الموضوع: النيو سيراتو...ما لها وما عليها

السلام عليكم ورحمه الله بركاته

أنا كنت بفكر من فتره أنى أعمل الموضوع دا لكن كنت مشغول بالامتحانات
الغرض الاساسى من الموضوع هو نقل تجربتى مع العربيه كمالك للعربيه لسبعه أشهر حتى الان وعامل بيها بالصدفه 7000 كيلومتر
أنا طبعا رأيي فى العربيه معروف من خلال مشاركاتى لكن حبيت أجمع رأيي فى كل شىء فى العربيه علشان يصبح الموضوع دا مرجع لأى حد ميعرفش العربيه وعايز يتعرف عليها.
ومن جهه أخرى أمنع نفسى من التكرار فى المستقبل لأن الاسئله بتكرر وردى هو هو بيتكرر معاها.

نبدأ بسم الله الرحمن الرحيم

الاول هتكلم على شكل العربيه
العربيه شكلها مميز أى كاتشر بكل ما فى الكلمه من معنى مع أنتشارها الهائل وأعدادها المهوله فى الشوارع إلا أن العين متشبعش منها وتبقى راكب جواها وتعدى جنبك تتفرج عليها بردو :))
شكلها الخارجى قوى جدا والخطوط والتعريجات تديك أحساس أن العربيه تحت صاجها عضلات لوحش منتظر الحريه
كمان فى تناسق فى الشكل متحسش أن الفانوس مش لايق أو البمبر أكبر من حجم العربيه زى عربيات مبعجره بنشوفها كتير "ويقلك يابانى "
لو دخلنا جوه العربيه أولا الباب مش شايفه ضعيف زى مالناس بتدعى أنا شايفه مناسب جدا لا هو ورقه ولا هو باب زويله ومش لازم الباب يبقى زى الداهيه علشان يعجب دا مش باب شقه :)
تصميم العربيه من الداخل مميز للغايه فى تناسق أيضا بين مكونات التابلوه. فتحات التكييف فى أماكن ممتازه لتوزيع الهوا داخل العربيه السى دى بلاير شكله مميز وأضائته مناسبه وتحس أنك متقدرش تستغنى عن شكله حتى لو بgps وبالنسبالى هو روح الانتريور
العدادات طبعا جميله وأحجامها كويسه جدا يعيبها أنها مفهاش مؤشر أنالوج للحراره ودا الى خلى ناس كتير تتكلم بردو مع أنها مش أول ولا أخر عربيه بتنزل بالشكل دا وعن نفسى محتاج أعرف لو حصلت مشكله فى الحراره واللمبه نورت دا كل الى أنا عايزه مش محتاج مؤشر يعرفنى هى 90 ولا 100 مش فارقه معايه الى يفرق لما توصل لدرجه تضر المحرك أنها تنور بس كدا ودا الى بيحصل "من الفئه sx وأنت طالع فى عداد ديجيتال للحراره"
أن ex يعنى معنديش عدادات رياضيه لكن كنت أكيد هشكر فى العداد أكتر لو كان عندى اللهب الرائع الى حواليه.
خامات التابلوه أحد العناصر الموجه أليها أصابع الاتهام فى نظرى بدون وجه حق لأنها كويسه جدا ومش رديئه ولا حاجه ولما بسمع حد بيتكلم عليها بعرف أنه مش لاقى حاجه يقولها :)
مشكله سخونه الكونسول دلع مش هتكلم عليه.
أخيرا لا أجد مطلقا أى سياره فى فئتها تتفوق عليها فى الشكل لا خارجيا ولا داخليا فى أى شىء لا كورى ولا يبانى ولا حتى أوروبى زى اللينيا مثلا لأن الانتريور بتاعها عايز يتنسف إلا لو أعتبرنا البرافو تنافس الكوب يبقى معلش البرافو تكسب مفهاش غلطه من جوه

نركب بقى وندور المتور :)
صوت العربيه فى الايديل مش مسموع ولو حد بيسمعه يروح التوكيل
مبتخدش وقت فى التسخسن كلها 30-45 ثانيه ال rpm يبزل لواحد "1000"
المحرك طبعا جبار لا غبار عليه 124 حصان محترمين لكن للأسف بالفعل فى فتره كسل للمحرك من بعد 60 كدا أتحسنت شويه بعد التفتيح لكن بردو مش راضى عنها بعد كدا العربيه بتشد جامد جدا وسرعة أستجابتها عاليه جدا وأنا شايف أن الفتيس كويس جدا جدا وسريع ومفهوش أدنى مشكله
الخلاصه ستارت ممتاز وسحب جميل ثم فتره كسل ثم أنتفاضه من جديد
نتكلم على الثبات العربيه ثابته جدا جدا جدا تحت ال100 تقدر بجد تاخد زوايا صعبه وضيقه بيها بدون أدنى مشكله ودا يخلى أى حد بيقول أنها تتقلب على أقل من 100 بيهرج لأنك متعرفش تقلبها على أٌل من 100 إلا لو طلعت فوق حاجه ولا لبست فى رصيف كدا يعنى :)
بعد ال100 الثبات بيقل وصولا ل150 مش بيقل أوى لكن بيقل بشكل ملحوظ
بمعنى مقدرش أعمل الى كنت بعمله وأنا أقل من 100 لكنه مقبول لعربيه مدينه مش سباق
عن نفسى معدتش ال150 إلا فى خط مستقيم أثناء التفتيح فمقدرش أحكم على الثبات بعد كدا
لكن أتصور أن الثبات هيخش فى مرحل ثالثه بعد ال150 ويقل من جديد
العربيه فعلا وحش غير مروض على رأى عتريس قويه جدا لكن تحس فى بعض الاحيان أنك مش عارف تسيطر على سرعتها أو مودها تحسسك أنها هى الى سايقاك علشان كدا ببقى مركز جدا وأنا سايق لأنها بتجلها حالات كدا تحسها بتجرى وأنت مكلبش فى الدركسيون ومش عايز تجرى "كنت زمان مسمى الحاله دى العفريت :)) كانت بتجرى وترفمل وتحود لوحدها ههههههه والله كنت هتجنن لغايه مربنا كرمنى وخرج منها"

العفشه
العفشه بقى فعلا الى الوحد ممكن يقول عليها أحد عيوب العربيه السيستم الكامل للتعليق الخلفى مخلى العفشه ناشفه جدا خصوصا لو مع جنط 17 يبقى أستهبال
العربيه زى مقلت ميت مره تعليقها الخلفى تورشن بيم ليه عيوبه ومميزاته إلا أنه لا مفر من أنه تكنولوجيا قديمه نسبيا بالمقارنه مع المالتى لينك + مساعدين غاز يقطموا الضهر + الجنط ال17 للى عندهم أو حتى 16
كل دول أجتمعوا فى عربيه واحده وزى مقولت أى عنصر واحد منهم كفيل أنه ينشف أجدعها عفشه فما بالك أن كلهم فى عربيه واحده
مقدرش أقول أن العناصر دى سبب فى ثبات العربيه بعضهم أيوه بيساعد على الثبات زى الجنط ال17 والمساعدين والبعض لا زى التورشن بيم
لكن علشان منزعلش ياسر ولا دكتور أحمد الثبات بيجى من تركيبه مش من عنصر واحد وأنا بردو شايف إن لو التركيبه الحاليه مع ملتى لينك كانت هتدى ثبات أكتر
العربيه مبتحكش فى المطابات مطلاقا وهى مييزه بكدا
من ساعه مجبتها محكتش معايا غير مره واحده كنا 5 فى العربيه وكان مطب جبلى من بتوع المحروسه
فالعربيه مجملا مبتحكش فى المطبات

الباور
ربما بردو أحد عوامل عدم تميز العربيه كان يبقى أفضل لو كهربا زى أختها الصغيره وأنا شايف أنه مش ناعم الصراحه ومش خشن بردو لكنه من الاخر مش مميز

الفرامل
الفرامل هى التاج الى على راس العربيه دى
العربيه دى عباره عن فرامل وطلعلها عربيه...أفضل ما فيها على الطلاق
سريعه الاستجابه جدا قويه جدا منقذه الى أبعد الحدود
أنا بعتبرها هى الملاك الحارس للعربيه
وليه معاها تجارب شتى كانت سبب رئيسي فى أزدياد ثقتى فى العربيه
مسافه التوقف قليله جدا وتحس طول منتا ماشى أنها مستعده تقف فى أى وقت بس أنت قشر
أول مجبت العربيه كانت زى مقلت بتفرمل لوحدها "العفريت :)" كنت أرعش الفرامل بس
أبقى حاسس بيها تحت رجلى كدا و فجأه ملقاش الدواسه تحتيه!!!
نزلت لوحدها بس كانت بتعجبنى مش فاهم ليه :)
من الاخر مفيش نص كلمه تتقال على فرامل العربيه لأنها مفهاش الهوا
ولاحظ انى حتى معنديش abs

المساحه
العربيه واسعه وبرحه أوى سواء من ورا ولا من قدام
يعنى تبقى قاعد مرتاح وكمان حاسس بالحريه كدا مش مخنوق وكتفك لازق فى الباب والفتيس مضايقك
لا واسعه جدا من الامام
الاتساع بيقل ورا لكنه بردو مميز فى الحقيقه وتشيل تلاته فول جرون مستريح أوى ومحدش بيشتكى الصراحه
أماكن التخزين ممتازه سواء داخل الكبينه أو الشنطه الخلفيه
يعنى فى أرم رست قدام وورا ودرج التخزين الى في التابلوه كبير وفى مكان فى الباب وفى مساحه شمال الدركسيون
يعنى مماتزه جدا على سياره سيدان فى فئتها
الشنطه واسعه جدا وتشيل من الحبايب ألف :)
يعنى بجد بحط فيها حاجات كتير جدا جدا وأنا بتسوق وعمرها مقالت لأ

العزل
العربيه عزلها ممتاز متسمعش حاجه بره خالص خصوصا لو مشغل السى دى بلاير ومش محتاج تعليه حتى
صوت المتور مبيطلعش غيرفى الكيك داون وصوته كويس مش مزعج
لكن العزل يقل بعد ال120 كم فى الساعه ودا أحد عيوب السياره من وجه نظرى

التكييف
تكييف العربيه جيد جدا مش ممتاز
متشتكيش منه الصراحه لكن يعيبه صوت المروحه المرتفع من أول 3
وعلشان هو مش ممتاز هتحتاج تطلع ل3 بالضروره وساعتها هتحس بأزعاج المروحه
مبيأثرش بصوره ملحوظه على سحب أو أداء العربيه تقدر تجرى وتحرق وتشد مع التكييف وهتلاقى الاستجابه
لسه طالع من واحد sx نحاسى على مصر السويس وأنا راجع "مفيش غير سيراتو فى الشوارع بنبلطج على بعض بقى :))" وكنت مشغل التكييف محستش بفرق
الخلاصه تكييف قوى لكن مزعج على 3 غير مؤثر على العربيه ولا أعتبره من عيوب العربيه

الامان
العربيه صاجها طرى مميز بيرد
أبويا ما شاء الله كل مياخد العربيه منى يرجعهالى بخدش بحكه يعنى مبيحبش يرجع بأيده فاضيه :)
لكن مره حك فى عربيه على الدائرى قالى نزلت متوقع ان الصاج داخل على الباب ملقاش غير خدش أبيض "على حد قوله :)"
فصاج العربيه أحد مميزاتها وغازى ودوك أحمد قالو كدا كمان خصوصا أنهم تعرضوا لحوادث ربنا يجعلها تكفير عن سيئاتهم ورفع درجات
العربيه فيها أيرج باج واحد الex بتاعتى وتوصل ل6 مع الخليجى "مش متأكد"

نظام الصوت
مليش فيه بس السى دى جامد
عاجبنى السوفتوير بتاعه سهل الاستخدام ومتحسوش غبى
وسهل توصل للى أنت عايزها
وزراير السى دى محطوطه بوعى ومتحسش أنك هتخيش علشان تقلب من فولدر لفولدر ولا حاجه
طبعا الملتى فانكشن مش عارف كنت سايق أزاى من غيره زمان :))

أستهلاك البنزين
حدث ولا حرج
أنا بقول للى بيهاجموا العربيه دا مجالكوا أتكلموا هنا علشان شكلكم وحش لما بتتكلموا على حاجه تانيه وتألفوا
أستهلاك العربيه ضايع العربيه بترضع بنزين زى العيل الصغير وخاربه بين أبويا من الاخر :))
يمكن أنا بس الى أكون حاسس أوى كدا لأنى أول مره أسوق أوتو بس 10 لتر لكل 100 كيلو كتير أوى ويقطم الوسط
أستهلاك البنزين على رأس عيوب العربيه بجد

التوكيل
طبعا أحد مميزات العربيه التوكيل المحترم والضمان الكبير
5 سنين و100 ألف حاجه محترمه بجد
كمان تعامل التوكيل مميز مع الناس
ناس محترمه ومحترفه عملها أسعارهم مش عالبه أوى ولا حنينه بردو
لكن الخدمه جيده جدا وتحس ان عربيتك فى أيد أمينه

الانتشار
طبعا فى المجره بالكامل انتشار السيارات شىء يميز العربيه ويدل على نجاحها
إلا عندنا فى مصر العربيه منتشره علشان أيه يا ولاد
علشان سياسه القطيع والشكل بس والناس مخمومه
طبعا الواحد مش عارف يضحك ولا يعيط على الخيبه الى الواحد بيسمعها
ومش ناوى أضيع وقتى فى مجادله ملهاش لازمه علشان أثبت حقيقه
الانتشار يعنى نجاح لو حد مش مستوعب كدا صدقنى أنت غلط ومش مستوعب
لو حتى العربيه صفيحه سمنه ومنتشره تبقى هى ناجحه علشان أيه بقى حضرتك مش مستوعب أو مش عايز تستوعب
طبعا الانتشار دا واكبه توافر فى قطع الغيار فى كل مكان والعربيه أتقطعت فىالحرفيين وكل حاجه تمام والحمد لله
وكمان سعر إعاده بيع كويس جدا نتيجه الانتشار ولأنالعربيه أتباع منها أكتر من 10000 فى سنه واحده لازم تنزل السوق تلاقى كتير بيتباع بس بردو دى يعنى صعبه الفهم شويه زى حقيقه الانتشار كده!

فى الاخير
العربيه ناجحه لأسباب كتير أهمها أنى راكب عربيه ممتازه وبسعر منافس
لكنى عارف أيه الى فايتنى أنى مركبتش أوروبى ولا ألمانى وفاهم كويس أنا راكب أيه
والى يقول أنه راكب زى ركوبه الاوروبى يبقى مش رشيد فى الحقيقه
لكن
مش فايتنى حاجه أنى مش راكب اليبانى وخلاص الكورى جاب اليبانى وادينى قولتها والفرق بينهم مش فى الواقع أنما قابع فقط فى عقول المرضى بهذا المرض اللعين

دا كل خبراتى عن العربيه قد أكون نسيت حاجات ممكن أبقى أضيفها بعدين
ويا ريت الملاك يشاركونا بخبرتهم ويصبح دا موضوع تعريف بالعربيه علشان الى ميعرفهاش

معلش هكون رخم فى الكلمتين الى جايين دول لكن معلش هستخدم ميزه أنى صاحب الموضوع
....*ممنوع منعا باتا نقل أى تجارب غير تجارب الملاك فقط لا غير
سواقتك لعربيه أخوك واحد صحبك قريبك ليوم ولا أتنين ميدكش الحق تحكم على العربيه لا بالسلب ولا بالإيجاب
....*ممنوع منعا باتا الخوض فى أى مناقشات عن منافسى السياره
يعنى بلاش نقول لأ أصل التيدا مش عارف مالها ولا البومه أحسن فى كذا
أرجوكم علشان مجهودى ميضعش والموضوع يقلب بخناق ووقف وحذف وقفل
دا مش موضوع مقارنه وقسم المقارانات موجود
الموضوع مخصص لتجارب الملاك فقط لا غير
ومعمول من الاساس علشان غير الملاك يتعرفوا على العربيه من خلال تجارب فى ظروف شتى ميطحطش فيها غير صاحب العربيه
علشان يعرفو عيوب ومميزات العربيه
عن نفسى مش هعلق على أى مشاركه لمالك بيقول رأيه فى عربيته دا حقه الاصيل يقول هو شايف عربيته أزاى
وهو هيعرف من المشاراكات إن كان عنده عيب لوحده ولا دى فعلا حاجه عامه فى العربيه

الموضوع كان مطلوب أنه يتعمل علشان نضع حد للكلام ويبقى فيه موضوع شامل عن العربيه بالكامل

أرجو من الملاك المشاركه ومش لازم كلام كتير يعنى ممكن تختصر أو تفصل براحتك
الى عايزينه منك بعد الفتره دى تقدر تقولينا أيه ميزه العربيه وأيه عيوبها بأمانه؟

الحمد لله رب العالمين
شكرا