احترس ...خلفك عضو من كيا

**Ahmed Samy** · 11-06-2010 10:40 PM

المشاركة الأصلية كتبت بواسطة mustafaibrahim

والله يا باشا عندك حق

انا مقتنع بوجهة نظرك تماما

وفعلا والله البغبغانات كترت اوى فالبلد كل واحد يسمع عن مشكلة ولو بسيطة فاى عربية جديدة يروح رامى الكلام اللى سمعه فاى مشاركة والسلام

يعنى مثلا انا اعرف اتنين معرفة شخصية معاهم كروز (صاحبى وابن عمى) مبسوطين مالعربية وبيشكرو فيها جدا وانا كمان هشتريها قريب الاقى اللى يقولك العربية بتبطل

واللى يقولك عيبها انها تبع توكيل منصور(ملقاش عيب فالعربية يقولو فقال يشتم فالتوكيل وخلاص) واللى يقول العريبة طلعتها بطيئة على اساس انو راكب دودج مثلا او اس كلاس

الفتايين بيشجعوا واحنا معاهم

ماهو ده استخدام الحقيقة في صنع الوهم

بغض النظر عن كون الكروز حلوة ولا وحشة

انت خلاص العربية عاجباك و عارف عنها كل حاجة

و شفت صاحبها اللي اشتكى من عيب فردي انها بتبطل

و شفت حكاية ان طلعتها بطيئة اللي هو رأي واحد تاني برضه

و لاقيت ان دي حاجات ماتأثرش على اختيارك

لأنها فعلا تعليقات أو أخبار أكثر من كونها عيوب حقيقية تثني عن الشراء

بس تلاقي واحد بقى ماسك الكلمتين دول و بيلف بيهم في المنتدى و ماسك مزمار كأنه لاقي حقيقة القرن العشرين ........

**mustafaibrahim** · 11-06-2010 10:41 PM

اهي دي النقطة اللي انا باتكلم فيها

نكبر دماغنا ؟؟؟

طيب مش كده نبقى بنسيب معلومة غلط تروح لواحد ما يعرفش ؟؟

بس ده اريح لنا الصراحة

سواء حضرتك رديت على كل واحد بيفتى او مردتش ده حقك طبعا وليك حرية الاختيار

انما مش واحد او اتنين او حتى الف بينتقدوا العربية ده ملوش تاثير عالمبيعات نهائيا

فى مصر الناس لما بتختار عربية بيبقى بناء عالسعر والعربيات المتاحة فرنج السعر اللى مع الشخص

اقصد ان لو واحد العربية عاجباه و فالرنج اللى هوا حاطه هايشتريها من غير مايسمع كلام حد

وعلى فكرة فمصر منتديات السيارات ملهاش تاثير يذكر على حركة السوق

والدليل السيراتو والكروز والفلوس عربيات جديدة فيه ناس كتير اشترتها

بس شوف عدد ملاكها مثلا هنا فالمنتدى هتلاقيهم مش اكتر من 1 فال 100 من اللى اشترى العريبة فمصر

طبعا حضرتك عارف نظام جارى فلان جاب العربيةده راجل بيفهم يبقا اكيد العربية حلوة

تحياتى ليك استاذ
Ahmed Samy

**bolok** · 11-06-2010 10:45 PM

يا دكتور العيب مش في الكياوية العيب في اللي بيدخل يهاجم بهدف الهجوم مش اكتر ...
من حق اللى عندو معلومة عن السيراتو من الاقسام التانية انه يقولها بس بشرط تكون حاجة حقيقة شفها بعينو مش سمع عنها نقلا عن ابن خال بنت عم اخو مرات جدو .... ده مرة واحد قالي ( يا راجل ده التوك توك احسن منها ) هههه
من حقنا اننا ندافع عنها مدافعة صحيحة خالية من اي تحيز ... يعني لو عيب حقيقي نتناقش فيه علشان الكل يستفيد والعيب ده غالبا حيبقى عيب فردي في سيارة ولا اتنين مش حاجة عامة وده ممكن يحصل في اي نوع مش بس السيراتو ... كل واحد عندو عربية دافع فيها دم قلبو لازم يشفها احسن عربية في الدنيا

**Ahmed Samy** · 11-06-2010 10:48 PM

المشاركة الأصلية كتبت بواسطة mustafaibrahim

سواء حضرتك رديت على كل واحد بيفتى او مردتش ده حقك طبعا وليك حرية الاختيار

انما مش واحد او اتنين او حتى الف بينتقدوا العربية ده ملوش تاثير عالمبيعات نهائيا

انا مش باتكلم على المبيعات ..ما تبيع و لا ماتبيعش هو انا كسبان حاجة !

أنا باتكلم على واحد بس طالب نصيحة و ممكن نشوفه بيسمع أوهام

حتى لو ما اشتراش سيراتو ...مش ده المهم بس يبقى واخد قراره على أساس سليم

المشاركة الأصلية كتبت بواسطة mustafaibrahim

تحياتى ليك استاذ
ahmed samy

و تقبل تحياتي أيضا

**NoRmAl** · 11-06-2010 10:53 PM

المشاركة الأصلية كتبت بواسطة abouleila

اعلم تماما ان هناك انطباع سى من باقى اعضاء المنتدى لنا نحن ملاك السيراتو ويجب بالفعل ان نعالج هذه المشكلة ويجب ان نحدد الاسباب التى تجعلهم ينظرون الينا هذه النظرة

لا أنا مش معاك فى دى يا أبو ليله
أحنا مش بهذه السمعه أبدا ولا يوجد أنطباع سىء عنا
والدليل أن فيه ناس كتير دلوقتى بتشارك فى القسم وهى مش مالكه لأى عربيه تحمل شعار كيا
وكلهم بيدخلوا بس علشان يشاركوا معانا ويتعرفوا علينا ونهزر مع بعض ونتعرف
فى أكتر من العضو بتاع الرانجلر
محتار بين رانجلر و تريوس معملش موضوع فى قسم المقارنات وعمله فى كيا علشان ثقته فى لغتنا وطلب نصيحتنا
أنا معترف أننا ساعات بنكون حادين
لكن مش مع أننا نصنع لأنفسنا سمعه فى المنتدى أو نقول أننا غلطانين وأحنا معانا حق فى كثير من الاحيان
أقصد أحنا الحمد لله فى أعضاء كتار بيشاركوا معانا حباً فينا مع أنهم مش راكبين كيا

**Atrees** · 11-06-2010 11:25 PM

इसके आनंद एक cerato मालिकों के होने के लिए, मैं बहुत खुश हूँ कि हम बातचीत के इस तरह का है

its pleasure to be one of the cerato owners, i am realy happy that we have this kind of conversations

**Atrees** · 11-06-2010 11:29 PM

المشاركة الأصلية كتبت بواسطة yasserelsayad

اهو عتريس قلب هندى

.. خلاص يا معلم انت الكبير محدش هيتكلم على العربية تانى ولا يقول عليها حاجة غلط

حبيبي يا ياسووووووووور- سيبك انت - بعد كدة حرد بالهندي عشان محدش يبقي عندة حجة يقول علينا متعصبين

ادعيلي بس متوقفش بتهمة اني هندي - ههههههههههههههههه

**night_phoenix** · 12-06-2010 12:05 AM

منتدي السيراتو وبالذات سعادتك لو خليجي هوة " ارض العزة"
انا مش شايف اي عيب اني اكل الي بيتكلم علي السيراتو و اهضمه كمان طالما بيقول اي عك زي انها زي الطياره الجليدر بتعمل اكروبات او نها بتنط و تمشي علي فرده وحده او زي اخ زمان كان بيقولي هنا ان لا مؤاخذه الافيو تضربها بالنار
اما الشخص المعتدل الي طالب المشورة و هيثق فينا فده علي راسنا

حد عايز حاجه
مشرطي جاهز وانا متعقم ومستني

**timtim77** · 13-06-2010 04:44 PM

انا الموضوع فكرنى بمسرحيه مدرسه المشاغبين
اللى خايف يروح واللى عايز يذاكر يروح
انا لااعتقد ان ملاك السيراتو فكرينها احسن عربيه فالدنيا
كل حاجه فى الدنيا ليها مزايا وليها عيوب والواحد بيحاول يوزن امره ويشوف ايه الاصلح ليه
ولما بيدخل عضو بيسال عن العربيه احنا بنرد عليه بموضوعيه وبنقلوا على عيوب السيراتو قبل مميزاتها
وده مش نظريا بل بموضوعيه و عن تجربه
البعض بيشتكى من الاسلوب الحاد بصراحه فى اعضاء بيخش يذم فى العربيه وخلاص عن طريق انه سمع ان العربيه بتتقلب لوحدها وصاجها خفيف وفراملها سيئه والنور ضعيف ومفيش زينون والكراسى مش مريحه والخامات سيئه وغيره وغيره
ويقولك اصل الكروز مثلا احسن منها طيب ليه احسن يقولك اى كلام دون دليل او موضعيه بصراحه بتبقى حاجه مستفزة فلازم الرد يكون بحزم وطبعا صاحبنا ده اول مشاركه ليه بتكون هنا من اجل الهجوم فقط وكلنا فكرين الموضوع بتاع الكروز طبعا وبعد لما كلنا ردينا عليه سكت ومكتبش هنا تانى
وبالصدفه لقيت عامل نفس الموضوع هو هو وراح كتبه فى منتدى اخر وهناك محدش رد عليه غير الاعضاء اللى مش عجباهم العربيه
البعض الاخر يستشيرك عن العربيه والمواصفات ترد عليه ان مثلا المواصفه ديه كويسه ككماليات مع السعر يقوم يرد عليك انت اصلا متحيز للمواصفه السعودى مثلا طيب المفروض ارد عليه اقوله ايه
حصل الموقف ده معايا انا ودوك احمد ورديت عليه اننا بناخد عموله !!!!!
طيب ايه المفروض ايه اللى يحصل ؟؟؟
يدخل عضو عايز يشترى العربيه مثلا ولسه بيجمع اراء يشوف الهجوم غير المبرر حيعمل ايه هل حيشترى !!!
حتى لما بيدخل عضو يسال اشترى وكيل ولا خليجى بنقوله ده مميزات الوكيل وعيوبه وده مميزات الخليجى وعيوبه
اللى انا لمسه وشايفه ان معظم ملاك السيراتو كلهم اخوات يتمنون الخير لباقى الاعضاء ويراعون الله فى رايهم
وبصراحه ليس لانا الا الصالح العام الناس تركب سيراتو تركب اى حاجه تانيه احنا غير مستفيدين اى حاجه من ورائهم