لو انت مش مصري كنت هتختار تبقى ايه !!!

**brown-eyes** · 20-06-2010 12:58 AM

انجليزي
ايطالي

**thedeveloper87** · 20-06-2010 01:03 AM

يااااه على كده احنا عندنا انتماء كبير لبلدنا
لو لم أكن مصريا لوددت أن أكون إيفواريا

**M.almaghraby** · 20-06-2010 01:11 AM

بس انا مستغرب و مصدوم بصراحة من رغبة البعض في الجنسية الامريكية ...... هوا احنا نسينا العراق قوام كدا؟؟

انا عن نفسي ... نفسي اعيش فامريكا......... بس انا مستغرب اننا ننسي بسرعة كدا انها اول عدو للاسلام فالعالم

**M.Osman** · 20-06-2010 01:17 AM

المشاركة الأصلية كتبت بواسطة dr.almaghraby

انا عن نفسي ... نفسي اعيش فامريكا......... بس انا مستغرب اننا ننسي بسرعة كدا انها اول عدو للاسلام فالعالم

ولا عدو للإسلام و لا حاجة

احنا اللي بنحب نظرية المؤامرة

احنا اللي خايبين

امريكا مش بتحب غير نفسها و خلاص و مصلحتها فوق اي حاجة
و بصراحة حقها...

**Uranium** · 20-06-2010 01:21 AM

بالقطع مصرى بس اختار زمن تانى ,عادل امام قالها فى فيلم مش فاكر اسمة (البلد دى عمالة تتنهب وبرضة لسة فيها خير)
ياجماعة والله الشعب دة معدنة اصيل ونفيس جدا بس للأسف علية شوية صدا وتراب والواحد عمرة ماهيلاقى بلد زى البلد دى غالية عليا (بس ملعون ابو الحكومة) وخلى بالكو الحكومة حاجة والبلد حاجة تانى الحكومات بتروح وتيجى انما البلد ثابتة

**M.almaghraby** · 20-06-2010 01:26 AM

المشاركة الأصلية كتبت بواسطة m.osman

ولا عدو للإسلام و لا حاجة

احنا اللي بنحب نظرية المؤامرة

احنا اللي خايبين

امريكا مش بتحب غير نفسها و خلاص و مصلحتها فوق اي حاجة
و بصراحة حقها...

انا معاك فكل حاجة

و برده مش بحب نظرية المؤامرة

بس امريكا استثناء

بالذات فالتمن سنين بتوع جورج بوش..... كانت سياسة متطرفة جدا تجاه العرب....

و حرب العراق كانت غلطة كبيرة مش حتغتفر لامريكا ... و مش حتتنسي مهما كان

ولا ايه....

**omar-saad** · 20-06-2010 01:35 AM

انا لو مش مصرى
هابقى سويسرى

**mada121977** · 20-06-2010 01:55 AM

انا بقى احب اكون بروناوى
يعنى مواطن محترم فى سلطنه بروناى الرائعه

المواصلات عندى ببلاش مش زى الدوله الواقعه فى شمال شرق افريقيا اللى المواصلات العامه فيها قطعه من العذاب والطرق فيها لاترقى لسير عربات الخيول فى القرون الوسطى ...

والحدائق العامه والمتنزهات واماكن الترفيه ببلاش مش زى نفس الدوله اللى فوق واللى المواطنين فيها بيبقوا حاملين هم الخروج للتنزه علشان الميزانيه متخرمش منهم ...

مابدفعش ولا سحتوت ضرائب مش زى بلد تعبانه فى اقصى شمال شرق افريقيا كل يوم يخترع جباه الضرائب فيها انواع جديده من الضرائب التى تقصم ظهر المواطنين بها...

بروح احج على حساب السلطنه ببلاش مش زى نفس الدوله اللى فوق اللى المواطن علشان يروح يحج فيها بيدفع مبلغ وقدره واللى بيدفعه فى الحج اضعاف مضاعفه بيدفع قصاده لما بيروح العمره مبلغ بسيط !!

فى الاعياد الرسميه للمملكه الملك بينزل للشعب ويوزع عليهم دهب واموال اما الدوله اللى فوق فالمواطنين بيستغلوا الاعياد الرسميه فى السهر وزياره الاقارب والنوم لوقت متأخر والبكاء على الاطلال !!

لوقدر لى فى السلطنه ان اصبحت وزيرا (وده شىء سهل جدا فى السلطنه الجميله ) سأصبح من مالكى السياره الانجليزيه العريقه رولزرويس والتى تعتبر السياره الرسميه الاولى بالسلطنه .. بعكس الدوله المشار لها بالاعلى والتى يركب وزرائها مجرد سيارات مرسيدس وبى ام دبليو تعتبر من تعتبر من فئه السيارات المتوسطه فى اوروبا...

كمواطن من ابناء السلطنه ونظر للطبيعه الساحره والخلابه التى تتمتع بها من حيث انها جزيره فى المحيط الهندى تتمتع بسواحل وشواطىء على درجه عاليه من الفخامه والجمال فقد ساعدتنى هذه الميزه فى عدم اهتمامى بالسفر الى الخارج سواء الى دول اوروبا او اسيا او افريقيا للسياحه (بالرغم من سهوله ذلك لى فى اى وقت من الاوقات ) بعكس نفس الدوله المشار اليها سابقا والتى يدفع الفرد من الطبقه المتوسطه بها مرتب خمس سنوات لمجرد قيامه باجازه 3 ايام فى منطقه سياحيه تسمى شرم الشيخ او منطقه اخرى تسمى الغردقه يقال انهما على البحر الاحمر ..

عندنا فى السلطنه مفيش مظاهرات او احتجاجات او ناس واقفين من غير هدوم على رصيف البرلمان السلطانى او ناس بتموت من التعذيب ليييه ؟ علشان السلطان ادام الله عمره معيشنا فى رخاء وسعاده والناس هنا كلها بتحب بعض وبتخاف على بعض وبيروحوا يصلوا فى الجوامع مع بعض .. ااه افتكرت ان مره حصلت مظاهره عندنا من كام سنه علشان الحكومه قررت انها تنزل موديلات سيارات من ماركه تسمى جاجوار كسيارات اجره واحنا كشعب بروناوى رفضنا هذا القرار لاننا نستمتع بسيارات الرولزرويس
اييييييييييه ده ........ ليه كده ياابنى صحتنى من الحلم لييه !!

**Ahmed Samy** · 20-06-2010 02:06 AM

المشاركة الأصلية كتبت بواسطة hon

بصراحة انا شايف الوطن فى بيتى وأسرتى
بتفائل بضحكة من أبنى وبحب أشوف علم بلدى
أحب أشجع المنتخب وبحب اكلة سمك حلوة من بورسعيد
وأتمشى على كورنيش الاسكندرية وفى حدايق المنتزة
بتوجع من الظلم وبستحمل والفساد بيحرق دمى
بكرة الفلوس الى عدنا بنبيع نفسنا عشانها وبدعى ربنا يصلح حال بلدى
وبلعن ابو البلد لما اتظلم ورجع أسامحها منا ابنها وهيا امى
والله يا أستاذ أحمد دى قرائتى للوطن يمكن مقصورة بس انا بيها سعيد
حاول تحس بالبلد فى صحابك وحبيبك يمكن تلاقيها فى المنتدى هنا بالوح الحلوة
المهم تلاقيها وتطرد احساس الغربة الى جواك لأنه لا يطاق هون الله عليك تحياتى

المشاركة الأصلية كتبت بواسطة Fouad Ezz

تسمحلى أنا أقولك شايف الوطن إزاي!!!
هو إحساس شخصى مش أكتر .. حسيته لما عشت فى السعودية 3 سنين
كنت طول الفترة دى خايف من كل حاجة وأى حد ... خايف أمرض .. خايف أموت .. خايف أتخانق مع حد ... خايف فلوسي تخلص ,اضطر أستلف من حد ... إحساس رهيب بعدم الأمان
وشعور أخر ... كنت كل مابشوف حاجة حلوة ونظام حلو أو شارع واسع ومسفلت ... أول تفكير يجى فى بالى إزاى مصر تبفى كدة ...
محسيتش زى ناس كتير هناك .. بإنى عايز أعيش للأبد فى السعودية ... بالعكس كنت كل لحظة أتمنى أن أنقل كل ما هو جميل هناك إلى مصر
ويوم ما قررت إنى أرجع نهائي كنت بعد الأيام زي المسجون إللى مستنى الإفراج ...
مع العلم كنت عايش عيشه معقولة جدا هناك وكان لى مستقبل كويس والناس إللى حواليا كانوا بيعاملونى بإحترام ... بس كنت حاسس إنى "سمكة إستوائية" عايشة فى حوض سمك جميل وغالى بس فى "أيسلندا"

المشكلة بقى اني فعلا مش قادر احس اللي hon حاسه و حاسس قوي باللي فؤاد قال عليه

أنا عارف اني في مصر ماليش قيمة

ليا ظهر و اتنين بس باقرف لما اكلم حد علشان أخلص حاجة المفروض تخلص بدون واسطة

لما بانزل اتمشى في الشارع ما باشكيش للشوارع تعبى و قرفي

لأن الشارع ده هو اللي تاعبني و قارفني

حتى كلام البعض ان في هنا أمان لو الواحد مرض و عمل مشكلة هايلاقي اللي يلحقه

اللي هايلحقك من أهلك بيكون بيعوض غياب نظام يحميك

اللي بياخدك في عربيته على مستشفى " وده حصل لي" بيعوض غياب نظام اسعاف محترم

اللي بينزل يقف معاك و يكلملك ناس لو عملت حادثه " ظالم أو مظلوم" برضه بيعوض غياب نظام امني عادل

وجودنا وسط أهلنا بيدينا شعور بالأمان لأننا عايشين في غابه

نفسي أحس اني ماشي في الشارع و لي قيمة ووزن ..من غير كارت و من غير موبايل و من غير ما اقول اتفضل كلم يا باشا ..فلان بيه عايز يكلمك

الوطن هو اللي يحميني جواه و براه

الوطن اللي أموت فيه و عارف ان ولادي هايتعلموا و ياكلوا و يشربوا

الوطن اللي يفرحنى ولو يوم في السنة

الوطن اللي يديني حقى فيه و ياخد حقه مني بالعدل

الوطن ....اللي عمري ما افكر ابدله

وهو الواحد بيحب امه ليه ؟؟؟ علشان هي امه و خلاص ولا علشان هي حلوة ؟؟؟

عشان حنينة و قلبها عليه

انما لو رمته و داست على قلبه و كرامته

ما تبقاش امه

ولا يبقى وطن

**Donzi** · 20-06-2010 02:29 AM

كنت اتمنى اكون تركية و اعيش في تركيا طبعا لأنها دولة اسلامية متحضرة فعلا ( خدو بالكو من متحضرة دي) و متقدمة اقتصاديا و سياسيا و كمان ليها مواقف قوية و محترمة لصالح المسلمين دا غير انها بلد جميل و نضيف و متحضر جدا

الموضوع: لو انت مش مصري كنت هتختار تبقى ايه !!!

LinkBack

أدوات الموضوع

عرض

-

-

-

-

-

-

المواضيع المتشابهه

لو انت اللى هتختار ... تزود سعر السجائر ولا البنزين ..؟؟؟

لو مكانى هتختار اية

من 70 الى 90 تبقى ايه

مناقشة هادئة لموضوع مصري و مش مصري

على أي أساس هتختار رئيس مصر ؟

الكلمات الدلالية لهذا الموضوع

المفضلات

المفضلات

ضوابط المشاركة