حمى السيارات الفاخره واللى انضمت الى صفوف سيارات الخدمه الخاصه بوزاره الداخليه من مااال الشعب بدأ منذ اعوام قليله بحجه مجاراه كثره السيارات الحديثه فى الشوارع واستغفالنا بإطلاق اسم دوريه شرطه على عربيات السرمحه وتأمين المواكب اللى بتلف تدور فى الشوارع مع امناء الشرطه ولخدمه توصيل الطلبات لمنازل الظباط

كانت البدايه مع سكودا اوكتافيا من بعد الاوبترا والكورولا والصنى وقولنا ماشى , تلاها انضمام الهاى لوكس الدوبل كابينه الكامله الى الخدمه وقولنا يا سيدى اهو بوكس متطور شويه مش عيب

شويه وجت الميجان الاستيشن ولتعيد تراث الفرنساوى اللى بدأته ال 405

وبعدين دخلنا فى الكيا سورنتو وقولنا عديها يا ريس خلى المحور حضارى , وبعدين الدنيا فتحت معاهم ونزلت الكامرى وقولنا يمكن حراسات خاصه وشغال , وبعدين شويه وظهرت الفيكترا وقولنا برده مش مشكله

واخيرا على حد علمى كانت الكابتيفا هى اخر المنضمين الى صفوف الداخليه المصريه

بس المره ده بقا الموضوع كبير , الهانم الجديده لا هى كورى ولا بتاعت وزير ولا هى رخيصه ولا ماركه بتاعه بهدله وشغل

العروسه البافاريه الجديده , ايوه بافاريه متقلقش مكتوبه صح هى ال BMW X3

العربيه الجديده اللى الواحده منها ب 450 ألف جنيه نازله تحميكم يا رجاله , وتجيب لكم ال Bad Guys من قفاهم وتخلى لكم المرور جنه الله على الارض

اتمتعى يا داخليه , وشيلو الدعم عن البنزين ال 92 علشان صحيح بقا بتاع الاغنياء بس

وياريت حد يبعتلى رقم تليفون مدام انشراح , اظن ميعاد نمرتها دلوقتى