بتاعة الاثيلين وفضى عليها المية ورج الجركن وبعدين زود المية (طبعا بعد تصفية القديم وغسل الدورة)


3- اقفل غطا القربة بعد ماتخلص
ملحوظة مهمة بتعمل مشاكل كتير : متربطش الغطا كأنك بتقرط على عجل العربية لأ لف الغطا بالراحة لحد لما يقف وبس ( الغطا دة عبارة عن صمام ضغط لما بتقرط علية زى الصنايعية لما بيعملوا انت كدة بتلغى وظيفتة)

4- دور العربية وسيبها تسخن علشان تطلع الهوا منها

وبس !!

الموضوع من كتابتى وغير منقول