الموضوع: اتخبطت

الفصل السادس
اتصلت الأربعاء 23-6 وبكده يكون العربية بقالها عندهم 15 يوم واتقالى ان خلاص الاكصدام بيترش ومجرد ماهينشف بكرة هنركب الفوانيس والباقى وتتدخل اختبار الجودة يوم السبت واستلمها الأحد بالكتير

الفصل السابع
اتصلت الأحد وللمفاجأة اللى رد عليا قال ما حصلش ولابد حصل خطأ والعربية لسه مستنية بدون جديد فيها وهنا بصراحة انفجرت فيه وقررت انى أضرب مشوار للتوكيل وأقابل المهندس خالد فاروق وحصل وبصراحة الراجل طلع زوق وعرفته بنفسى وقولتله بصراحة انى بشتكى من قسم الدهان والسمكرة عنده والراجل تقبل بصدر رحب وراح معايا على الموظف المسئول على الكمبيوتر وطبعا المستخبى هناك بان يعنى عرفت ان سبب التأخير ده كله ان فيه قطعة وهى صدر العربية مش موجوده اصلا فى التوكيل يعنى ناقصة من الشهر اللى فات .... طب الكلام ده ماتقلش من زمان ليه، وبعدين .... ان شاء الله جاى فى خلال يومين ثلاثة .... طب هنشوف،
المهم الأستاذ خالد برضه بغرض تطمينى قال للموظف المسئول انه ينزل معايا يورينى العربية وبالفعل حصل.
طبعا مليانة تراب، فاكين الاكصدام والفوانيس، حاطين الاكصدام الجديد اللى مفروض يتركب جوه كيس تقيل فوق سقف العربية، طب وبعدين ، الموظف مضالى على اذن الشغل ان التسليم هيكون فى خلال 4 أيام بعد وصول الصدر وتابعنا وكلام من ده

طبعا استريحت شوية وفى نفس الوقت اتغظت برضه .... يعنى توكيل بالحجم ده ونلاقى فيه حاجات ناقصة يوقفوا عربيات الناس عليها، وافتكرت تريقتى على صديق ليا كان جايب عربية byd وبرضه كان وقف فى التوكيل عندهم على قطعة مش موجودة ويومها أخدته تريقة على تصرف الوكيل، ساعتها عزرته واهه اللى بنعمله فى الناس بيطلع علينا

انتظروا الفصل الثامن، يارب يكون قريب