الموضوع: هل الإحتشام بقي عيب ؟

المشاركة الأصلية كتبت بواسطة m.mosaad

ممكن بس نقطة للتوضيح لان كعادة معظم المواضيع هنا دايما تاخد اتجاه تاني غير المعموله ليه انا حاولت اوضح وجهه نظري من خلال الموضوع بدايه من عنوانه لحد سياق الموضوع نفسة

يعني في العنوان انا كتبت الاحتشام و مقلتش الحجاب او النقاب يعني انا بقول الاحتشام كشيء اجتماعي و حريه شخصية يعني مش مرتبط بدين علشان ميتقالشي اني متزمت حاولت اخرج الاسلام كدين من الموضوع علشان ميبقاش وجهه نظر دينيه اد ما هي وجهه نظر اجتماعيه و حريه شخصيه طالما لم تتعد علي حريه الاخرين
و في سياق الموضوع وضحت اني بتهكم علي كلمه شرعي معنه مايوة اربع قطع ( بدي و بنطلون طويل و فوقيه بلوزة واسعه جداااااااااااااااااااااا و حجاب كامل للرأس يعني كان ممكن ادخل في جدال و اقول ان في مشايخ حللوة للمرأة لكن دة مش هدف الموضوع علشان كدة مش هتناقش في النقطة دي خالص لاني لقيت اني عاصي و زي اللي بيخش خمارة و هو بدقن لمجرد اني عملت حاجة 99 % من اللي ردوا في الموضوع بيعملوها و في نفس الوقت بينتقدوها فدي مش موضوع للنقاش مع كامل احترامي لكل الاخوة الاعزاء اللي هاجموا )

هدفي بقي من الموضوع هو الحريه شخصيه مش اكتر و لا اقل زي ما هو حريه لاي حد انه يلبس مايوة عادي او يسكر برضة من حق اي شخص انه يلبس لبس سباحه مناسب و ينزل المايه زيه زي غير زي ما من حق اي واحد منتقبه تبتغي مرضاة ربنا انها تمارس حياتها بطبيعيه من غير منغصات و نظرات فضول ملهاش لازمه

و مقلتش اسم الفندق الا لما احد الاخوة قاللي علي فندق تاني بيسمح بكدة فقلت اسمه لان فعلا الفندق كان كويس جدااا و الاكل كويس و معامله الناس كويسة و الخدمات حلوة جداااا يعني استمتعنا في الاجازة فعلا

بالنسبة لموضوع الانتقاب هو الحل بتاعه ان يتوفر في كل مكان موظفة امن يكون من حقها الاطلاع علي وجه المنتقبه لان من حقهم يأمنوا نفسهم و برضة من حق المنتقبه انها تعيش حياه طبيعيه لاني بقيت احس ان الانتقاب هو نهايه لحياه المرأة مفيس فسح و لا خروج و لا ملاهي دايما تلاقي المنتقبه قاعده في الركن في كل مكان و كل ما تتصرف اي تصرف يقولك بص شوف المنتقبه بتعمل ايه تسوق عربيه الناس تقعد تبصلها تقف في المايه الناس تقعد تبصلها موضوع صعب جداااااا بس فعلا اللي بيلبسوا تقربا من ربنا اكيد ربنا هيجازيه خير حتي لو مكانش فرض

للأسف مصر بقت رافضة التدين اكتر من اوروبا و للأسف برضة عدد المتظاهرين بالتدين في ازدياد و عدد المتدينين بجد في انحدار و للاسف اكتر كل يوم بنتمسك بالفروع و نسيب الاصل ( نتمسك بفروع الدين و نسيب اصل الدين ) عاملين زي اللي عنده شجرة كبيرة و فروعها كتير و عمال يرش مايه علي الفروع و سايب الارض اللي فيه جذور الشجرة من غير ما يسقيها فالنتيجه ان الفروع هتقع و الشجرة وراها احنا محتاجين نسقي الشجرة نفسها علشان الفروع تقوي محتاجين نقيم الصلاة مش نؤدي الصلاة محتاجين نحب لغيرنا زي ما بنحب لنفسنا ( قال رسول الله صلي الله عليه و سلم لا يؤمن احدكم حتي يحب لأخيه ما يحب لنفسه ) صدق رسول الله صلي الله عليه و سلم محتاجين نتوكل علي الله حق توكله يعني نعمل زي الناس في اوروبا لانهم مثال للتوكل علي الله بياخد بالاسباب في كل حاجة و بيعمل عمله بإتقان و هو مش عارف معني التوكل

محتاجين نتمسك بأصل الدين مش بمظاهر الدين

اتمني يكون هدف الموضوع وصل لأخواني و اخواتي في المنتدي

اخر فقرتين حضرتك بجد اجملت فيهم حلول لحياتنا كلها ..
حضرتك حليت مشكلة النقاب في حل بسيط .. بس حضرتك الناس مش عايزة كدا . تفتكر ان الناس مش عارفة حل للمشكلة اللي هما مبتدعنها للنقاب مهما عرفين (بس هو لازم يكلكعها) دول بيطلعوا بحجج عجيبة
وموضوع التوكل على ربنا .. مشبه الاناس كلهم عارفين كدا بس مين متوكل فعلا على ربنا
وحب لأخيك ما تحب لنفسك .. الناس بتاكل بعض دا الكبير بياكل الصغير والصغير بياكل في الاصغر منه وووو
دا الغريب تيجي تنصح حد وخصوصا لو حاجة في الدين (مع انه عارف ان الدين الألتزام بيه هو السبيل للنجاح) تسمع ردود حضرتك
- يا ريت مندخلش الدين في كل حاجة .. خلي الدين على جنب دلوقتي .. طب بص فكك من حتت حرام وحلال دلوقتي وقولي ايه رأيك ( وكأن الدين دا معمول منظر او لبشر في كوكب تاني)
-انا عارف نفسي كويس وربنا اللي بيحاسب .. ملكش دعوة انت (اومال الدين النصيحة دا لمين؟ ) مهو لو واحد فسد هيفسد غيره لحاد مالكل يفسد
- يقول محدش لي دعوة بعلاقتي بربنا .. وانا بيني وبين ربنا عمار (دي كتيييير بتتقال خصوصا من الفنانين , ودي ملهاش تعليق عليها ... دا تكبر (دا سيدنا عمر بن الخطاب وهو من المبشرين بالجنة راح لعبد الرحمن بن عوف بعد وفاتة النبي (صلى الله عليه وسلم) بيسأله هو من المنافقين وهو من المبشرين بالجنة .. وللأسف دلوقتي اللي صلى ركعتين بقي شيخ المشايخ )
-واللي يقولك بتحرمه كل حاجة وفكرة التشدد .(لو قلت لواحد حكم في حاجة هو متعود بيعملها وقلتلوا انها حرام يقولك متشدد .. طب هو المشكلة في انه هو اللي بيعمل حاجة حرام والا المشكلة في الدين اللي حرمها؟ يعني لو قلنا سماع الأغاني حرام الواحد ممكن يضرب ويقولكم ليه ودي بتروح عن النفس وو و و و ومش بعيد يقول ان دي سبب نصر اكتوبر .. لو جبتله دليل يقولك انت متشدد)

للعلم اكبر مشاكلنا في الدين ان احنا مش فضينله ومش بنقرأ .. ولو كلمت حد في حاجة وكان سامع فتوى فيها من شيخ ومش بعيد يكون شيعى (مهة ميعرفش) يتحجج بالفتوي دي ..

انا للعلم مش متشدد ولا تبع جماعات .. بس لما جيت اقرأ في الدين اكتشفت ان احنا مغيبين(كشباب على الأخص) وفتاوي كتير كنت بسمعها طلعت غلط ..


الخلاصة .. ان لازم كل واحد ينصح نفسه ويشوف هو بيعمل ايه صح وايه غلط
قال تعالى ( أتأمرون الناس بالبر و تنسون أنفسكم وأنتم تتلون الكتاب أفلا تعقلون)


واسف على الأطالة