العتب اتخبط والحمد لله..........

**X_MM_X** · 16-02-2008 05:35 AM

اول خبطه في العربيه تخلي الواحد زعلان جدا مع انها بسيطه
النهارده ولله الحمد وانا بحود كان في طوبه كبيره مشفتهاش خبطت في جنب العربيه ودخلته لجوه ومنظرها بقى وحش اوي
بس الحمد لله الباب محصلهوش حاجه انا عربيتي لانسر 1300 يعني من غير عتب اسبور
ممكن العتب ده يترد ولا ايه دورت هنا في المنتدى مالقتش اي مواضيع عنه
(منظرها مدايقني اوي)
ياريت تساعدوني بخبراتكم
شكرااااااااا مقدماااااااااااااااااا

**abdelaziz-waleed** · 18-02-2008 01:14 AM

بص يا سيدي هي الطريقة اللي انا شفتها قدامي مش هاتعجبك اوي بس مشعارف ان كان في طريقة تانية ولا لأ
هو السمكري بيجيب زرجينة كدة عبارة عن قضيب حديد في مقدمته زي بنطة شنيور وحوليها حديدة تانية بتنزلق على القضيب
بيعمل ايه بقي. بيبدأ يدخل بنطة القضيب في العتب زي ماتكون بتفتح ازازة شامبانيا كدة وبعد كدة يبدأ يخبط بالحديدة التانية لبرة علشان العتب يرد تاني
بعد كدة الفتحات ده بتتسد بالمعجون وبتترش وماتبانش خالص
انا مش عارف بصراحة الزرجينة ده اسمها ايه

**mo3tazelgamal** · 21-02-2008 10:12 PM

بس أنا كنت قرأت أن توكيل تويوتا عندة جهاز شفط العتب بدون فك اللحام
كمان أنا شفت الجهاز دة فى إسكندريه عند le garge
ممكن حضرتك تسأل على الجهاز دة عند التوكيل يمكن

**hic** · 23-02-2008 08:10 PM

شوف يا سيدى
هو السمكرى بيلحم حديده فى العتب بحيث يربط فيها شداد
و بعدين يشدها بحاجه اسمها بلانكو لحد الخبطه ما تترد و بعدين يدق عليه من الخارج علشان يستعدلها و بعد كده بيشيل الجزء اللى لحمه و تتمعجن و تترش و ترجع احسن من الاول ان شاء الله

**ahmedsrs** · 23-02-2008 08:32 PM

شوف يا سيدى
هو السمكرى بيلحم حديده فى العتب بحيث يربط فيها شداد
و بعدين يشدها بحاجه اسمها بلانكو لحد الخبطه ما تترد و بعدين يدق عليه من الخارج علشان يستعدلها و بعد كده بيشيل الجزء اللى لحمه و تتمعجن و تترش و ترجع احسن من الاول ان شاء الله
hic
+100000000

**osamaelbaz** · 23-02-2008 11:57 PM

انا اتخبطت نفس الخبطة فى عربيتى الماتريكس والسمكرى الى انا رحتلة فك الفردة الى ورا وكان فية فى اخر العتبة طبة فتحها ومد منها قضيب حديد وعدل العتبة وردها من برة على البارد بجد فنان واتكلفت 200 جنية ومحتجتشر رش ولا حاجة

**maraaawan** · 12-03-2008 03:38 AM

يا باشا السمكرى اللى رحتله دة فين ؟؟؟ عربيه حماتى ماتريكس برضة وخبطتها فى العتبة اليمين وعاوزين نعملها قولى مكانة او عنوانة علشان اروحلة اعملها ياريت ؟؟

**hazem_khidr** · 12-03-2008 06:36 AM

الاخوه قالو كل طرق الاصلاح لكن من رايي سيبها كده طالما في العتبه مش في الباب مش حتبقي باينه اوي و انت مضايق لسه علشان جديده بعد كده حتتعود عليها وكمان علشان تاخد العين