الموضوع: هل الإحتشام بقي عيب ؟

اعذروني للعنوان الغريب بس دة اللي بيلخص الموقف اللي حصللي

دلوقتي انا كنت في رحله عمل و رجعت الحمد لله فقلت اخلي عندي دم و افسح المدام و بنتي شوية فقلت افضل حاجة اننا نسافر كام يوم و نقعد في فندق و نقضي يومين حلويين و فضلت العين السخنه لانها قريبه من القاهرة و انا بحبها جدا بصراحه

المهم انا زوجتي محجبه فالطبيعي علشان تنزل المايه اشترينا مايوة محجبات بيقولوا عليه شرعي لاننا لما سافرنا السنه اللي فاتت معرفتش تنزل حمام السباحه

رحنا الفندق مش هقول اسمه دلوقتي و هقول السبب في الاخر لقيت البنت بتاعه الاستقبال بتقولي حضرتك اتفضل امضي علي شروط الفندق لقيت من ضمن الشروط ( ممنوع نزول حماما السباحه بالملابس العاديه او الجينز او ملابس السباحه الطويله قلت للبنت انا زوجتي معاها مايوة شرعي قالتلي اسفه حصرتك ممنوع ( خلوا بالكم انا كنت حاجز و حولت الفلوس من كام يوم ) قلتلها ممنوع ايه امال ننزل حماما السباحه ازاي قالتلي ممكن تنزل البحر لكن حمام السباحه ممنوع قلتلها انا مش بحب مايه البحر و بنتي اساسا اتقرصت في المايه السنه اللي فاتت فعندها عقدة من البحر يعني انا هقضي معظم الوقت علي حمام السباحه قالتلي هتصل بمدير الفندق و حضرتك تتكلم معاه

المهم مش هطول عليكم جه المدير و قالي احنا عندنا قواعد كتير ممكن نعديها لكن القاعده دي صاحب الفنادق حاطط عليها خط احمر ممنوع تجاوزها قلتله طيب في حمام سباحه للسيدات و مش مشكله مراتي و بنتي ينزلوا لوحديهم و انا لوحدي و اهي اجازة و خلاص قالي انا اسف مفيش كنت هتجنن طبعا (( لا و البنت في الاستقبال بتقولي علي فكرة النزول بالمايوة صحي اكتر )) المهم بعد جدال طويل و بالعافيه اتفقنا انها هتقعد مع البنت في حمام الاطفال

طبعا الحمد لله قضينا وقت كتير في البحر لان مراتي صعبت عليا انها تقعد في حمام عمقه 30 سم للاطفال . و ربنا كرمنا و البنت مخافتش و كانوا كام يوم حلوين

انا عنوان الموضوع مقلتش الحجاب بقي عيب قلت الاحتشام لاني اعتقد الموضوع دة مش مرتبط بدين يعني 90 % من الناس اللي بتنزل حمام السباحه هناك اجسامها ميصلحشي معاها مايوة خالص فمش عارف ازاي يعني
يعني علشان ناس بتحاول تلتزم معني كدة ان الست تتخنق يعني احنا قضينا كام يوم تحت الحصار كل شوية تلاقي الموظفين رايحين جايين يتأكدوا انها منزلتشي حمام السباحه الكبير اكنها عامله جريمه و اللي عرفته بعد كدة ان القاعده دي جت بعد شكوي مصريين كتير من المايوة دة مش الاجانب

انا مع القاعده بتاعه عدم النزول بملابس لانها فعلا بيبقي شكلها مش حلو لكن لو واحد محجبة او حتي واحدة مش مسلمه لكن ملتزمه و محتشمه في لبسها تعمل ايه

انا عايز احد الاخوة هنا اللي شاغلين في فنادق يجاوبني هي دي حاجة في كل الفنادق لانها كدة تبقي كارثه يعني اللي عايزة تحتشم يبقي يا البحر يا تقعد في عز الشمس تتفرج علي المايه من بعيد

انا مقلتش اسم الفندق لان مش عايز اعمله سمعه وحشة لان كان كل الخدمات رائعه و الناس معاملتها كويسة جداااااااااااا لكن فعلا الموضوع دة نرفزني جدااااااااا

انا عندي معلومه ان في نادي اسمه محمد علي رويال كلوب دة ممنوع فيه دخول المحجبات بس مش متأكد من المعلومه

و دور الجيش ممنوع فيها الجلاليب و الدقون و المنتقبات و دي حاجة انا متأكد منها لان في الشركه القديمه اللي كنت شغال فيها كان في افطار جماعي في رمضان و زوجه واحد من زمايلنا فطرت في الشارع جنب بتاع الامن هي و زوجها لان ذنبها الوحيد انها منتقبه ( دة كان في دار الدفاع الجوي )

يعني هي مش الحريه الشخصيه معانها انت حر مالم تضر يعني مش هتكلم من وجهه النظر الدينيه حتي هتكلم من وجهه نظر الناس بتاعه الديمقراطيه و الحريه

اسف للاطاله

المشاركة الأصلية كتبت بواسطة m.mosaad

صدقني منظر معظم المصريات اللي لابسين مايوهات سيء جداااااااا لان في ستات لابسة مايوهات و اجسامهم غايه في الترهل يعني الاجانب الحاجات دي مش بتبقي ملفته عليهم او ممكن تقول لايقه لكن فعلا مناظر سيئة جداااا .

يا باشا الفكره في المبدأ مش في الترهلات و لا غيره
يعني هوا لبس المايوه بقى اساسه جسمها مترهل ولا لا
مش مبدأ ان هوا اصلا غلط