الموضوع: عاوز اشتري عدسات لاصقة طبية ؟

موضوع الليزك ده بيلعب في دماغي جامد .. بس المشكلة أن معظم الدكاترة اللي بيعملوا العملية دي بيبقوا لابسين نظارات .. فالأولى معملوهاش هما ليه .

بالإضافة إلى أن منظمة fda الأمريكية مش بتضمن العملية دي ونجاحها بنسبة 100% .

أنا مش بقول كدة علشان أخوف الأخوة اللي عملوها أو اللي عاوزين يعملوها (وأنا واحد منهم) بس الموضوع يستحق الدراسة واختيار المكان والدكتور اللي حيعملها .

أولا أحب أشكركم على دعوتى للمشاركة برأيي المتواضع فى الموضوع ده و متشكر جدا جدا على ثقتكم الغالية فى و شكر خاص لأخى العزيز شنورى ، و اتمنى اكون عند حسن ظنكم.

بالنسبة للعدسات اللاصقة ففيه بعض النقط لازم نوضحها اولا لمنع اللبس او سوء الفهم:

* العدسات اللاصقة مكمل للنظارة و ليست بديلا عنها أبدا ... يعنى لازم يكون عندى نظارة و البسها بالتبادل مع العدسات اللاصقة ... أولا لأن العين لازم تتهوى ، و ثانيا لأن جونا فى مصر مابيسمحش ان العدسة اللاصقة تتلبس طول اليوم لعدة عوامل اولها ارتفاع معدل تلوث الهواء و ثانيها الأتربة و الغبار الخ الخ ، فيبقى لازم وجود النظارة الطبية ، و بعدين المريض هايعمل ايه فى يوم زى ايام الخماسين اللى ماينفعش يلبس العدسة فيها ؟؟؟ او لو عينه التهبت مثلا ؟؟؟ لازم طبعا ساعتها يلبس النظارة.

* تقسم العدسات اللاصقة الى عدة فئات ، و تختلف طرق التقسيم حسب الهدف المطلوب للتقسيم ، مثلا شفافة أو ملونة ، أو تجميلية أو تصليح للبصر ، إستبدالية او دائمة ، الخ الخ ، و لكن لابد من وقفة مهمة هنا :
حكاية يومية او اسبوعية او شهرية او 6 شهور ، فدى تقسيمة قديمة جدا و بطلت و لم تعد تستخدم الآن ، الا من بعض الأطباء كبار السن (و لهم كل الأحترام و التقدير) ، او من بعض المراكز لخداع المريض و ايهامه بأنه واخد عدسة مافيش زيها.

* هناك وقتان للعدسات اللاصقة :
وقت اللبس اليومى للعدسة و هو المريض ممكن يلبسها كام ساعة يوميا ..
وقت تغيير العدسة ، يعنى العمر الأفتراضى للعدسة.

و هنا الأتنين دول مهمين جدا جدا ... أولا مافيش عدسات عمرها يزيد هم سنة بأى حال من الأحوال ، و الكلام اللى بيتقال عن عدسات عمرها سنة و نصف او سنتين فده كله عار من الصحة تماما. و ثانيا وقت اللبس اليومى للعدسة بيعتمد على معامل اسمه Dk/t او معامل نفاذية الأكسجين من العدسة للعين ، و ده بيحدد عدد الساعات اليومية اللى ممكن البس فيها العدسة ، و هنا بتظهر مشكلة مهمة : لتحديد زمن اللبس اليومى و العمر الأفتراضى للعدسة لابد من الأخذ فى عين الأعتبار طبيعة جونا و تأثيره على العدسة و نفاذية الأكسجين منها للعين ، و بدون الخوض فى التفاصيل ده اهم سبب للخبطة اللى بنشوفها فى تفسير زمن لبس العدسات اليومى و حساب عمرها الأفتراضى على هذا الأساس.

* العدسات اللاصقة الموجودة فى السوق المصرى (و تقريبا العالمى ايضا) جنسياتها عادة أمريكية / بريطانية او شرق اسيوية ، و نوع او اتنين ايطالى ، مافيش عدسات ألمانى من اللى الناس فاهمين انهم بيلبسوها ، و اشهر انواع بتعمل اللبس ده :
العدسة Flexcon و اختها Freshkon ، دول الناس فاهمين انهم المانى و لكن هما اصلا سنغافورى و الموقع بتاعهم اهو oculuslens
العدسة Zeiss اشترتها شركة هندى من فترة و موقعها أهو Zeiss
العدسة Bausch & Lomb اصلا امريكية و موقعها أهو Bausch & Lomb

و زى ما احنا شايفين ولا واحدة من دول المانى ، و طبعا سبب اللبس ده ان المريض من زمان بيسمع ان العدسات الألمانى احسن حاجة و بيطلبها، و طبعا ده مش متوافر حاليا و بالتالى للأسف بيضحكوا على المريض و يدوا له حاجة اسمها يمشى زى ما هو عايز بدل ما يوضحوا له الحقيقة ، و دى فى حد ذاتها مأساة.

* مش اى مقاس ينفع يتحول للعدسات ، فيه ناس عندها مثلا استيجماتيزم عالى و بالتالى العدسات ما تناسبهمش ، و مش معنى ان فيه مقاس فى نوع يبقى اى نوع ينفع ، يعنى مثلا لو مريض عنده استيجماتيزم بس متوسط ، ممكن اعمل عدسات لاصقة شفافة مخصوصة لتصليح نسبة الأستيجماتيزم الموجودة ، و لمن لا يمكن تنفع ملونة لأنها لن تكون بنفس الوضوح.

* اساءة استخدام العدسة زى لبسها ساعات اطول مما ينبغى او تعود النوم بيها أو استعمالها لفترة اطول من عمرها الأفتراضى ، ممكن يكون لها تأثيرات سريعة زى احمرار العين و التهابها مثلا ، و لكن تأثيراتها الحقيقة لا تظهر الا بعد فترة من تكرار هذه العادات السيئة ، فنلاقى مع الوقت المريض مش بيستحمل العدسات زى الأول و وقت لبسها اليومى بيقل و نوصل اخيرا للمرحلة اللى المريض مش بيطيق فيها العدسات ساعتين على بعض برغم انها عدسات جديدة مثلا ، و سبب ده انه ضغط على عينه كتير و العين اتحملت و لكنه سحب من قدرتها على الأحتمال ، لحد ما جاب آخرها (طبعا دى مش تعبيرات طبية و لكن لتقريب و شرح المعنى المطلوب) ، زى اللى بيشرب سجائر ، تأثيراتها الضارة تبان بعد سنوات من الأستمرارية ، مش من اول او تانى سيجارة.
و ده بيكون سبب سماع الشكوى الشهيرة "انا كنت زمان بالبس العدسات و بانام بيها كمان يومين و تلاتة ، و لكن دلوقتى مش باستحملها ساعتين فى عينى ، مع انى لسه شاريهم" ، و طبعا عرفنا السبب.

و للحديث بقية