الموضوع: حصرياً : تركيب مسند يد للابيزا 2010 (صور)

السلام عليكم ورحمة الله وبركاتة
بسم الله والصلاة والسلام على سيدنا محمد خاتم المرسلين

هذا الموضوع خاص وحصرى لمنتدى نايل موتورز

من فترة كبيرة جداً تقريبا من اول ما استلمت العربية فى شهر يناير 2010 وانا نفسى اركب لها مسند يد خصوصاً لما كنت بتفرح على صور العربية على الانترنت وكنت بشوف شكل مسند اليد الى بينزل فى العربية

والحمد لله من فترة لقيت على الانترنت شركة فى انجلترا اسمها ArmSter بتبيع مساند يد تقريباً لمعظم انواع العربيات حسب المكونات والشكل الداخلى للعربية بما يتناسب مع العربية من غير ما يخلى شكل المسند وحش جوة العربية وغير كدة كمان سهل التركيب

فى ناس هتسألنى طب انت لقيتة هنا فى مصر ؟
واشتريتة منين ؟
وبكام؟
وصناعة اية؟

للاسف الشديد مش موجود فى مصر
اشتريتة من انجلترا (انا اخويا بيشتغل هناك)
وسعره حوالى 900 جنية مصرى والاصلى تقريباً بحوالى 1200 جنية مصرى
الصناعة اتحاد اوروبى

ودة موقع الشركة على الانترنت
http://www.armster.co.uk

ودة مميزات المسند

ودة شكل وطريقة التركيب بالنسبة للابيزا 2010

انا عارف انى طولت عليكم اوى فى المقدمة

ندخل بقى على التركيب
شكل المسند قبل التركيب والمكون من :
1 - الجزء العلوى للمسند
2 - الجزء السفلى للمسند والمخصص للابيزا 2010
(يختلف هذا الجزء من سيارة لاخرى حسب النوع والموديل)
3 - كيس المسامير المخصصه للتثبيت
8 مسامير-(4 لتثبيت الجزء السفلى بالسيارة)-(4 لربط الجزء العلوى من السند بالجزء السفلى)

الادوات المستخدمة فى عملية التركيب
والمكونة من :
1- شنيور
2- قلم تحديد (Marker)
3- مفك صليبة عادى او كهربى حسب المتوفر
4- بونطة شنيور مقاس 3مم

نستعين بالموالى عز وجل ثم ناخد الادوات والمسند وننزل على العربية

1- نقدم الكراسى والظهر بتعها للامام عشان نوسع العربية من الخلف

2- نجيب الجزء السفلى من المسند ونضعة على الجزء الاخير من خلف عصى فرامل اليد ونحدد بالقلم اماكن المسامير (4 اماكن) 2 يمين و 2 شمال

3- نجيب الشنيور ونخرم الاربع اماكن للمسامير

4- نركيب الجزء العلوى من المسند فى الجزء السفلى بواسطة المسامير المخصصة لذلك وبعدها نضع المسند فى المكان المخصص له

5- نربط المسامير الخاصة بالجزء السفلى للمسند حتى يصبح ثابت داخل السيارة

6- نقوم بتعديل ارتفاع المسند بما يتلائم مع صاحب السيارة

وذلك عن طريق بكرة موجودة اسفل صندوق المسند

على فكرة الموضوع كلة ما خدش منى اكتر من 10 دقايق وكان الشكل النهائى

ارجو من الله عز وجل ان اكون وفقت فى الشرح وافادتكم
جزاكم الله خيراً

برجاء ذكر المصدر فى حالة النقل او الاقتباس