الموضوع: يوم فى تصليح الأوبل

اولاً و قبل اى شئ اوجة شكرى لأستاذ عاطف صالح
ثانياً شكرى البالغ لشركة جى ام انها صممت اللانوس و النوبيرا على تصميمات الأوبل
ثالثاً الموضوع
النهارده قلت بعد الصلاة اروح اظبط شوية حاجات فى العربية
1. ركبت جوان اصلى لغطا التاكيهات ماركة توبران المانى
2. طقم بوجيهات ان جى كى ngk يابانى 2 شمعه
3. غطا الزيت كان مكسر و مشرخ و حالته تقرف الكلب
4. رشاشات المية كانت مسدوده و مغير واحد بواحد بتاع هيواندى جبت طقم اصلى و ركبتة و نضفت الخراطيم ( بجد طلعت عينى )
5. اويل سيل الكبلن الشمال كان ضارب و بيجيب زيت و التانى بيشاور عقله
و هنا يبدأ الشغل الكبير بقى
قلت للميكانيكى انا عايز واحد معايا فكه و اديهونى قاللى حاضر فكه و خدته
امبارح انا كنت فى وسط البلد و سألت عليه سعره و مجهول الهوية تماماً بس بيقولى المانى - سرور 35 - امريكان ستارز 45 - طارق حموده 45 جنيه للواحد
الميكانيكى يقولى كل حاجة فى العربية دى شبه اللانوس قلتله لأ اللانوس اللى شبهها
ضربتها فى دماغى ليا واحد صاحبى اسمه حماده سالم قلتله عايز اويل سيل قاللى معنديش غير الجى ام الكورى اللى بيجى طقم فى علبه و ده مش هتلاقيه فى السوق عشان مبيطلعش من التوكيل اخوه اشتراه و معرفش ازاى خده
على العموم كام يا عم قاللى 40 جنيه الطقم قلتله انا جاى رحتله قيس يا عم زى الفل قاللى بس ده بتاع النوبيرا 2005 اتوماتيك بس المقاسات مظبوطه و جى ام منوره عليه
رحت للميكانيكى ركب و الحمد لله كل حاجة تمام قلتله على خيرة الله قاللى عايزين زيت
و هنا بدأت المأساه الحقيقية
لفيت على زيت شل مفيش اسو مفيش موبيل متعدد الدرجات مفيش ملقتش قدامى غير زيت اسمه HD90بتاع التعاون و غالى ب 42 جنيه الجركن 4 لتر
انا عايز 2 لتر قلت مش مشكله
زيت شكل امه يقرف و غامق و تحس انه مخلوط بحاجة تانى غالباً زباله و مخلفات ادمية من العيار الثقيل
حطيته و انا مقلق
دور العربية اطلع الغيارات تقيله و تشيل رجلك من على البنزين الفتيس بيوووووووووون و هيتكسر
سبت العربية و دخلت صليت المغرب
طلعت لقيت الميكانيكى بيقولى مش عارف فيه ايه
قلتله على ما اجى تكون صفيت الزيت الزباله ده و عوضى على الله
و رحت جبت اسو
و سبحان الله كل حاجة ظبطت تانى و رجعت احسن من الأول كمان
بس موال غبى