الموضوع: مشكلة مع بيجو

السلام عليكم
انا معايا بيجو 206 موديل 2001 و عندى مشكلة غريبة شوية و هى ان جزء من الشكمان محتاج يتغير و بيسموه (زور الشكمان) المهم الجزء ده مش موجود فى مركز الخدمة اللى فى الأسكندرية او حتى اللى فى القاهرة ..المهم قاللى هنبعت نجيب الجزء ده من فرنسا على اساس ان فيه شحنة قطع غيار هتييجى من فرنسا فيجيبوا الجزء ده معاها .. الكلام ده كان يوم 2 سبتمبر 2007 و لحد النهاردة مفيش اى حاجة وصلت .. شهرين و نص و مفيش حاجة وصلت ..و لما بروح مركز الخدمة بيحلفولى ان هم بلغوا الطلبية للقاهرة و المفروض ان القاهرة بلغت فرنسا و التأخير من فرنسا لسبب لا يعلمه إلا الله و محدش فى ايده حاجة يعملها
فقلت انا لازم اتصرف لإنى كنت خلاص زهقت دخلت على موقع بيجو و بعت شكوى ليهم بالقصة كاملة ..الكلام ده كان يوم 4 فبراير 2008
و كان الرد طبعآ انهم بيستنكروا المشكلة دى و انهم هيشوفوا حل للموضوع ده و طلبوا رقم الشاسيه و شوية بيانات عن العربية ة بالفعل بعتلهم كل حاجة و كمان رقم تليفونى
و الرد كان طبعآ فى اوله الدباغة البايخة اللى هى شكرآ لثقتكم و كلام فاضى كده و قالوللى انهم هيخلوا حد من خدمة العملاء فى مصر يكلمنى و عشان يفهم الموضوع أكتر و يقدر يحل المشكلة و الكلام ده كان يوم 6 فبراير
و لحد دلوقتى محدش عبرنى بأى تليفون و لا حتى email.. رحت باعت تانى لبيجو و قولتلهم ان محدش أتصل بى و مركز الصيانة هنا بيقولى ان هم مفيش فى ايديهم حاجة يعملوها و ردوا علي برد لا ينفع و لا يضر و ان بما معناه ( اصبر شوية صدعتنا )
انا خلاص زهقت تمامآ و بقيت مش عايز اسوق العربية لإن صوتها عالى و سحبها تعبان و بتطلع اصوات غريبة

و المشكلة ان الناس فى مركز الصيانة ناس محترمة و مؤدبين جدآ و علاقتنا بيهم كويسة و فعلآ واضح ان هم مش عارفين يعملوا حاجة و بيحلفوا ان عندهم عربيات واقفة تمامآ فى انتظار قطع الغيار و لحد دلوقتى مفيش حاجة وصلت

و على فكرة انا رحت بالعربية لمركز المأمون اللى فى ازريطة و قاللى انا معنديش حد بتاع شكمانات و قاللى بلاش توديها لحد بره عشان ممكن يبوظلك حاجة تانية و خليك ورا التوكيل و البالمناسبة انا دافع 450 جنيه تحت الحساب عشان محدش يقول انى بطلب حاجة مش دافع جزء من تمنها

أنا آسف على الإطالة بس لو حد عنده حل للموضوع ده يقوللى أكلم مين؟ و لا أعمل إيه؟؟ يا ريت تلحقونى من القرف ده

و شكرآ جزيلآ

...................
تم النقل
الإدارة -3