المشكله ان الميكانيكى مش شايف مشكلة

**lobna_yaseen** · 10-06-2010 07:05 PM

المشاركة الأصلية كتبت بواسطة bakroov

لو زى مابتقولى يبقى راجل لقطة ياريت فى اسكندرية حد بيحط ايده على العيب من غير افتى

يعنى انت شايف إن المبلغ معقول ؟!! يعنى أتكل على الله وأروحله وهقولكم على النتيجه وإحساسى بالسياره وهل يوجد إختلاف ولا لأ ؟ بس إدعولى مايكونش كلامهم على الفاضى أوقدم عربيات لأن فيه عربيات بتبقى فقريه مهما وديتها عند مين هى متربسه دماغها على تعب أصحابها وفى عربيات تانيه ماشاء الله بيبان فيها اللى اتعمل فيها مهما كان قليل ليكم الحلاوه لو رجعت لى عربيه مختلفه تماما فى المضمون وياسلام بقى لو رجعت لى Bmw هههههههه (عربيتى 27) عاوزه الدعوات على ودنه

**lobna_yaseen** · 10-06-2010 07:39 PM

المشاركة الأصلية كتبت بواسطة hesham22822

لو سمحتى يا أخت لبنى تقولى لنا فين مكان الدكتور محمود دة فى المعادى

بص ياسيدى فيه شارع فى المعادى القديمه إسمه حسنين دسوقى قريب من نادى المعادى وشارع 77 ومنطقه إسمها فايده كامل بس فايده كامل بعده بكتير يعنى لما تنزل المعادى اسأل على شارع 77 جنب نادى المعادى ولما تبقى هناك تسأل على شارع حسنين دسوقى وقلهم اللى فى أوله المليجى بتاع الفراخ المشويه المهم إن حسنين دسوقى عمودى على محل المليجى تدخل شارع حسنين دسوقى وتمشى فيه وتسأل عن محمود حفنى الميكانيكى هو شارع شعبى بس المهم إنك تعمل حسابك إنك هتسيبهاله 4-5 ساعات وابن خالى بيقولى (علشان إحنا من المعادى) تسيبهاله على المغرب وتاخديها تانى يوم وبيقفل الساعه 10 بالليل أنا عموما لو أنا رحتله بكره هاخد تليفونه وهكتبهلكم ويارب أكون أفادتك بس لو سمحت لو روحتله تعالى قلنا عن تجربتك يمكن أكسل وماروحلوش قبلك

**samirayad** · 10-06-2010 08:24 PM

المشكله ان الميكانيكى مش شايف مشكلة

فعلا صدق محمود عبد العزيز لما كان بيقول لحسين فهمى فى فيلم جرى الوحوش

لما كان مش مصدقه بتدهور حالته بعد موضوع الطور لوووب

كان محمود بيقول لحسين أيه

______________

يادكتووووووووور .....صدق العليل ولا تصدق التحاليل

**danger_boy** · 11-06-2010 07:36 AM

ههههههههههههههههههههههههه ههههه no comment

**saladine** · 17-06-2010 09:30 PM

هة لسه في حد بيشتغل في الفيات القديم ؟؟؟؟؟؟؟؟

**saladine** · 17-06-2010 09:31 PM

انتم و انتو بتتكلمه عن العربيات افتكرت انكم بتتكلمو عن حاجات و موديلات جديده مش منسيه خلاص

**khaled_sabry** · 21-06-2010 04:00 PM

المشاركة الأصلية كتبت بواسطة lobna_yaseen

بص ياسيدى فيه شارع فى المعادى القديمه إسمه حسنين دسوقى قريب من نادى المعادى وشارع 77 ومنطقه إسمها فايده كامل بس فايده كامل بعده بكتير يعنى لما تنزل المعادى اسأل على شارع 77 جنب نادى المعادى ولما تبقى هناك تسأل على شارع حسنين دسوقى وقلهم اللى فى أوله المليجى بتاع الفراخ المشويه المهم إن حسنين دسوقى عمودى على محل المليجى تدخل شارع حسنين دسوقى وتمشى فيه وتسأل عن محمود حفنى الميكانيكى هو شارع شعبى بس المهم إنك تعمل حسابك إنك هتسيبهاله 4-5 ساعات وابن خالى بيقولى (علشان إحنا من المعادى) تسيبهاله على المغرب وتاخديها تانى يوم وبيقفل الساعه 10 بالليل أنا عموما لو أنا رحتله بكره هاخد تليفونه وهكتبهلكم ويارب أكون أفادتك بس لو سمحت لو روحتله تعالى قلنا عن تجربتك يمكن أكسل وماروحلوش قبلك

ها ايه الاخبار معاكى ؟؟

**gazzar91** · 22-06-2010 03:23 AM

المشاركة الأصلية كتبت بواسطة lobna_yaseen

أنا أسفه ياجماعه بس كنت عاوزه أسأل فى حاجه خارجه عن الموضوع شويه بس مش بعيد لأنى عاوزه برضه أغير الميكانيكى لأنه برضه كل ماأقوله على حاجه فى العربيه يقولى إنتى اللى مش متعوده على العربيه ومن كتر ماشككنى فى نفسى خليت اتنين من زمايلى زميله وزميل يجربوا العربيه (على أساس أن الراجل يكون جربها والست تكون زيى فميقوليش سواقة ستات) المهم الإتنين أجمعوا على رأيى
سؤالى بقه هو فيه ميكانيكى فى المعادى بيقولولوا دكتور محمود وواحد قريبى بيقولى هو فعلا دكتور فى الهندسه الميكانيكيه المهم الميكانيكى ده بيسرفس العربيه ب75 جنيه واللى فهمته من كلمة سرفسة العربيه غسيل الماتور وفك الكاربيراتير وضبط الكهرباء وتغيير البوجيهات (بس طبعا أنا اللى بجيب أى حاجه يحتاجها ) وبيقيملك العربيه وبيقولك بالضبط إيه اللى لازم تغيره بذمه وشطاره واللى يروح له مايرجعلوش قبل 4شهور على الأقل
كده بقى سعره كويس لأنى كل ماسأل حد يقولى ده حرامى ليه يعنى 70 جنيه ولا حتى 50 جنيه صح كده ولا الواحد يروحله وشكرا لكم

من واقع خبرتي الضئيلة قوي في المجال ده... أحب أقول لحضرتك... الصنايعي النضيف مش خساره فيه أي فلوس!!!!.... على فكره أنا ببقى موسوس لما أسيب صنايعي ماعرفوش يشتغل في المرحومة حتى بتاع الزيت!!! لما أجي أشدها إن شاء الله هابقى واقف مع السمكري أو على دماغه!!! لأ مش واقف بيه... هالبس العفريته و أشتغله صبي.... لو شغله نضيف فعلاً هاديله زياده على مصنعيته!!!!
يمكن أنا over شوية بس أتمنى يكون كلامي وصل لحضرتك... طالما نضيف ومتجرب يبقى تسيبيهاله و إنتي مطمئنه و تدفعي الفلوس بطيب خاطر..
في رعاية الله...

**khaled_sabry** · 22-06-2010 09:00 AM

المشاركة الأصلية كتبت بواسطة saladine

انتم و انتو بتتكلمه عن العربيات افتكرت انكم بتتكلمو عن حاجات و موديلات جديده مش منسيه خلاص

على فكره الميكانيكيه بتوعنا بيفهمو فى الموديلات القديمه اكتر ميت مره عن الجديد
لأن الجديد دخل فيها مكونات اليكترونيه و كهربيه معقده على فهم بليه اللى غلبا بيكون صاحب مستوى ثقافى قليل و بيعرف يفك الخط بالعافيه ... بالاضافه الى ان الجديد ممكن تلاقى فيه عيوب صناعيه زى اللى موجوده فى الكروز المانيوال و بعض العربيات الاخرى و كمان مش حتلاقى الميكانيكي فاهم اوى فيها لأنه لسه ماكونشى خبره فيها
لكن بالنسبه للقديم فبيكون الميكانيكي ده متعود عليها و فاهمها و عنده خبره كبيره فيها لأن تصليحها بيبقى سهل بالنسباله

**بحري** · 22-06-2010 10:33 AM

أنا أتعامل مع نوعين من الميكانيكية..واحد تشخيصه الدائم لكل مشكلة (إن مفيش مشكلة وحرام يا دكتور مصاريف على الفاضي)...والتاني كويس جدا بس دايما زحمه ولازم تسيب العربية أو تتركن جنبه
الأولاني ده أنا باروحله في الحاجات اللي أنا متأكد تماما منها وباقوله اعمل كذا كذا ومش بديله فرصه للاختراع وده بيريحني جدا في الفلوس والوقت..يعني أقوله غير التيل والطنابير..غير بوجيهات..غير كذا..اربط كذا..راجع كذا...